Хапсаҕай: Владимир Андросов түһүлгэтигэр кимнээх кыайдылар?

Бэйэтин кэмин биир  чулуу тустууга Владимир Андросов кэриэһигэр ыытыллар хапсаҕайга 27-с республикатааҕы турнир 114 хапсаҕайдьыты түмтэ. Кинилэр ортолоругар Саха сирин 16, Россия 3 спортарын маастарын кытта – 2 атах оонньуутун, 2 мас-рестлинг маастардара күүстэрин холостулар.

Улууспут хапсаҕайдьыттара быйыл саас Петр Алексеев аатынан республика чемпионатыгар хамаанданан бастаан тураллар. Турнир үөрүүлээх аһыллыытыгар чиэстээһин тэрилиннэ. Улуус баһылыга Михаил Соров эҕэрдэлээн туран, элбэх сыраларын биэрбит, СР спордун маастардара Николай Ивановка, Иван Барбасытовка “Таатта улууһугар физическэй култуура уонна спорт сайдыытыгар кылаатын иһин” бэлиэлэри, спорт маастардара Игнат Андросовка, Давыд Колесовка, Александр Халыевка, Дмитрий Рахлеевка, Василий Бурмистровка, Ньургун Тистяховка, бэтэрээн тустууктар Иван Максимовка, Александр Устиновка улуус баһылыгын Бочуотунай грамоталарын туттартаата.

Хапсаҕай улуустааҕы федерациятын салайааччыта Прокопий Рахлеев бэйэтин санаатын этэн, эҕэрдэлээн туран кыайыыны аҕалбыт хамаанда бары чилиэттэригэр остуолга уурар бэлэхтэри уонна харчынан бириэмийэлэри анаата. Оттон улуус спордун салайааччыта Андрей Сидоров Манчаары спартакиадатын призердара Роман Уйгуровка уонна Спиридон Суздаловка, спорт бэтэрээнэ Софрон Винокуровка “Спорт национальнай көрүҥнэригэр Манчаары оонньуулара ХХ спартакиада” бэлиэлэри түөстэригэр ииллэ.

Күрэхтэһии былааҕа күөрэччи көтөҕүллээтин кытта, уолаттар күрэхтэһиини саҕалаатылар. Уолаттарга кыттааччы кэмчи буолла, алта ыйааһыҥҥа 29-тар эрэ. Ол да буоллар, наҕараадалар хаһаайыннарын буллулар.

50 кг: 1. Антон Никонов, 2. Саша Канаев, 3. Саша Андросов (бары таатталар).

55 кг: 1. Родион Васильев (Хаҥалас), 2. Валерий Федоров, 3. Айсен Свинобоев (иккиэн – таатталар).

62 кг: 1. Ариан Неморицын (Таатта), 2. Иван Винокуров (Анаабыр), 3. Егор Винокуров (Таатта).

70 кг: 1. Сандаар Кривошапкин (Хаҥалас), 2. Виталий Константинов (Таатта), 3. Юлиан Никитин (Хаҥалас).

80 кг: 1. Максимилиан Уаров, 2. Рустам Туласынов (иккиэн – таатталар), 3. Иван Солдатов (Хаҥалас).

+80 кг: 1. Петр Деляев, 2. Стас Бабанов, 3. Игорь Аянитов (бары таатталар).

Бэтэрээннэргэ биэс ыйааһыҥҥа 20 хапсаҕайдьыт күөн көрүстэ. Маныаха кыайыылаахтарынан уонна призердарынан буоллулар:

60 кг: 1. Михаил Макаров (Модун), 2. Иван Максимов (Таатта), 3 Петр Охлопков (Томпо).

70 кг: 1. Иван Барбасытов (Таатта), 2. Василий Оконешников (Уус Алдан), 3. Григорий Григорьев (Таатта).

80 кг: 1. Иван Сильвестров (Мэҥэ Хаҥалас), 2. Николай Иванов, 3. Владимир Кривошапкин (иккиэн таатталар).

90 кг: 1. Василий Бурмистров, 2. Егор Малышев, 3. Вячеслав Аввакумов (бары таатталар).

+90 кг: 1. Александр Устинов, 2. Владимир Сивцев (иккиэн – таатталар), 3. Георгий Захаров (Уус Алдан).

Эр дьоҥҥо алта ыйааһыҥҥа 65 эр бэрдэ муһунна. Саамай элбэх даадар 65 уонна 75 кг ыйааһыннарга мустаннар, маастар нуорматын толорорго баал ылар балаһыанньа үөскээтэ. Түмүккэ 21 кыттааччылаах 65 киилэҕэ үс иһигэр киирбит Кэскил Саввинов (Хаҥалас), Вадим Неустроев (Амма), Ньургун Тистяхов (Таатта) СР маастара буоларга биирдии баалы суруннулар. 19 бөҕөс күүһүн холоспут 75 кг ыйааһыҥҥа улууспут биир эрэлэ Вилиям Ючюгяев кыахтаахтык бастаан, маастарга биир хардыыны оҥордо. Тааттаттан тардыылаах Хаҥалас ыччата Василий Анисимов иккис миэстэҕэ тахсан, эмиэ биир баалы ылла. Үһүс миэстэҕэ спорт маастара Давыд Колесов (Таатта) таҕыста. Бу ыйааһыҥҥа СР муҥутуур кыайыылааҕын, спорт маастара Очиржап Очиржаповы бириистээх миэстэҕэ киллэрбэтилэр.

11 даадар хапсыбыт 57 киилэҕэ СР призера, спорт маастара Саргылан Бетюнов (Таатта) тахсыылаахтык киирсэн бастаата. Ыалдьыттарбыт, спорт маастара Айаал Лыткин (Мэҥэ Хаҥалас), Петр Жегусов (Чурапчы) иккис-үһүс буоллулар.

85 кг: 1. Виктор Нифонов (Бүлүү), 2. Денис Сивцев (Хаҥалас), 3. Айсен Ботуев (Үөһээ Бүлүү).

+95 кг: 1. Леонид Попов, 2. Дмитрий Рахлеев (иккиэн таатталар), 3. Петр Тимофеев (Хаҥалас).

Сүрүн күрэхтэһии кэнниттэн 75 кг диэри уонна 75-тэн үөһээ кг ыйааһыннарга муҥутуур күүстээҕи быһаарсыы тэрилиннэ. Онуоха 75 кг диэри 31, онтон 75-тэн үөһээ 8 эр бэртэрэ суруттардылар. Икки эргиир кэнниттэн Василий Анисимов, Кэскил Саввинов (хаҥаластар), Вадим Неустроев (Амма), Айаан Горохов (Дьааҥы), Валентин Моякунов (Ньурба), Петр Жегусов (Чурапчы), Давыд Колесов, Николай Иванов (таатталар) хаалаллар. Үһүс эргииргэ өссө аҥаардара туораан Колесов, Горохов, Моякунов, Иванов ордоллор. Финалга тахсар иһин киирсиигэ Горохов – Колесовы, Иванов – Моякуновы сууллардылар. Горохов – Иванов финалга тахсан, убаһа иһин киирсиилэрэ саҕаланар. Бэтэрээн Иванов наар кимэр, онуоха эдэрэ эдэр курдук, биир түгэҥҥэ Айаан, Николай кэннигэр баар буолар уонна өрө көтөҕөн таһааран кылбар кыайыыны ситиһэр.

75-тэн үөһээ түөрт киһи хаалбытыгар Денис Сивцев (Хаҥалас) – Дмитрий Рахлеевы (Таатта), Леонид Попов (Таатта) чахчы бөҕө-таҕа көрүҥнээх саха бухатыыра Виктор Нифоновы (Бүлүү) сэрэтиинэн кыайаннар, финалга тахсаллар. Онуоха бэйэбит уолбут, спорт маастара Леонид Попов кумахха тустууга аан дойду чемпионатын призерун, икки тустуу маастара Денис Сивцеви кыайа тутан, убаһа хаһаайынынан буолла. Кыайыылаахтарга 2019 сыл төрүөх убаһа бириис сертификаттарын улуус баһылыга Михаил Соров уонна хапсаҕай федерациятын салайааччыта Прокопий Рахлеев, көрөөччүлэр ытыстарын тыаһыгар доҕуһуоллатан туттардылар.

Куруутун буоларын курдук, бу улахан түһүлгэ сүрүн спонсордарынан улуус дьаһалтата уонна хапсаҕай федерацията буоллулар. Түһүлгэ түмүгүнэн бу ый ортото Бэрдьигэстээххэ ыытыллыахтаах СР хапсаҕайга федерациятын кубогар кыттыахтаах хамаанда састааба торумнанна.

Анатолий МУРУНОВ.

Таатта.    

Добавить комментарий

Ваш e-mail не будет опубликован. Обязательные поля помечены *