“Бүлүү кубога” хапсаҕай: Дьиэлээхтэргэ кыайыыны Николай Николаев аҕалла

Эрдэ иһитиннэрбиппит курдук, ааспыт өрөбүл күннэргэ Бүлүү улууһун Халбаакы нэһилиэгэр СР физическэй култуураҕа уонна спорка үтүөлээх үлэһитэ, Бүлүү куоратын бочуоттаах гражданина, ХХ үйэҕэ “Сахаада-спорт” ассоциация лауреата Леонид Николаев бирииһигэр хапсаҕайга “Бүлүү кубога” хамаанданан күрэхтэһии ыытылынна.

Күрэхтэһиигэ алта хамаанда күрэс былдьаста: Ньурба, Бүлүү-1, Бүлүү-2, Үөһээ Бүлүү, Сунтаар, Горнай хамаандалара. Хамаанда састаабыгар алта уол, биэс бэтэрээн уонна алта эр киһи киирдэ. Күрэхтэһии этиллибитин курдук, хамаандалар сирэй көрсүүлэрин быһыытынан барда.

Икки күннээх күрэхтэһии түмүгүнэн Бүлүү-1 хамаандата эрэллээхтик бастаата. Кыайыылаах хамаанда састаабыгар Дмитрий Винокуров, Айтал Никитин, Василий Григорьев, Яков Еремеев, Роман Николаев, Спартак Алексеев (уолаттарга), Семен Таныков, Алексей Павлов, Семен Тимофеев, Клим Иванов, Егор Терентьев (бэтэрээннэргэ), Сергей Александров, Артур Епифанов, Дмитрий Ушницкай, Афанасий Матвеев, Николай Николаев, Александр Иванов (эр дьоҥҥо) кытыннылар. Бэлиэтээн эттэххэ, сүрдээх сытыытык, тыҥааһыннаахтык барбыт хапсыһыыларга бүлүүлэргэ дьиэлэрин эркинэ өйөбүл, тирэх буолан – үөһээ бүлүүлэри 10:7, сунтаардары 9:8 (манна олохтоохторго быһаарыылаах кыайыыны биллиилээх хапсаҕайдьыт Николай Николаев аҕалла) ахсаанынан кыайдылар. Манныгы этэн эрдэхтэрэ, “дьиэҕэр истиэнэҥ эмиэ көмөлөһөр” диэн.

Сунтаар хапсаҕайдьыттара иккис, Үөһээ Бүлүү үһүс буоллулар. Салгыы миэстэлэри Бүлүү, Горнай, Ньурба хамаандалара ыллылар.

Сүрүн күрэхтэһии кэнниттэн муҥутуур кыайыылаахтары быһаарар түһүлгэ тэрилиннэ. Онуоха эр дьоҥҥо 10 кыттааччыттан Сунтаартан кэлбит спорт маастара Гаврил Михайлов бастаата. Киниэхэ Л.Р. Николаев дьиэ кэргэнин убаһа бирииһэ туттарылынна. Оттон уолаттарга 14 кыттааччыттан кыайыылааҕынан Үөһээ Бүлүүттэн Леонид Яковлев тахсан, Николаевтар ааттарыттан сүрүн бириис быһыытынан – телевизорынан наҕараадаланна.

Күрэхтэһии кэмигэр Леонид Романович Николаевы чиэстээһин буолла. Киниэхэ улуус баһылыгын махтал суруга, өйдөбүнньүк бэлэҕэ, Халбаакы нэһилиэгин, оскуолатын, Н.Г. Чернышевскай аатынан Бүлүүтээҕи педколледж, өр сылларга үтүө суобастаахтык үлэлээбит В.Г. Румянцев аатынан спортивнай оскуолатын – сыаналаах бэлэхтэрэ, эҕэрдэ суруктара үөрүүлээх быһыыга-майгыга туттарылынна.

Бүлүү улууһун спорка тэрилтэтин салайааччыта Гаврил Евсеев: “Бу аан бастакы тэриллибит “Бүлүү кубога” сылын аайы үтүө үгэскэ кубулуйан, улуус бастыҥ хапсаҕайдьыттарын бирииһигэр ыытыллан иһиэҕэ диэн биир сүбэнэн быһаарсан, үөрэн-көтөн тарҕастыбыт”.  

Петр ПАВЛОВ.  

Добавить комментарий

Ваш e-mail не будет опубликован. Обязательные поля помечены *