Евро-2020: Сэрэбиэй тугу түстээтэ?

Румыния киин куоратыгар Бухарестка, Европа футболга чемпионатын быһаарыылаах түһүмэҕэр кыттар хамаандалар сэрэбиэйдэрэ ыытылынна. Биллэрин курдук, эһиилги чемпионат тэриллиитэ уратылаах. Ол курдук, чемпионат 60 сыллаах үбүлүөйүнэн сибээстээн, оонньуулар Европа 12 куоратыгар ыытыллыахтара. Быһаарыылаах оонньуулар Рим (Италия) уонна Баку (Азербайджан) куораттарга буолуохтара. Чемпионат 2020 сыл бэс ыйын 12 күнүттэн – от ыйын 12 күнүгэр диэри ыытыллыаҕа.

Сэрэбиэй түмүгэ маннык буолла:

А: Турция, Италия, Уэльс, Швейцария

В: Дания, Финляндия, Бельгия, Россия

С: Нидерланды, Украина, Австрия (Грузия, Беларусь, Македония, Косово)

Д: Англия, Хорватия, Чехия (Шотландия, Израиль, Норвегия, Сербия).

Е: Испания, Швеция, Польша (Босния уонна Герцогевина, Словакия, Ирландия, Хотугу Ирландия).

Ф: Португалия, Франция, Германия (Исландия, Болгария, Венгрия, Румыния)

Көрбүккүт курдук, А уонна В бөлөхтөр састааптара толору эбит буоллаҕына, атын бөлөхтөргө састаап итэҕэс. Онно, Нациялар лигаларын түмүгүнэн, скобка иһигэр суруллубут хамаандалартан бастыҥнара талыллан киириэхтээх.

Чемпионат балаһыанньатын быһыытынан, финал 8/1-гэр хас бөлөх аайыттан иккилии бастыҥ хамаанда тахсар. Ону тэҥэ, түөрт үчүгэй көрдөрүүлээх үһүс миэстэни ылбыт хамаанда тахсыахтаах.

Сэрэбиэй түмүгүнэн Россия хамаандата бэс ыйын 13 күнүгэр Санкт-Петербург куоракка Бельгияны, бэс ыйын 17 күнүгэр эмиэ ити куоракка Финляндияны уонна бэс ыйын 22 күнүгэр Копенгагеҥҥа – Дания хамаандатын кытта оонньуоҕа. Маныаха, кылаабынай тренер “Станислав Черчесов хамаандата бөлөҕүттэн тахсыа дуо, хаһыс миэстэ буолуой?” диэн ыйытыы, футболу таптааччылары сүгүн утуппат буолуохтаах.

Олохсуйбут үгэһинэн, биһиги Евро-2020 анаан хас даҕаны түһүмэхтээх куонкурус тэрийэргэ былаанныыбыт. Онон футболу сэҥээрээччилэр “Дьулурҕан” хаһыаты, http://dzulurgan.ru уонна https://sakha-pechat.ru сайтары кэтии сылдьаргытыгар сүбэлиибит. Мантан инньэ аан дойдуга бастакы нүөмэрдээх спорт көрүҥэр улахан түһүлгэни көрсө “Евро-2020” рубриканы аһан, сахалыы тылынан билиһиннэриэхпит, кэпсиэхпит. Араас санаа атастаһыылар, футбол историятыгар викториналар, хаартысканан куонкурустар, ыйытыктар, билгэлээһиннэр баар буолуохтара.

Футболу таптааччылар биһиги ыытар үлэбитигэр көхтөөхтүк кыттаргытыгар ыҥырабыт!

Петр ПАВЛОВ.  

Добавить комментарий

Ваш e-mail не будет опубликован. Обязательные поля помечены *