Остуол тенниһэ: Республика чемпионатын кыайыылаахтарынан кимнээх буоллулар?

Сэтинньи 27 – ахсынньы 1 күннэригэр “Кыайыы 50 сыла” Спорт дыбарыаһыгар остуол тенниһигэр республика чемпионата түмүктэннэ. Чемпионакка барыта 29 хамаандаттан 124 спортсмен кыттыыны ылла. Чемпионат кылаабынай судьуйатынан – Бүтүн Россиятааҕы категориялаах судьуйа А.А. Алексеев, оттон кылаабынай секретарынан – бастакы категориялаах судьуйа М.Г. Платонов үлэлээтилэр. Чемпионат ыытыллыытыгар барыта 17 судьуйа кытынна.   

Бастатан туран, чемпионат түмүгүн билиһиннэрдэххэ, хамаанданан күрэхтэһиигэ эр дьоҥҥо Ньургун Сабарайкин, Михаил Эртюков, Арсен Платонов, Семен Павлов састааптаах Таатта теннисчиттэрэ бастаатылар. Иккис – ХИФУ, үһүс – Уус Алдан хамаандалара буоллулар.

Оттон дьахталларга Айыына Петрова, Анастасия Кочаткина, Анита Ноговицына, Айза Новикова састааптаах, К.И. Слепцов тренердээх Амма хамаандата инники таҕыста. Манна иккис-үһүс миэстэлэри Ньурба уонна Нерюнгри хамаандалара үллэһиннилэр.

Биирдиилээн түмүккэ эр дьон финалыгар Василий Румянцев (Уус Алдан) – Ньургун Сабарайкины (Таатта) кыайан, чемпион үрдүк аатын ылла. Үһүс бириистээх миэстэҕэ Сергей Ли (Мирнэй) таҕыста.

Дьахталларга Арина Федорова (Мэҥэ Хаҥалас), Вероника Степанова (ХИФУ), Маргарита Решетникова (Нерюнгри) үс бастакы миэстэни үллэһиннилэр.

Пааранан оонньууга эр дьоҥҥо – Ньургун Сабарайкин, Михаил Эртюков (Таатта), дьахталларга – Валерия Владимирова (Ньурба), Арина Федорова (Мэҥэ Хаҥалас) бастаатылар.

Оттон булкаастаах пааранан оонньууга Ньургун Сабарайкин (Таатта) уонна Айыына Петрова (Амма) тэҥнээхтэрин булбатылар.

Эр дьоҥҥо уонна дьахталларга хамаанданан бастаабыттар кубоктарынан уонна дипломнарынан наҕараадаланнылар. Оттон биирдиилээн оонньооһун кыайыылаахтара мэтээллэринэн уонна грамоталарынан бэлиэтэннилэр. Кинилэргэ наҕараадалары СР физическэй култуураҕа уонна спорка миниистирин солбуйааччы А.Бугаев, СР физическэй култуураҕа уонна маассабай спорка управлениетын начаалынньыга А.Мохов уонна СР остуол тенниһигэр федерациятын толорооччу дириэктэрэ М.Андреев туттардылар.

Чемпионат түмүгүнэн, Тааттаттан спорт маастара Ньургун Сабарайкин үрдүк көрдөрүүлэннэ. Кини хамаанданан, пааранан уонна булкаастаах пааранан оонньооһуҥҥа бастаата, биирдиилээн киирсиигэ иккис буолла. Онон, чемпионат түөрт бөлөҕүнэн араарыллан ыытыллыбыт көрүҥнэригэр барытыгар эриэ-дэхси ситиһиилэннэ. Оттон спорт маастара Василий Румянцев хамаанданан үһүстээтэ, биирдиилээн түмүккэ бастаата. Дьахталларга Амматтан Айыына Петрова хамаанданан уонна булкаастаах пааранан оонньооһуҥҥа бастаан, үчүгэй көрдөрүүлэннэ.

“Дьулурҕан”.

Добавить комментарий

Ваш e-mail не будет опубликован. Обязательные поля помечены *