Алроса Кубога-2019: Үчүгэй тустуулары көрдүбүт

Москваҕа, Алроса Кубогар көҥүл уонна гректии-римнии тустууларга норуоттар икки ардыларынааҕы турнир Россия хамаандатын кыайыытынан түмүктэннэ. Турнир кэмигэр спортивнай комментатор Феликс Премильскай: “Петр Петрович Юмшанов Африкаҕа үлэлиир!” – диэн биллэрбитигэр, саала иһигэр ытыс тыаһа өрө хабылла түстэ.

Саха уолугар атын омуктар ытыстарын таһыналлара, истэргэ үчүгэйэ сүрдээх. Сахалар атын дойдуга тустуук-спортсмен эрэ быһыытынан буолбакка, тренер-специалист быһыытынан үлэлии барар кэммит кэлбит.

Үрдүк таһымнаах тренердэри иитии, саха тустуутун сайдыытын көрдөрөр ирдэбил биир өрүтэ буоллаҕа.

Оннук ирдэбил оҕону иитииттэн-үөрэтииттэн саҕаланыахтаах. Саха оҕото бэйэтигэр эрэлэ онтон саҕаланыахтаах. Аан дойду таһымыгар үлэлиэхтээхпит-хамсыахтаахпыт, айыахтаахпыт-тутуохтаахпыт диэн ирдэбил, хас биирдии үөрэх кыһатыгар сүрүн сорук быһыытынан инники кирбиигэ туруохтаах.

Оннук үлэ бардаҕына, өй-санаа таһыма үрдээтэҕинэ, олоххо көрүүбүт кэҥээн, кэлэр кэмҥэ эрэллээх буолуохпут.

Москваҕа Алроса Кубогар Петр Петрович 65 киилэҕэ Гвинея Бисау бөҕөһүн кытыннарда. Манна даҕатан эттэххэ, ахсынньы 68 күннэригэр Нерюнгри куорат “Шахтер” спортивнай комлексыгар Ил Түмэн депутата, спорт үтүөлээх маастара Петр Юмшанов бирииһигэр көҥүл тустууга спорт маастара нуормата толоруулаах Бүтүн Россиятааҕы турнир ыытыллар. Турнирга 300 бөҕөс кыттара күүтүллэр.

Кирилл ПАВЛОВ, гректии-римнии тустуу тренерэ.

30.11.2019 сыл, Москва куорат.

Добавить комментарий

Ваш e-mail не будет опубликован. Обязательные поля помечены *