Дуобатчыттарбыт Японияттан кэллилэр

Дуобат аан дойдутааҕы федерациятын көҕүлээһининэн Япония киин куоратыгар Токиоҕа 64 харахтаах – нуучча дуобатыгар норуоттар икки ардыларынааҕы турнир ыытыллан түмүктэннэ. Онно Россия хамаандатын састаабыгар киирэн, биллиилээх тренер Василий Иннокентьевич Кононов салайааччылаах алта киһиттэн састааптаах Саха сирин эдэр дуобатчыттара кытыннылар. Манна даҕатан эттэххэ, Тахсар күннээх дойдуга нуучча дуобатыгар бу бастакы улахан таһымнаах күрэхтэһии. Василий Иннокентьевич кэпсээбитинэн, аан дойдутааҕы федерация спорт бу көрүҥүн өссө киэҥник сайыннараары маннык күрэхтэһиини Японияҕа тэрийбит.

Күрэхтэһиигэ 4 дойдуттан (Украина, Россия, Монголия, Япония) барыта 22 дуобатчыт кыттыыны ылла. Ол иһигэр 3 международнай гроссмейстер, 5 маастар күрэс былдьаста.

Балаһыанньа быһыытынан турнир эр дьоҥҥо уонна дьахталларга туспа ыытыллыахтаах эбит да, кэрэ аҥаардарга кыттааччы аҕыйах буолан, түмүк таһаарыллыбатах. Онон түмүккэ Блиц оонньууга бэтэрээннэргэ аан дойду чемпиона, спорт маастара Олег Шапунов (Украина) бастаата. Иккис миэстэни эмиэ украинец, международнай гроссмейстер Владислав Мазур ылла. Үһүс бириистээх миэстэҕэ Россияттан международнай гроссмейстер, устудьуоннарга аан дойду чемпиона Дмитрий Мельников таҕыста.

Оттон Рапид оонньууга Д.Мельников бастаата, В.Мазур иккис, О.Шапунов үһүс миэстэлэри үллэһиннилэр. Биһиги кыыспыт, спорт маастара Ангелина Скрябина (тренерэ – В.И. Кононов) төрдүс миэстэҕэ таҕыста. Уоннааҕыларбыт орто көрдөрүүлэннилэр. Манна сыһыары тутан сырдаттахха, Ангелина – Дьокуускайдааҕы физико-техническэй лицей тохсус кылааһын үөрэнээччитэ. Быйыл бэс ыйыгар Ташкеҥҥа (Узбекистан) ыытыллыбыт Азия күрэхтэһиитигэр бастаабыта, оттон атырдьах ыйыгар Болгария Варна куоратыгар буолбут аан дойду күрэхтэһиитигэр иккис миэстэни ылбыта.

Дьоппуоннар күрэхтэһии уопсай тэрээһинин үрдүк таһымнаахтык тэрийэн ыыттылар, – диир ССРС спордун маастара, СР үтүөлээх тренерэ Василий Иннокентьевич. – Ханныгын да иһин, дуобакка бастакы тэрээһиннэрэ. Оттон күрэхтэһии чааһын Дуобат аан дойдутааҕы федерациятын специалистара салайан ыыттылар. Биһигини Токиоҕа олорор, үлэлиир биир дойдулаахтарбыт көрсөн, этэргэ дылы, ытыс үрдүгэр түһэрэн илдьэ сырыттылар. Куорат кэрэ-бэлиэ миэстэлэрин көрдөрдүлэр. Наһаа улахан куорат эбит. Олимпийскай дэриэбинэҕэ сырыттыбыт. Ырааһа, дьоно бэрээдэктээхтэрэ сөхтөрдө. Ханна да көр, барыта эһиил ыытыллыахтаах сайыҥҥы Олимпиада рекламата. Япония Олимпийскай кэмитиэтин чилиэнэ Саха сирин, дуобаты интэриэһиргээтэ. Табылыннаҕына, сотору кэминэн сибээс олохтуу Дьокуускайга кэлиэх буолла.      

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *