Бокс: Василий Егоров – Россия чемпионатын үрүҥ көмүс призера

Самара куоракка Россия боксаҕа чемпионата түмүктэннэ. Билиҥҥи кэмҥэ биһиги тумус туттар боксербут, Россия үс, Европа икки төгүллээх чемпиона, аан дойду чемпионатын үрүҥ көмүс призера, спорт үтүөлээх маастара Василий Егоров (52 кг) финалга дагестанец Расул Салиевы кытта көрүстэ. Манна даҕатан эттэххэ, ити үөһээ ахтыллыбыт ситиһиилэри Василий барытын 49 киилэҕэ кыттан ситиспитэ. Оттон Россия чемпионатыгар аан маҥнай 52 кг ыйааһыҥҥа күүһүн холосто. Соһуйумаҥ, манна холосто диэн тыл оруннаах.

Ылан көрдөххө, кини билигин 52 киилэҕэ толору кыаҕынан кыттар кыаҕа суоҕун билиниэххэ наада. Тоҕо диэтэххэ, ити ыйааһыҥҥа бастыҥ буоларга күүс-уох, эт-хаан өттүнэн билиҥҥитэ эппиэттэспэт. Ол да буоллар, Василий бэйэтинээҕэр бөдөҥ, күүс-уох өттүнэн сайдыылаах утарсааччыларын кыайталаан финалга тахсыбыта. Онно да, кыайыаҕын, сэниэтэ тиийбэтэ. Бэрт кыранан сабырыйтарда.

Онон, уолбут биир ыйааһын өрө тахсан киирсиитин үчүгэйинэн сыаналыахха сөп. Ханныгын да иһин, Василий Егоров хаһан баҕарар кыайыыга дьулуурдааҕын, ситиһиигэ улахан баҕалааҕын киһи хайгыыр. Финалга киирсиигэ икки кэнники рауҥҥа көхтөөҕүн көрдөрдө.

Бу чемпионат Олимпиадаҕа сүүмэрдиир күрэхтэһиигэ састаабы талар, бастыҥнары көрөр сыаллааҕа. Онон сылыктаан эттэххэ, саас Европа дойдуларын сүүмэрдиир күрэхтэһиитигэр Россия саҥа чемпиона Расул Салиев кыттара буолуо. Онно кини сатаан путевка ылбат түгэнигэр иккис, бүтэһик сүүмэрдиир күрэхтэһиигэ биһиги Василий Егоровпытын ылыахтарын сөп. Онон эрэлбитин сүтэрбэппит. Манна сыһыары тутан эттэххэ, боксаҕа олимпийскай путевканы ылбыт киһи бэйэтэ Олимпиадаҕа кыттар.

Уопсайынан ылан көрдөххө, Самараҕа ыытыллан түмүктэммит Россия чемпионатыгар тренердэр Артур Пахомов, Владимир Павлов, Николай Егоров салайааччылаах Саха сирин боксердара куһаҕана суохтук кыттыбыттарын бэлиэтиэххэ сөп.

Петр ПАВЛОВ.

Ааптар телевизортан хаартыскаҕа түһэриитэ.

Бокс: Василий Егоров – Россия чемпионатын үрүҥ көмүс призера: 1 комментарий

Добавить комментарий

Ваш e-mail не будет опубликован. Обязательные поля помечены *