Финал: Василий Егоров – Расул Салиев

Дьэ, Самара куоракка сэтинньи 9 күнүттэн саҕаламмыт Россия боксаҕа чемпионата түмүктүүр түһүмэххэ таҕыста. Бүгүн, 16 сэтинньи күнүгэр – кыайыылаахтары быһаарар бүтэһик киирсиилэр, атыннык эттэххэ, финаллар. Син эмиэ былырыын Дьокуускайга ыытыллыбыт чемпионат курдук, Саха сирин боксердарыттан финалга Василий Егоров таҕыста. Уратыта диэн, былырыын 49 кг эбит буоллаҕына, быйыл 52 киилэҕэ киирсэр.

Самара рингэтигэр бу ыйааһыҥҥа барыта отут боксер күөн көрүстэ. Кинилэртэн саамай бастыҥнара, күүстээхтэрэ Василий Егоров уонна Расул Салиев утарсааччыларын кыайталаан, финалга таҕыстылар. Батор Сагалуев, Иван Абрамов курдук биллэр боксердар “илиилэрин сотуннулар”. Бу ыйааһыҥҥа Максим Стахеев (Челябинскай) уонна Вадим Кудряков (Крым) боруонса мэтээллэргэ тигистилэр.

Уолбут утарсааччыта – дагестанец Расул Салиев. Бэҕэһээ, финалга тахсар иһин киирсиигэ кини эдэр талааннаах боксер Максим Стахеевы бары өттүнэн баһайы тутан кыайбыта. Салиев 24 саастаах, спорт маастара, Россия чемпионатын икки төгүллээх призера.

Василий Егоров – Расул Салиев икки ардыларыгар сытыы, тыҥааһыннаах киирсии буолара күүтүллэр. Бөҕө-таҕа көрүҥнээх, күүстээх охсуулаах дагестанеһы утары биһиги түргэн-тарҕан туттуулаах, баай техникалаах, опыттаах боксербут киирсиэҕэ. Киниэхэ ситиһиини эрэ баҕарабыт!

Бүгүн, финаллар биһиги бириэмэбитинэн түүн 11 чаас 40 мүнүүтэттэн саҕаланаллар.

Финаллар:

49 кг: Эдмонд Худоян (Челябинскай) – Артыш Соян (Новосибирск/Тыва)

52 кг: Расул Салиев (Дагестан) – Василий ЕГОРОВ (Саха/Моск.обл.)

57 кг: Бахтовар Назиров (ХМАО-Югра) – Альберт Батыргазиев (ХМАО-Югра)

60 кг: Анатолий Григорян (Краснодар) – Джамал Бадрутдинов (Санкт-Петербург)

63 кг: Габил Мамедов (Оренбург) – Алексей Мазур (Санкт-Петербург)

69 кг: Вахид Аббасов (Самара) – Шахабас Махмудов (Самара/Дагестан)

75 кг: Андрей Ковальчук (ХМАО-Югра) – Максим Коптяков (Крым/ХМАО-Югра)

81 кг: Имам Хатаев (Чечня) – Георгий Кушиташвили (Бурятия/Моск. обл.)

91 кг: Владислав Иванов (Моск. обл.) – Иван Сагайдак (Рязань)

+91 кг: Сергей Калчугин (Тула) – Иван Верясов (Санкт-Петербург).

Санатан эттэххэ, чемпионат бириискэ фондата 10 мөлүйүөн солкуобайга тэҥнэһэр. Ол курдук, чемпионнарга “Лада-Веста” массыыналар күлүүстэрин туттарыахтара. Оттон иккис, үһүс призердар – харчынан бириэмийэлэниэхтэрэ.

Петр ПАВЛОВ.

Финал: Василий Егоров – Расул Салиев: 1 комментарий

Добавить комментарий

Ваш e-mail не будет опубликован. Обязательные поля помечены *