Пресс-конференция: Турнир бириискэ фондата 110 тыһыынча долларга тэҥнэһэр

ССРС, РСФСР, Саха АССР үтүөлээх тренерэ Дмитрий Петрович Коркин кэриэһигэр көҥүл тустууга норуоттар икки ардыларынааҕы XII турниры көрсө олохсуйбут үгэс быһыытынан “Триумф” Спорка бэлэмнэнии киинин актовай саалатыгар пресс-конференция тэрилиннэ.

Тэрээһини СР Спорка уонна физическэй култуураҕа миниистирин эбээһинэһин толорооччу Семен Чердонов иилээн-саҕалаан ыытта. Кини, бүгүн, турнир чэрчитинэн научнай-практическай конференция уонна Д.П. Коркин пааматынньыгар сибэкки дьөрбөтүн ууруу сиэрин-туома ыытыллыбыттарын туһунан иһитиннэрдэ.

Пресс-конференцияҕа Тустуу аан дойдутааҕы түмсүүтүттэн (UWW) биһиги турнирбытыгар техническэй делегат быһыытынан кэлбит Валерий Цыленц (Беларусь), турнир кылаабынай судьуйата, норуоттар икки ардыларынааҕы категориялаах судьуйа Александр Чуенко (Москва) уонна СР спортивнай тустууга федерациятын бастакы вице-президенэ Семен Березин кыттыыны ылан, кылгас иһитиннэриилэри оҥордулар уонна суруналыыстар ыйытыыларыгар хоруйдаатылар.

Кинилэр иһитиннэрбиттэринэн, күнүс 15:00 чаастааҕы туругунан турнирга 25 дойдуттан 150-чэ бөҕөс сайаапката киирбит. Күн-дьыл туруга мөлтөөн, самолет сырыыта бытааран, хамаандалар Дьокуускайга көтөн кэлиилэрэ бытаарбыт. Онон, хамаандалар хойутаан кэлэллэринэн, бүгүн буолуохтаах сэрэбиэй сарсын сарсыарда көһөрүлүннэ. Ол аата, бөҕөстөр бырагыраама быһыытынан сарсыарда 08:00 чаастан ыйааһыннаныыны кытта сэрэбиэйи тута бараллар. Күрэхтэһии биллэриллибитин курдук, сарсыарда 10:00 чаастан саҕаланар. Санатан эттэххэ, бастакы күн – 57, 65, 74, 86, 97 кг ыйааһыннаахтар киирсиэхтэрэ.

Турнирга 25 судьуйа, ол иһигэр 8 омук судьуйалара үлэлиэхтэрэ. Кылаабынай судьуйа – Александр Чуенко (Москва), кылаабынай секретарь – Владимир Торговкин (Дьокуускай).

Турнир бочуоттаах ыалдьыттарынан икки төгүллээх олимпийскай чемпион Сергей Белоглазов, олимпийскай чемпион Тацухиро Йонемицу (Япония), Хотугу Осетия-Алания республикатын Спорка уонна физическэй култуураҕа миниистирин солбуйааччы Валерий Гульчеев, Россия спортивнай тустууга федерациятын толороочу дириэктэрэ Александр Деревянко уо.д.а. буолуохтара.

Турнир бириискэ фондата 110 тыһыынча долларга тэҥнэһэр диэн С.С. Чердонов тоһоҕолоон бэлиэтээтэ. Ол курдук, бастаабыттар – 5, иккистээбиттэр – 3, үһүстээбиттэр – 1 тыһыынча долларынан бириэмийэлэниэхтэрэ. Ону тэҥэ кыайыылааҕы бэлэмнээбит тренердэр 1 тыһ. долларынан бэлиэтэниэхтэрэ.

Азербайджан, Афганистан, Армения, Болгария, Беларусь, Венгрия, Грузия, Иран, Казахстан, Канада, Кытай, Кыргызстан, Латвия, Литва, Куба, Монголия, Македония, Молдова, АХШ, Польша, Румыния, Турция, Узбекистан, Филиппины, Корея, Япония уонна Россия 7 регионныттан, ол иһигэр күүстээхтэринэн биллэр Красноярскай кыраай, Бурятия республиката – Д.П. Коркин аатынан турнирга кытталларын биллэрбиттэрэ.

Пресс-конференцияҕа “Албан” тустууну таптааччылар кулууптарыттан Василий Попов тэрийээччилэртэн Д.П. Коркин турнирын Кавказ бөҕөстөрө тоҕо бойкоттуулларый уонна турнир билиэтин сыаната ыараханын быһыытынан, көрөөччүлэри босхо киллэриэххэ диэн бэйэтин санаатын үллэһиннэ.

Онуоха, пресс-конференция тэрийээччилэрэ, билигин Кавказка тэҥинэн икки улахан күрэхтэһии (Хасавюрка – Межконтинентальнай кубок уонна Грознайга – Кадыров турнира) ыытылларынан Дагестан, Хотугу Осетия уонна Чечня кэлбэтэхтэрин, онон ханнык даҕаны бойкоттааһын суоҕун санаттылар. Уопсайынан, Тустуу аан дойдутааҕы түмсүүтүн (UWW) күрэхтэһиигэ календара наһаа ыгымын, элбэх күрэхтэһии тэҥинэн биир кэмҥэ ыытылларын санаттылар.

Петр ПАВЛОВ.

Ааптар хаартыскаҕа түһэриилэрэ.    

Добавить комментарий

Ваш e-mail не будет опубликован. Обязательные поля помечены *