Бэтэрээн бөҕөстөрбүт аан дойду чемпионатыгар тустуохтара

Алтынньы 8-13 күннэригэр Грузия киин куоратыгар – Тбилисигэ бэтэрээннэр гректии-римнии уонна көҥүл тустууга аан дойду үрдүнэн бастыыр иһин чемпионаттара ыытыллар. Бастаан күрэхтэһиини гректии-римнии тустааччылар саҕалыыллар. Онтон алтынньы 11-13 күннэригэр көҥүл тустуу ыытыллар.

Биһиги республикабытыттан сэттэ бөҕөс кыттарга бэлэмин биллэрдэ. Ол курдук, Лев Афанасьев (Д дивизион, 88 кг), Клим Наумов (С дивизион, 62 кг), Алексей Михайлов (С дивизион, 92 кг), Герасим Дьяконов (Е дивизион, 62 кг), Сергей Ноговицын (Д дивизион, 62 кг), Петр Стручков (Д дивизион, 88 кг), Василий Уйгуров (В дивизион, 70 кг).

Быһааран эттэххэ, бөҕөстөр саастарынан араарыллыбыт биэс бөлөххө хайдыһан кытталлар: «А» (35-40 саастаахтар), «В» (41-45), «С» (46-50), «Д» (51-56), «Е» (56-60).

Ааттаммыт бөҕөстөртөн Герасим Дьяконов, Сергей Ноговицын уонна Василий Уйгуров – маннык күрэхтэһиигэ урукку өттүгэр кыттыбыт үөрүйэхтээхтэр, онтон атыттар аан бастаан сүрэхтэнэллэр.

Билэргит курдук, Сергей Ноговицын уонна Герасим Дьяконов быйыл, Москва уобалаһын Дзержинскэй куоратыгар Россия чемпионнарынан буолбуттара. Кинилэри тэҥэ Василий Шепелев уонна Василий Уйгуров үһүс бириистээх миэстэлэри ылбыттара.

Бу улахан түһүлгэҕэ бэлэмнэнэн, ССРС спордун маастара Сергей Ноговицын Хотугу Осетия-Алания киин куоратыгар Владикавказка, олимпийскай чемпион Махарбек Хадарцев Тустууга академиятыгар анал дьарыктаныыны барда. Онтон кэккэ бөҕөстөрбүт эмиэ Хотугу Осетияҕа, элбэх олимпийскай чемпионнары иитэн таһаарбыт албан аатырбыт Казбек Магометович Дедегкаев аатынан Тустуу саалатыгар дьарыктаныыны бардылар. Манна, Смоленскайга спортивнай кыһаҕа үөрэнэр Сунтаар уолаттара эрчиллэ сылдьаллар эбит.

Санатан эттэххэ, былырыын Македония Скопье куоратыгар буолбут маннык күрэхтэһиигэ Сергей Слепцов, Вадим Данилов – үрүҥ көмүс, Петр Осипов – боруонса мэтээлинэн наҕараадаламмыттара.

Бэтэрээн бөҕөстөрбүтүгэр, Саха сирэ тустуулаах республика буоларын санатан ситиһиилээхтик кытталларыгар, этэргэ дылы, илии тутуурдаах, өттүк харалаах кэлэллэригэр баҕарабыт.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *