Коркин турнирын чэрчитинэн Научнай-практическай конференция ыытыллыа

ССРС, РСФСР, Саха АССР үтүөлээх тренерэ Дмитрий Петрович Коркин кэриэһигэр көҥүл тустууга норуоттар икки ардыларынааҕы XII турнир кэмигэр М.К. Аммосов аатынан Хотугулуу Илиҥҥи федеральнай университет физическэй култуураҕа уонна спорка институтун тэрийиитинэн – «Олимпийский спорт: педагогическое наследие Д.П. Коркина и роль личности тренера в становлении спортсмена» диэн тиэмэҕэ научнай-практическай конференция ыытыллар.

Онно тренердэри бэлэмнээһин систиэмэтигэр саҥа, сонун хайысхалар, оҕо спорда, олимпийскай көрүҥнэргэ спортсменнары бэлэмнээһин, үрдүкү спорка медико-биологическай уонна психологическай көмө тустарынан кэпсэтии, санаа атастаһыыта буолуоҕа. Билиҥҥи туругунан, конференцияҕа 12 киһи дакылаатынан кыттара биллэр. Тэрээһиҥҥэ Физическэй култуура уонна спорт институтун устудьуоннара, магистраннара уонна аспираннара ыҥырылыннылар.

Бу тэрээһиҥҥэ Белоруссия государственнай университетын спорка кафедратын сэбиэдиссэйэ, педагогическай наука доктора, профессор Виктор Антонович Коледа (Минскэй), Лесгафт аатынан национальнай государственнай университет тустууга кафедратын профессора, педагогическай наука доктора Сергей Николаевич Никитин (Санкт Петербург), Россиятааҕы государственнай университет физическэй култуураҕа уонна спорка доцена, педагогическай наука кандидата Денис Викторович Басов (Москва) курдук спортивнай наука сүрүн учуонайдара ыҥырылыннылар.

Норуоттар икки ардыларынааҕы научнай-практическай конференцияны тэҥэ “Олимпийские игры: Проблемы и перспективы современной системы подготовки к Токио 2020” диэн ааттаах “төгүрүк остуол” ыытыллара былааннанар.

Конференция матырыйааллара анал хомуурунньук быһыытынан бэчээттэнэн тахсыаҕа.

Научнай-практическай конференция алтынньы 10 күнүгэр сарсыарда 10:00 чаастан М.К. Аммосов аатынан Хотугулуу-Илиҥҥи федеральнай университет Лабораторнай корпуһун Учуонай сэбиэтин саалатыгар ыытыллар.  

Петр ПАВЛОВ.   

Добавить комментарий

Ваш e-mail не будет опубликован. Обязательные поля помечены *