Коркин турнира: Дьоппуоннар бастакынан кэллилэр

Улуу тренер Дмитрий Петрович Коркин кэриэһигэр көҥүл тустууга норуоттар икки ардыларынааҕы XII турнир саҕаланара бу тирээн кэллэ. Тэрийээччилэр биллэрбиттэринэн, быйылгы турнирга 27 дойду хамаандата кыттыыны ылар.

Бастакынан, бүгүн, алтынньы 7 күнүгэр сарсыарда Япония тустууктара кэллилэр. Эрдэ иһитиннэрбиппит курдук, бөлөҕү олимпийскай чемпион Тацухиро Йонемицу салайар. Тахсар күннээх дойду чиэһин үс тустуук көмүскүөҕэ: 57 киилэҕэ Кадзуя Коянаги, 61 киилэҕэ Юдай Фуджита уонна 65 киилэҕэ Джиро Исо.

Кинилэртэн Фуджита быйыл саас Япония хамаандатын састаабыгар киирэн Дьокуускайга ыытыллыбыт аан дойду Кубогар кыттан турар. Чэ, ол туһунан уонна бу тустууктар туох ситиһиилээхтэрин тустарынан бу иннинэ сайтка иһитиннэрэн турабыт. Онон ону хатылыы барбаппыт. Биир тылынан, дьоппуоннар – икки бастакы ыйааһыҥҥа мэтээл иһин киирсэр кыахтаахтар диэн этиэххэ сөп.

Тренер Тацухиро Йонемицу, кинилэри анаан “Туймаада” аэропорка көрсүбүт турнир тэрийээччилэригэр истиҥ сыһыаннарын иһин махтанна уонна бэйэтин тустууктарын ситиһиилээхтик кыттыахтара диэн эрэннэрдэ.

Делегацияны аэропорка, СР Спорка бэлэмнэнии киинин дириэктэрин бастакы солбуйааччы Михаил Пахомов салайааччылаах бөлөх көрүстэ.

Манна даҕатан эттэххэ, Саха сирэ уонна Япония тустууга федерациялара кэнники сылларга биир санаанан үлэлииллэрин санатар тоҕоостоох. Дьоппуоннар – Саха сиригэр ыытыллар турнирдарга көтүппэккэ кытталлар, оттон биһиги хамаандабыт үс сыл субуруччу, Япония национальнай олимпийскай базатыгар тиийэн, бу дойду бөҕөстөрүн кытта бииргэ үөрэтэр-эрчийэр түмсүүгэ кытынна.

Дьиҥэ, буолаары турар Д.П. Коркин турнирыгар Саха сиригэр бастакынан кэлбит омук хамаандатынан Филиппины бөҕөстөрө буолаллар. Кинилэр өссө атырдьах ыйыгар кэлбиттэрэ уонна биһиги хамаандабытын кытта бииргэ эрчиллиини бардылар.

Петр ПАВЛОВ.     

Добавить комментарий

Ваш e-mail не будет опубликован. Обязательные поля помечены *