Коркин турнира: Ыалларбыт, буряттар күүстээх састаабынан кэлиэхтэрэ

Алтынньы 11-13 күннэригэр Дьокуускайга, “Триумф” Спорка бэлэмнэнии киинигэр улуу тренер Д.П. Коркин кэриэһигэр көҥүл тустууга норуоттар икки ардыларынааҕы XII турнир ыытыллар. Биһиги сайтпытыгар, буолаары турар улахан түһүлгэ кыттыылаахтарын билиһиннэриини салгыыбыт.

Ыалларбыт буряттар бу турнирга күүстээх састаабынан кыттарга былааннаналлар. Тустууну сырдатааччы Болот Цоктоевтан, бу республика Д.П. Коркин турнирыгар ханнык састаабынан кыттарын туһунан ыйыталаспыппар, киһим Бурятия бөҕөстөрүн испииһэгин ыытта. Ол курдук, Туймаада түһүлгэтигэр тахсыахтара:

57 кг: Алдар Бальжинимаев, Жаргал Дамдинов, Алексей Мантатов, Тамир Гармаев

61 кг: Александр Богомоев

65 кг: Булат Батоев, Баяр Цыренов, Даша Шарастепанов

70 кг: Евгений Жербаев, Алексей Боровицкай

74 кг: Буян Цыренов

79 кг: Алексей Сабидаев

86 кг: Булат Дашинимаев

92 кг: Алексей Анищик

125 кг: Балдан Цыжипов, Батор Доржиев.

Көстөрүн курдук, буряттар бары ыйааһыннарга толору састаабынан кытталлар. Манна сыһыары тутан эттэххэ, атын хамаандалар эмиэ толору састаабынан кытталлара эбитэ буоллар дии саныыгын. Испииһэктэн көрдөххө, хамаанда бастыҥ бөҕөстөрүнэн Александр Богомоев, Даша Шарастепанов, Евгений Жербаев буолаллар. Богомоев – Россия үс төгүллээх чемпиона, Европа дойдуларын бастакы оонньуутун кыайыылааҕа. Оттон Баяр Цыренов, Даша Шарастепанов, Евгений Жербаев уонна Балдан Цыжипов – Россия чемпионатын призердара.

Жаргал Дамдинов, Тамир Гармаев, Булат Батоев – Дьокуускайга ыытыллыбыт Р.М. Дмитриев кэриэһигэр эдэрдэргэ норуоттар икки ардыларынааҕы турнир кыайыылаахтарынан буола сылдьыбыттарын, тустууну таптааччылар билэр буолуохтааххыт. Сабаҕалаатахха, инники ахтыллыбыт бөҕөстөртөн Алексей Боровицкай уонна Алексей Сабидаев даҕаны хаалсыбаттар диэххэ сөп. Бэйэлэрин ыйааһыннарыгар мэтээлгэ суоттанар бөҕөстөр.

Бу састааптан Александр Богомоев, Булат Батоев, Евгений Жербаев уонна Балдан Цыжипов – Д.П. Коркин турнирын араас сылларга кыайыылаахтарынан буола сылдьыбыттара.

Дьэ, ити курдук, турнир чугаһаатаҕын ахсын күн-түүн, хамаандалар састааптара чуолкайданан, биллэн иһэр. Биир тылынан эттэххэ, улуу тренер Д.П. Коркин аатынан түһүлгэ састаап өттүнэн күүстээх буолара күүтүллэр.

Петр ПАВЛОВ.  

Добавить комментарий

Ваш e-mail не будет опубликован. Обязательные поля помечены *