Suzuki Alto хаһаайынынан ким буолуой? Билиэт атыылаһарга тиэтэйиҥ!

Улуу тренер Д.П. Коркин кэриэһигэр көҥүл тустууга норуоттар икки ардыларынааҕы XII турнир саҕаланара улам чугаһаан иһэр. Биллэрин курдук, тустуу – “Триумф” Спорка бэлэмнэнии киинигэр алтынньы 10-11-12 күннэригэр буолар.

Турнирга 25 дойду уонна Россия регионнарын күүстээх тустууктара күөн көрсөллөрө күүтүллэр. Александр Богомоев, Евгений Жербаев (Бурятия), Сушил Кумар (Индия), Хаджи Алиев (Азербайджан), Йовлис Бонне (Куба), Чингизхан Эрдоган-Сат Опан (Турция), Анзор Уришев (Красноярскай) уо.д.а. биллиилээх бөҕөстөр кэлиэхтэрэ.

Тустууну таптааччыларга анаан билиэт атыыга тахсыбыта хас да хонно. Санатан эттэххэ, билиэти www.tesserus.com сайтан, эбэтэр үлэ чааһын кэмигэр Дьокуускай куорат кассаларыттан (“Туймаада” ТРК, “Триумф” ЦСП, Кулаковскай аатынан Култуура дьиэтэ, Опера уонна балет театра, Саха академическай театра, Эдэр көрөөччү театра, Саха Арена офиһа) атыылаһыаххытын сөп. Билиэт сыаната миэстэтиттэн көрөн, биир күҥҥэ 500-800 солк. тэҥнэһэр.

Тэрийээччилэр биһиэхэ иһитиннэрбиттэринэн, киирии билиэттэринэн – сыаналаах бириистэр оонньонуохтара. Ордук бааттаах көрөөччү Suzuki Alto массыынаны сүүрдэн барыаҕа. Массыына билигин тустууну таптааччылары көҕүтэрдии, куорат килбэйэр киинигэр – Ленин аатынан болуоссакка көрдөрүүгэ турар.

Ону таһынан атын да сыаналаах бириистэр, сертификаттар оонньонуохтара. Холобурдаан эттэххэ, массыына өрөмүөнүгэр, мебель атыылаһыыга сертификаттар, онтон да атын сыаналаах бириистэр баар буолуохтара.

Улуу тренербитДмитрий Петрович Коркин аатынан сылга биирдэ ыытыллар улахан таһымнаах күрэхтэһиини көтүтүмэҥ! Бэйэбит бөҕөстөрбүтүгэр ситиһиини баҕаран ыалдьыахха!

“Дьулурҕан”.

Добавить комментарий

Ваш e-mail не будет опубликован. Обязательные поля помечены *