Коркин турнира: Билсиҥ, Япония бөҕөстөрө

61 kg Kazuya KOYANAGI (JPN) df. Yowlys BONNE RODRIGUEZ (CUB) by VPO1, 9-6

Буолаары турар улуу тренер Дмитрий Петрович Коркин кэриэһигэр көҥүл тустууга норуоттар икки ардыларынааҕы турнирга Тахсар күннээх дойдуттан үс бөҕөс кыттарга былааннанар. Кинилэри билигин тренер быһыытынан үлэлиир олимпийскай чемпион Тацухиро Йонемицу салайан илдьэ кэлиэҕэ. Ити туһунан биһиэхэ Япония спортивнай тустууга анал сайтын кылаабынай редактора Икуо Хигучи биллэрдэ.

Ол курдук, 57 киилэҕэ Кадзуя Коянаги тустуоҕа. Кини – Япония чемпионатын призера. Былырыын Индияҕа ыытыллыбыт Азия чемпионатыгар 61 кг ыйааһыҥҥа финалга Нурислам Санаевка (Казахстан) хотторон, үрүҥ көмүс мэтээл хаһаайынынан буолбута. Ол кэнниттэн АХШ-ка буолбут аан дойду Кубогар хамаанданан үһүс миэстэни ылары ситиспитэ. Итиэннэ Будапештка, аан дойду чемпионатыгар кыттан, 61 кг сэттис буолбута. Коянаги 2013 сыллаахха кадеттарга гректии-римнии тустууга аан дойду күрэхтэһиитин кыайыылааҕынан буолбуттаах. Онон Коркин турнирыгар мэтээл иһин суоттанар, биир күүстээх кыттааччынан буолара сабаҕаланар.

Иккис биллэр бөҕөһүнэн Юдай Фуджита буолар. Кини 61 киилэҕэ кыттыаҕа. Фуджита – Япония былырыыҥҥы чемпиона. Былырыын Бразилияҕа ыытыллыбыт устудьуоннарга аан дойду чемпионатыгар 61 киилэҕэ тэҥнээҕин булбатаҕа. Быйыл Кытайга буолбут Азия чемпионатыгар иранец Эхсанпур, китаец Лю кэннилэриттэн, индус Аварелыын боруонса мэтээли ылбыта.

Итиэннэ биһиэхэ, Дьокуускайга тэриллибит аан дойду Кубогар төһө да хамаанданан төрдүс миэстэни ыллар, бэйэтин тустууларыгар үчүгэй өйдөбүлү хаалларбыта. Ол курдук, кубинец Боннеҕа хотторбута, россиянин Абакаровы, турок Актаһы, американец Мегалудиһы кыайталаабыта.

Онон Юдай Фуджита 61 кг ыйааһыҥҥа мэтээл иһин киирсэр биир күүстээх кыттааччынан буолар.

Ол оннугар дьоппуоннар үһүс киһилэрэ – Джиро Исо (65 кг) киэҥ эйгэҕэ биллэ илик тустуук. Онон кини туһунан тугу да этэрбит суох. Биир тылынан, кутталлаах утарсааччы диэххэйиҥ. Баҕардар биллибэккэ-көстүбэккэ сылдьан эмискэ тыыллан-хабыллан тахсан, соһуталыан сөп. Этэргэ дылы, Япония дойдута бэйэтэ хайдах курдук кистэлэҥнээҕин кэриэтэ.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *