Үйэлээх бэлиэ кэриэтэ, умнуллубат үтүө өйдөбүнньүк

Педагогическай үлэ, спорт бэтэрээннэрэ, Уус Алдан улууһун бочуоттаах олохтоохторо, кэргэннии Светлана Елисеевна уонна Афанасий Нестерович Максимовтар тустарынан “Максимовы. История жизни учителей” диэн сабыс-саҥа, Новосибирскай куоракка бэчээттэммит, кырааскатын сыта өссө даҕаны ситэ сүтэ илик кинигэ сүрэхтэниитэ буолла.

Кинигэ халыҥ тастаах, элбэх өҥнөөх хаартыскалардаах, этэргэ дылы, билиҥҥи сайдыылаах полиграфия кэмигэр оҥоһуллубут бэчээттэммит буолан, сиэдэрэй көстүүлээх уонна дириҥ ис хоһоонноох диэххэ сөп.

Төһө даҕаны тымныы, туманнаах күн буолбутун үрдүнэн, кинигэ сүрэхтэниигэр сүрүннээн Максимовтар аймахтара, билэр чугас дьоно, үөрэнээччилэрэ – Бороҕонтон, Дүпсүнтэн, Курбуһахтан тиийэ айаннаан кэллилэр. Истиҥ кэпсэтии, санаа атастаһыыта түөрт чааһы быһа буолла. Ол курдук, кэлбит ыалдьыттар Светлана Елисеевна, Афанасий Нестерович тустарынан сүрдээх киэҥник, ис сүрэхтэн истиҥник аҕыннылар, санааларын үллэһиннилэр. Манна даҕатан эттэххэ, бу тэрээһин Афанасий Нестерович төрөөбүт күнүгэр – 88 сылыгар оруобуна сөп түбэһиннэриллэн ыытыллыбыта – бэйэтэ ураты бэлиэ түгэнинэн буолла.

Афанасий Нестеровиһы кытта кэккэ сылларга бииргэ үлэлээбит, биир хамаанда буолан күрэхтэспит спорт уонна милиция бэтэрээнэ Петр Спиридонович Яковлев бэйэтин ахтыытыгар, А.Н. Максимов аатын салгыы үйэтитэр инниттэн, кини саамай сөбүлүүр спордун көрүҥэр – волейболга кини аатынан күрэхтэһиитэ тэрийиэххэ диэн этиитин мустубут дьон бары кэрэхсии иһиттибит уонна бу санаа олоххо киирэригэр баҕардыбыт.

Ити курдук, балтылара, СР доруобуйаҕа харыстабылын туйгуна Альбина Михайловна Максимова; аймаҕа, Учууталлар учууталлара Мария Петровна Егорова; аймахтара Варвара Гаврильевна Прибылых (Дүпсүн), педагогическай үлэ бэтэрээнэ Анатолий Андреевич Никифоров, спорт уонна милиция бэтэрээнэ Николай Петрович Черкашин (Бороҕон); СР норуотун хаһаайыстыбатын үтүөлээх үлэһитэ Иван Петрович Черкашин; спорт бэтэрээнэ Николай Данилович Кронников, уо.д.а. сүрдээх истиҥ ахтыылары оҥордулар.

Мустубут дьон бастатан туран, Максимовтар уоллара – «Ингосстрах» тэрилтэ филиалын отделын начаалынньыга Сергей Афанасьевичка – төрөппүттэрин кэриэстээн, сүгүрүйэн маннык сиэдэрэй кинигэни оҥотторон таһааттарбытыгар махтанныбыт. Бу, дьоҥҥо-сэргэҕэ киэҥник биллэр учууталлар бэйэлэрин оҕолорун иитиитин биир үтүө бэлиэтэ, көстүүтэ диэн, атыттарга холобур буоларын курдук сыаналыахха сөп.

Улууска эрэ буолбакка, республикаҕа киэҥник биллэр кэргэннии учууталлар кырдьык даҕаны бэйэлэрин таптыыр идэлэрин баһылаабыт, элбэх оҕону билии-көрүү суолугар сирдээбит, дьон ытыктабылын ылбыт үтүө-мааны дьон этилэр. Кинилэр туһунан сырдык өйдөбүл биһиги сүрэхпитигэр өрүү тыыннаах! Светлана Елисеевна, Афанасий Нестерович ааттарын санатан бу кинигэ тахсыыта, син биир үйэлээх бэлиэ кэриэтэ – хаһан да умнуллубат үтүө өйдөбүнньүк буолуо.

Петр ПАВЛОВ, кинигэни бэчээккэ бэлэмнээн таһааттарбыт суруналыыс.