Тютрин-Угуев: Олох салҕанар, эрэлбитин сүтэрбэппит

Дьэ, эрэнэ күүппүт киирсиибит бүттэ. Бүгүн биһиги бириэмэбитинэн киэһэ 18:00 чаас иннинэ, http://dzulurgan.ru сайтка эрдэ иһитиннэрбиппит курдук, Сочига, Россия көҥүл тустууга сүүмэрдэммит хамаандатын үөрэтэр-эрчийэр түмсүүтүн кэмигэр, аан дойду чемпионатыгар кыттар састаабы талар хонтуруоллуур хапсыһыылар ыытылыннылар.

Бастаан 74 киилэҕэ аан дойду чемпиона Заурбек Сидаков (Хотугу Осетия) уонна Магомед Курбаналиев (Дагестан) киирсиилэригэр, кыайыыны 2:1 ахсаанынан осетин бөҕөһө ситистэ.

Онтон көбүөргэ олимпийскай чемпион Абдулрашид Садулаев (Дагестан) уонна Владислав Байцаев (Хотугу Осетия) таҕыстылар. Бу, 97 киилэлээхтэр көрсүһүүлэригэр, дагестанец хапсыһыы болдьоҕун иннинэ очукуонан ыраас кыайыыны ситистэ.

Дьэ, онтон 57 киилэҕэ биһиги Арыйааммыт киирдэ. Хомойуох иһин, уолбут 0:10 ахсаанынан хотторон кэбиһэн, биир дойдулаахтарын уонна тренерэ Иван Дмитриеви, өйөбүл буола тиийбит олимпийскай чемпион Павел Пинигины уонна Спорка бэлэмнэнии киинин дириэктэрин солбуйааччы Михаил Пахомовы хомотто.

Хотторуу кэнниттэн туох диэххиний, Польшатааҕы турнирга олох үчүгэй тустар таһымыгар сылдьар курдуга. Ол долгунугар бигэнэн, бу да сырыыга кыайара буолуо диэбиппит. Манна, ордук хоһу саҥарсыбакка, хотторууну хайдах баарынан ыйыстарбытыгар тиийэбит. Бу – спорт, бүгүн хотторуу, сарсын – кыайыы… Ону умнумаҥ.

Специалистар уонна тренердэр ити буолбут түгэни бэйэлэрэ сөптөөхтүк ырытан, ылыллыбыт суолтан, сыалтан-соруктан туораабакка, салгыы дьаныардаахтык дьарыктаналлара күүтүллэр. Тютрин прикидкаҕа киирэн киирсэн, бүгүҥҥү күҥҥэ 57 киилэҕэ ким күүстээҕэ дьэҥкэтик билиннэ. Өскөтүн итинник киирсии буолбатаҕа эбитэ буоллар, эмиэ араас санаалар үөскүө этилэр. Этэргэ дылы, эрэл кыыма бүтэһик уһукка тиийэн умуллар.

Итинник хомолто санааҕа куустара сырыттахпытына, Белоруссияттан үчүгэй сонун көтөн кэллэ. Эмиэ, аан дойду чемпионатыгар ким барарын быһаарсар эппиэттээх тустууга Ньургун Скрябин сүрүн утарсааччытын Георгий Колиевы (65) биир мүнүүтэ иһигэр тилэхтээн түһэрэн баран, устунан утарсааччытын атаҕын кыаһалыы тутан хаста да эргитэн, очукуонан ыраас кыайыыны ситистэ.

Итинэн, буолаары турар аан дойду чемпионатыгар саха тустууга кыһатыттан биэс бөҕөс: Владислав Андреев (Белоруссия, тренерэ Б.Г. Яковлев), Владимир Егоров (Македония, тренерэ Н.Н. Рожин) – 57 кг, Николай Охлопков (Румыния, тренерэ В.Н. Кириллин), Андрей Бекренев (Белоруссия, тренерэ И.Н. Сивцев) – 61 кг уонна Ньургун Скрябин (Белоруссия, тренерэ Г.С. Игнатьев) – 65 кг кытталлара билиннэ.

Олох салҕанар, эрэлбитин сүтэрбэппит.

Петр ПАВЛОВ.

 

Добавить комментарий

Ваш e-mail не будет опубликован. Обязательные поля помечены *