Кыдаала оонньуулара: Муҥутуур кыайыылаах Петр Старостин

Егор Борисов 65 сааһыгар аналлаах икки күннээх “Кыдаала оонньууларын” кыайыылаахтара билиннилэр. Күрэхтэһии былаһын тухары 12 киһиттэн турар суттуур бөлөх, кылаабынай судьуйа Яков Оконешников мөккүөрү таһаарбакка, олус сөптөөхтүк кэтээн көрдө. Комментарийдарынан Иван Оконешников уонна Егор Яковлев үлэлээтилэр.

Оонньуулар бастакы күннэрин түмүгүнэн Петр Старостин, Павел Друзьянов, Семен Аммосов, Борис Строев, Дмитрий Ноев илин-кэлин түһүспүт эбит буоллахтарына, күрэхтэһии иккис күнэ олох атын көрдөрүүлэрдээх буолла. Ол курдук, хапсаҕайга утарылаһааччыларыттан кимтэн да охтубакка 1-кы миэстэни Семен Аммосов (Сылаҥ) ылла, иккис миэстэҕэ соһуччу Андрей Пугачев (Арыылаах) таҕыста, үһүс миэстэ Павел Друзьянов (Сылаҥ) буолла.

60 киилэ ыйааһыннаах сыарҕаны 50 миэтэрэҕэ бириэмэҕэ соһууга Семен Аммосов (бириэмэтэ 14 сөк. 47 дэһ.) барыларын быраҕан эмиэ кыайыылаах таҕыста. Кини кэнниттэн Петр Старостин (бириэмэтэ 15 сөк. 55 дэһ.) уонна үсүһүнэн Соловьев нэһилиэгиттэн Данил Николаев (бириэмэтэ 17 сөк. 60  дэһ.) кэллэ.

110 киилэлээх бэрэбинэни ыраахха илдьиигэ Мугудай бөҕөһө Платон Васильев кыайда, иккис миэстэни Чурапчы нэһилиэгиттэн Григорий Барашков уонна үһүс бочуоттаах миэстэҕэ Төлөй нэһилиэгиттэн Афанасий Сивцев тигистэ.

Күрэхтэһии былаһын тухары уолаттар олус тыҥааһыннаах, чаҕылхай киирсиилэри көрдөрдүлэр. Дьон-сэргэ улууспут чулуу, кыахтаах ыччаттардааҕын илэ харахтарынан көрөн сүрдээҕин астыннылар. Егор Афанасьевич Борисов оонньууну саҕаланыаҕыттан түмүктэниэр диэри олорон көрдө уонна бэйэтин тылыгар, бу оонньуулар өссө да ыытыллалларыгар, саҥаттан-саҥа ааттар тахсалларыгар баҕа санаатын эттэ.

Инньэ гынан, уопсай түмүккэ 300 тыһыынчалаах сертификаты Одьулуун нэһилиэгиттэн Петр Старостин (19 очукуолаах) тутан, оонньуулар муҥутуур кыайыылаахтарын ааттарын ылла. Иккис миэстэни уонна 200 тыһыынча сууммалаах сертификаты Сылаҥ нэһилиэгин бөҕөһө Семен Аммосов (22 очукуолаах) ылла уонна үһүс бириистээх миэстэ уонна 100 тыһыынча сууммалаах сертификат хаһаайынынан Сылаҥ нэһилиэгиттэн Павел Друзьянов буолла.

Семен ЖЕНДРИНСКЭЙ.

Ааптар хаартыскаҕа түһэриилэрэ.

Чурапчы.

Добавить комментарий

Ваш e-mail не будет опубликован. Обязательные поля помечены *