Тютрин-Угуев: Уолбутугар ситиһиини баҕарабыт!


Балаҕан ыйын 19-21 күннэригэр Нурсултаҥҥа (Казахстан) көҥүл тустууга аан дойду чемпионата ыытыллар. Биллэрин курдук, бу түһүлгэ түмүгүнэн олимпийскай ыйааһыннарга алта бастыҥ көрдөрүүлээх тустууктар эһиил Токиоҕа буолар Олимпиадаҕа кыттар быраабы ылыахтара. Онон улахан эппиэтинэстээх, үрдүк күүрүүлээх күрэхтэһии буолаары турар.

Дьэ, бу чемпионаты көрсө Россия көҥүл тустууга хамаандата бастыҥнары талар инниттэн, бу күннэргэ Сочига саҕаламмыт сүүмэрдэммит хамаанда үөрэтэр-эрчийэр түмсүүтүн кэмигэр үс ыйааһыҥҥа кимнээх састаапка киирэллэрин быһаарар хапсыһыыны тэрийэр.
Ол курдук, быһаарыылаах хапсыһыыга көрсүөхтэрэ: Заур Угуев – Арыйаан Тютрин (57 кг), Заурбек Сидаков – Магомед Курбаналиев (74 кг), Абдулрашид Садулаев – Владислав Байцаев (97 кг).
Атын ыйааһыннарга хамаандаҕа киирдилэр: Магомедрасул Идрисов (61 кг), Гаджимурад Рашидов (65 кг), Давид Баев (70 кг), Гаджи Набиев (79 кг), Артур Найфонов (86 кг), Алихан Жабраилов (92 кг), Анзор Хизриев (125 кг).

Инникинээҕи киирсиилэр

Манан сибээстээн, бастатан туран, Тютриннаах Угуев инники киирсиилэрин ылан көрүөҕүҥ. Арыйаан Угуевтыын күрэхтэһии кэмигэр мин билэрбинэн, үстэ көрсөн тураллар.
Бастакы көрсүһүүлэрэ 2013 сыллаахха Агинскайга (Забайкальскай кыраай), эдэрдэргэ Россия күрэхтэһиитигэр буолбута. Онно 50 киилэҕэ бастакы миэстэни ким ыларын быһаарар хапсыһыыга кыайыыны дагестанец ситиспитэ. Манна сыһыары тутан эттэххэ, ити көрдөрүүлэринэн Угуев аан дойду, оттон Тютрин Европа күрэхтэһиилэригэр кыттан, туһааннааҕынан – бастакы уонна үһүс миэстэлэри ылбыттара.

Кинилэр көбүөргэ иккис көрсүһүүлэрэ иллэрээ сыл Красноярскайга, Иван Ярыгин аатынан норуоттар икки ардыларынааҕы Гран-при турнирга буолбута. Тютриннаах Угуев (57 кг) финал чиэппэригэр көрсүбүттэрэ. Онно 8:2 ахсаанынан кыайыыны Угуев ситиспитэ. Салгыы күрэхтэһиигэ кини финалга Артем Гебековы хотон, турнир кыайыылааҕынан буолбута.
Оттон Тютриннаах Угуев үһүс тустуулара 2017 сыллаахха Россия чемпионатыгар буолбута. Онно 3:0 ахсаанынан дагестанец кыайбыта.
Биһиги бөҕөспүт төһө да сабырыйтардар, сырыы ахсын Угуевка дьоһун утарсыыны оҥорон, ити ахсаанын аахсыбакка сыаналаатахха, тэҥ кэриэтэ хапсыһыыга кыранан хоттортообута.

Сочитааҕы көрсүһүү төрүөтэ

Биллэрин курдук, от ыйын саҥатыгар Сочига ыытыллыбыт Россия чемпионатыгар Арыйаан Тютрин судьуйалар сыыһа быһаарыыларынан, финал чиэппэригэр хотторуулааҕынан ааҕыллыбыта. Онно тута биһиги спорка салайааччыларбыт уонна тренердэрбит кырдьыктарын быһаарсан, сыыһаны көннөрөллөрүгэр туруорсубуттара. Бу балаһыанньаҕа Ил Дархан эмиэ кыттыспыта. Ол түмүгэр уолбут Польшаҕа ыытыллар турнирга кыттара ситиһиллибитэ. Кылаабынай тренер Дзамболат Тедеев быһаарыытынан, онно Тютрины тэҥэ 57 киилэҕэ аан дойду чемпиона Заур Угуев уонна Россия саҥа чемпиона Рамиз Гамзатов кыттан, бастыҥнара сүрүн састаапка киириэхтээҕэ. Ол эрээри, Угуев Польшаҕа барбатаҕа. Оттон биһиги бөҕөспүт Гамзатовы сирэй көрсөн 5:1 ахсаанынан кыайан баран, финалга аан дойду чемпионатын былырыыҥҥы үрүҥ көмүс призера Н.Санаевы (Казахстан) хотон, бастакы миэстэни эрэллээхтик ылбыта. Онон, эмиэ Тедеев этиитинэн, Угуевы кытта сбор кэмигэр хонтуруоллуур хапсыһыыга көрсөн, аан дойду чемпионатыгар ким барарын быһаарсыахтаах диэн буолбута.
Дьэ, ол хапсыһыыбыт атырдьах ыйын 16 күнүгэр, бээтинсэҕэ буолар.

Быйылгы тустуулара

Аны билигин Тютриннаах Угуев быйылгы күрэхтэһиилэрин ырытан көрүөххэ. Дагестанец былырыын күһүн аан дойду чемпионатыгар кыайыытын кэнниттэн күрэхтэһиигэ өр кыттыбакка сылдьан баран, быйыл ыам ыйыгар Али Алиев аатынан турнирыгар бастаабыта.Онно азербайджанец Парвиз Ибрагимовы 2:0, китаец Зоу Ваньхаоны 8:4, Эдишерашвилины (Азербайджан) 10:0, кубинец Андреу Ортеганы 9:1 уонна финалга Азамат Тускаевы 3:0 ахсааннарынан кыайталаабыта.

Онтон, былырыыҥҥы сыл түмүгүнэн Россияҕа бэйэтин ыйааһыныгар бастыҥ бөҕөс буоларынан, Угуев – Белоруссияҕа ыытыллар Европа дойдуларын оонньууларыгар кыттар хамаанда састаабыгар ылыллыбыта. Онно кини молдован А.Чиртоаканы 11:0, армян Г.Барсегяны 10:0 ахсааннарынан хотон баран,финалга тахсар иһин киирсиигэ азербайджанец Махир Амираслановка 2:3 хотторбута, үһүс миэстэ иһин тустууга болгар Г.Вангеловы 10:2 кыайбыта. Онон тренердэр эрэллэрин толорботоҕо. Угуев ити хотторуутун, бастатан туран, күрэхтэһиитэ аҕыйаҕынан, онон тустар таһымыттан тахсан хаалбытынан быһаарыахха сөп.

Оттон биһиги бөҕөспүт төттөрүтүн, былырыын күһүҥҥүттэн тренерэ Иван Дмитриев такайыытынан, элбэх араас таһымнаах күрэхтэһиилэргэ кыттан, буста-хатта диэххэ сөп. Аҥаардас быйылгы сылга киирэн баран, сэттэ (!) күрэхтэһиигэ кытынна. Итинтэн түөрдүгэр бастаата, биирдэ иккистээтэ, биирдэ үһүстээтэ.

Онон түмүктээн эттэххэ, Арыйаан Тютрин Польшатааҕы норуоттар икки ардыларынааҕы турнирга чаҕылхай тустууну көрдөрөн, санаата көтөҕүллэ сылдьар. Этэргэ дылы, үчүгэй тустар таһымыгар сылдьар диэххэ наада. Ол таһымын ыһыктыбакка, Угуевтыын ситиһиилээхтик тустарыгар баҕарабыт. Оттон Угуев, Минскэйгэ хотторуута, кини урукку үрдүк таһымыгар киирбэккэ сылдьарын туоһулуур. Онон уолбутугар кыайыыны эрэ баҕарабыт. Саамай кылаабынайа, кинилэр киирсиилэрэ бары өттүнэн (ыйааһын, судьуйалааһын) сиэрдээхтик, чиэһинэйдик барара буоллар…

Петр ПАВЛОВ.

Хаартыскаларга: Арыйаан Тютрин – Заур Угуев Красноярскайга, Иван Ярыгин аатынан турнирга тустуулара. 2017 сыл.

Ааптар түһэриитэ.

Добавить комментарий

Ваш e-mail не будет опубликован. Обязательные поля помечены *