Кыдаала оонньуулара: Маҥнайгы күн түмүгүнэн Петр Старостин инникилээн иһэр


Чурапчы. “Кыдаала оонньууларын” бастакы күнэ “Боотур Уус” стадиоҥҥа саҕаланна. Оонньуу үөрүүлээх чааһыгар улуус баһылыгын эбээһинэһин толорооччу Алексей Егоров, улуус баһылыгын социальнай уонна ис бэлиитикэ боппуруостарыгар солбуйааччы Николай Аммосов, улуус дьаһалтатын успуорка салаатын начаалынньыга Иван Оконешников кыттыыны ыллылар.

Төһө даҕаны халлааммыт хараҥа былытынан бүрүллэн турдар, Чурапчы нэһилиэгин олохтоохторо оҕотуттан-эмэнигэр тиийэ тоҕуоруһа муһуннулар. Уолаттар маҥнай өбүгэ оонньууларын биир саамай илистиилээх көрүҥэр – тутум эргииригэр күрэхтэстилэр. Бу көрүҥҥэ Одьулуун нэһилиэгиттэн 58 эргиири оҥорон Петр Старостин эрэллээхтик бастаата, иккис миэстэҕэ Сылаҥ ааттааҕа Павел Друзьянов 56-та эргийэн кыл мүччү ситтэрдэ, үһүс миэстэҕэ Болугур эрэлэ Дмитрий Ноев 53-тэ эргийэн, убайдарыттан хаалсыбата.

Кыттааччы элбэҕинэн сибээстээн, 400 миэтэрэҕэ сэрэбиэй быһаарыытынан үс бөлөххө арахсан сүүрдүлэр. Уопсай бириэмэ көрдөрүүтүнэн биэтэккэ бастакынан, 53 сөк. 75 дэһ. көрдөрүүлээх Петр Старостин, кини кэнниттэн Чурапчы нэһилиэгин быһыйа Борис Строев (55 сөк. 81 дэһ), үһүс миэстэҕэ соһуччу Сылаҥ бөҕөһө Семен Аммосов (56 сөк. 66 дэһ.) кэллилэр.

Инньэ гынан, сарсыҥҥы күннээх күрэхтэһиибит тыҥааһыннаах буолара сабаҕаланар. Ким сарсын 300 тыһыынча суумманан наҕараадаланар эбитий? Бука барыгытын Маҕаайы алааһыгар эрэнэ күүтэбит!

Семен ЖЕНДРИНСКЭЙ.

Ааптар хаартыскаҕа түһэриилэрэ.

Добавить комментарий

Ваш e-mail не будет опубликован. Обязательные поля помечены *