Медведь турнира: Владислав Андреев чемпион! Ньургун Скрябин – иккис

Минскэй (Беларусь). Албан аатырбыт Александр Медведь бирииһигэр көҥүл тустууга норуоттар икки ардыларынааҕы турнир иккис күнэ.

57 киилэҕэ Владислав Андреев финалга узбек Джахонгирмирза Туробовы 2:1 ахсаанынан кыайан, бастакы миэстэни ылла. Хасыһыыны көбүөр хаһаайынын быһыытынан Андреев баһылаан-көһүлээн ыытта. Өссө икки төгүл киһитин атаҕыттан ылан баран, мүччү тутан кэбистэ. Анарааҥҥыта көҕө суохтук тустарын иһин, иккитэ сэрэтилиннэ. Онон биһиги уолбутугар быраабыла быһыытынан, биирдии очукуо ааҕылынна. Узбек хотторон иһэрин билэр буолан араастаан кииртэлии сатаата да, биһиги бөҕөспүт сатабыллаахтык көмүскэнэн, хапсыһыыны кыайыыга тиэртэ.

Манна сыһыары тутан эттэххэ, узбек бөҕөһүн кытта быйыл Болгарияҕа Дан Колов мемориалыгар биһиги Арыйаан Тютриммыт эмиэ тустан турар. 61 киилэҕэ. Онно иккиэн Артас Санааҕа хотторон баран, “уоскутар” бөлөххө киирсиилэригэр, биһиги бөҕөспүт тулуппатаҕа, очукуонан ыраас кыайыыны ситиспитэ.

Бу да сырыыга, саха тустууга кыһатын иитиллээччитэ Туробовы сабырыйда.

Түгэнинэн туһанан, билигин Владиславка чугас сылдьар, кини кыайыытыгар күүс-көмө, өйөбүл буола сылдьар тус тренерэ – Саха сирин уонна Россия үтүөлээх тренерэ Будимир Григорьевич Яковлевы уонна республика сүүмэрдэммит хамаандатын кылаабынай тренерэ Александр Савельевич Оконешниковы эҕэрдэлиэххэ! Бу кыайыы Владислав Андреев сүрүн хамаанда састаабыгар киирэригэр төһүү күүһүнэн буоларыгар баҕарыаҕыҥ.

Манна даҕатан эттэххэ, Владислав Андреев – А.Медведь турнирын алта төгүллээх кыайыылааҕынан буолла. Ол курдук, кини – 2009, 2011, 2012, 2013, 2015, 2019 сылларга бастаата. Киниэхэ наҕарааданы тус тренерэ, үс төгүллээх олимпийскай чемпион Александр Медведь уонна олимпийскай чемпион Анатолий Белоглазов туттардылар.

65 кг финала: Ньургун Скрябин – Ислам Дудаев (Россия, Чечня) 3:6.

Биһиги уолбут сатаан арыллан тустубата. Киһитэ киниэхэ табыгаһа суох эбит. Эмиэ Андреев курдук, биир түгэҥҥэ киһитин атаҕыттан хабан ылан баран, куоттаран кэбистэ. Итиэннэ атаҕын кыайан көмүскэммэтэ. Дудаев икки төгүл атахтаан, иккилии баалы ылла. Чэ, хайыахпытый, ким күүстээх – ол кыайдаҕа.

Бу ыйааһыҥҥа Ньургун белорустартан үрдүк көрдөрүүлэннэ. Оттон хамаандаҕа сүрүн утарсааччыта Георгий Колиев үһүс миэстэлэннэ. Онон аан дойду чемпионатыгар чопчу ким барара биллибэт диэххэ сөп. Боппуруос аһаҕас хаалла. Сэрэйдэххэ, хонтуруоллуур хапсыһыы оҥороллоро буолуо.

Ханныгын да иһин, уолаттарбыт бэйэлэрин ситиһиилээх тустууларынан ыалдьааччыларын сэргэхситтилэр. Ситиһии сиэттиһэн иһиэхтин!

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *