Ксения Нахова миэстэлэһэригэр эрэммитим

Соторутааҕыта Дьокуускайга дьахталларга сүүс харахтаах дуобакка аан дойду чемпионата ыытыллан түмүктэннэ. Көтүтэ-көтүтэ да буоллар, күрэхтэһиини көрө сатаатым. Бэйэм кыахпынан ким хайдах оонньообутун, оонньоммут партиялары ырыта сатаатым.

Турнир олус тыҥааһыннаахтык барда. Ким чемпион буоларын бүтэһик туур биирдэ быһаарда. Тэҥ баайыылаах оонньооччу элбэх буоллаҕына, күрэхтэһии ити курдук буолааччы. Өссө Латвияттан Зоя Голубева кэлбитэ буоллар, чемпионат өссө интэриэһинэй буолуо этэ.

Чемпионакка дьиҥинэн очко аҥаара да элбэҕи быһаарар буоллаҕына, бу сырыыга коэффициент элбэҕи быһаарда. Оннооҕор рейтинг даҕаны оруолу оонньообото. Дьоннор бары Матрена Ноговицынаҕа эрэнэр этилэр. Ол гынан баран, “ыстаабыккын эрэнимэ, ыйыстыбыккын эрэн” диэн эмиэ баар. Тус бэйэм ааҕан-суоттаан баран, Ксения Нахова үс күүстээхтэргэ киирсиэ диэн эрэммитим.

Чемпионат ортотугар диэри кини олус үчүгэйдик испитэ. Онтон Ногоивцынаҕа хотторон, кэнники миэстэҕэ үтүрүллүбүтэ. Дьиҥнээхтик кыайтарбыта дуу, “алҕас” хотторбута дуу? Дьыала иһэ хараҥа. Олох биир тэҥник оонньообута. Уон биэс партияттан биир эрэ хотторуулаах, коэффициенынан баһыйтаран, ахсыс миэстэ буолла. Бу үчүгэй көрдөрүү. Ноговицынаны кыайбыта эбитэ буоллар, үһүс миэстэни былдьаһара хаалла. Кини сааһа эдэр, онон билигин да эрэл баар. Матрена Ноговицына – А.Идрисоваҕа уонна Н.Шестаковаҕа хотторбута. Оттон Ксения Нахова – Н.Шестакованы кыайбыта, А.Идрисованы кытта тэҥнэспитэ. Матреналаах Наталья сүүс харахтаах дуобакка оонньообуттара ыраатта, уонча сыл буолла. Эбинэр, үүнэр киһиэхэ балайда уһун бириэмэ. Ол да буоллар, көрдөрүүлэрэ сэмэй.

Матрена Ноговицына дьиэтигэр-уотугар долгуйан хаалан, ситэри кыайан оонньообото диэн тойоннуур сыыһа. Үс иһигэр киирбитэ эбитэ буоллар, дьиэтэ-уота көмөлөстө диэх этилэр. Мин көрдөхпүнэ, Ноговицыналаах Шестакова “күннэрэ киэһэрбит” курдук.

Иккиһинэн, биһиги кыргыттарбыт харса суох бэйэ-бэйэлэрин тиниктэстилэр. Онуоха холоотоххо атыттар, холобур бииргэ төрөөбүт Ольга, Дарья Федоровичтар, биир дойдулаахтар Тамара Тансыккужина – Айгуль Идрисова бэйэ-бэйэлэрин кытта эрдэттэн тэҥнэһиигэ суоттаан оонньоотулар. Өскөтүн Дарья хотторбута эбитэ буоллар, үс иһигэр киирбэт этэ.

Үсүһүнэн, биһиэхэ оччо-бачча аан дойду чемпиона баар диэн салгыны сатарытымыахха. Мин билэрбинэн, сүүс харахтаах дуобакка сахалартан ким даҕаны аан дойдуга чемпионнуу илик. Нуучча дуобатыгар урукку Сэбиэскэй Сойуус республикалара эрэ оонньууллар, дуобат бу көрүҥүн аан дойдуга билиммэттэр.

Тамара Тансыккужина опыттаах оонньооччу буолан, эрдэттэн ааҕан-суоттаан, бастаата. Кини бастыырыгар ким даҕаны эрэммэтэҕэ быһыылаах этэ. Кэлэр өттүгэ аан дойду чемпионун аатын эмиэ Тансыккужина, Идрисова, Дарья Федорович былдьаһаллара буолуо. Биһигиттэн кинилэри кытта Ксения Нахова илин-кэлин түсүһүөн сөп. Биллэрии, реклама ситэтэ суох буолан, эбэтэр бу күрэхтэһиигэ суолта биэрбэт буоланнар дуу, көрөөччү суоҕун тэҥэ этэ.

Дьиҥинэн, дуобакка аан дойду чемпионата – быйыл Дьокуускайга буолбут күрэхтэһиилэртэн саамай улахан чемпионат буолар. Манна даҕатан, өссө суолга тохтоон ааһабын. Көҥүл тустууга Россия чемпионатыгар атын сирдэргэ (биһиэхэ холоотоххо) наһаа аҕыйах киһи сылдьар эбит. Ол биричиинэтинэн, көҥүл тустууну сүрүннээн Кавказ бөҕөстөрө баһылаабыттарыттан дуу, хайдах дуу? Эбэтэр интэриэс сүппүт дуу?

Лазарь РОЖИН, спорду сэҥээрээччи.

Дьокуускай.     

Ксения Нахова миэстэлэһэригэр эрэммитим: 2 комментария

  1. Николай

    В 2015 году Ксения Нахова дебютировала на чемпионате Европы по международным шашкам (рапид) и заняла 7 место из 18 участниц Будучи кандидатом в мастера спорта, победила в соревнованиях по международным шашкам на VI Играх «Дети Азии»

  2. Петр Павлов Автор записи

    Николай, спасибо за комментарий!

Добавить комментарий

Ваш e-mail не будет опубликован. Обязательные поля помечены *