Сардаана Авксентьева: “Дьокуускай  спортсменнарынан киэн туттабын!”

Аммаҕа ыытыллан түмүктэммит Саха сирин норуоттарын VII спортивнай оонньууларыгар Дьокуускай куорат хамаандата – аэробикаҕа, баскетболга, мини-футболга, саахымакка, боксаҕа бастакы, көҥүл тустууга, дуобакка, оҕунан уонна буулдьанан ытыыга иккис, остуол тенниһигэр уонна спортиҥҥа үһүс бириистээх миэстэлэргэ тахсан, уопсай түмүккэ маҥнайгы миэстэни эрэллээхтик ылбыта.

Бүгүн, Дьокуускай куорат дьаһалатын дьиэтигэр кыайыылаах хамаанданы чиэстээһин буолла. Көрсүһүү киирии тылыгар Дьокуускай куорат физическэй култуураҕа уонна спорка управлениетын начаалынньыга Константин Бурцев уһуну-киэҥи этэ барбакка, остуолга көрдөрүүгэ туруоруллубут улахан Кубогы ыйа-ыйа түмүк бу баар диэтэ уонна кыайыыны уһансыбыт тренердэргэ, спортсменнарга махталын биллэрдэ. Сыал-сорук ситиһиллибитин эттэ. Итиэннэ Дьокуускай куорат баһылыга Сардаана Авксентьеваҕа уонна кини солбуйааччыта Наталья Степановаҕа хамаанда аатыттан Амматааҕы оонньуулар ымыыларын бэлэх уунна.

Оонньуу кэмигэр хамаанданы кытта бииргэ сылдьыбыт, күүс-көмө, өйөбүл буолбут Сардаана Владимировна:

Мин эһигинэн киэн туттабын. Волейбол хамаандатын хапытаана Светлана Муратова төһө да эчэйии ыллар, оонньууга төннөн, хамаанда иккис миэстэни ылыытыгар дьоһун кылааты киллэрбитин – улахан хорсун быһыынан сыаналыыбын. Биһиги хас биирдии бэйэбит спортсменнарбытыгар ис дууһабытыттан кыһаллан, долгуйан туран ыалдьыбыппыт, кинилэргэ ситиһиилэри баҕарбыппыт. Балаһыанньа быһыытынан, куорат спорка салайааччыта Константин Бурцевтыын сүбэлэһэн баран, кыайыылаахтарга уонна иккис-үһүс миэстэлээхтэргэ харчынан бириэмийэ олохтуурга быһаарбыппыт уонна ону толорорго эрэннэрэбит, – диэтэ.

Куорат баһылыга ити курдук эҕэрдэлээн туран, инникитин маннык хабааннаах спортивнай оонньууларга өссө ситиһиилээхтик кыттарга ыҥырда. Ол инниттэн, хас биирдии спорт көрүҥүн эппиэттээх тренердэрэ киниэхэ суругунан бэйэлэрин санааларын, былааннарын, этиилэрин киллэрэллэригэр эттэ итиэннэ ону биир өйүнэн-санаанан толорорго дьулуһуохпут диэбитэ, дьиҥ-чахчы спорка үлэлэһэр санаалааҕын көрдөрөр.

Дьэ ол кэнниттэн Сардаана Авксентьева, Наталья Степанова, Константин Бурцев – Саха сирин норуоттарын VII спортивнай оонньууларыгар бастакы, иккис, үһүс миэстэлэри ылбыт спортсменнарга, тренердэргэ Бочуотунай грамоталары уонна туһааннааҕынан 40, 30, 20 тыһ. солк. туоһу суруктары үөрүүлээх быһыыга-майгыга туттардылар.

Петр ПАВЛОВ.    

   

Ааптар хаартыскаҕа түһэриитэ.      

 

Добавить комментарий

Ваш e-mail не будет опубликован. Обязательные поля помечены *