Сахаачча аата сарсыҥҥыны саргылыыр

Аммаҕа ыытыллан түмүктэммит Саха сирин норуоттарын VII спортивнай оонньууларын биирдиилээн түгэннэрин билиһиннэриини http://dzulurgan.ru сайтка салгыыбыт. Бу сырыыга оонньуулар култуурунай бырагыраамаларын чэрчитинэн, Сахаачча туһунан саҥа кинигэ сүрэхтэниитин хаартысканан сиэттиһиннэрэн кэпсиэхпит.

Саха Өрөспүүбүлүкэтин физическэй култуураҕа уонна спорка үтүөлээх үлэһитэ, Арассыыйа уонна Саха Өрөспүүбүлүкэтин физическэй култуураҕа уонна спорка туйгуна, Амма улууһун, Соморсун, Мээндиги нэһилиэктэрин бочуоттаах гражданина Михаил Васильевич Алексеев “Сахаачча кэмиттэн сиэттэрэн…” диэн, Николай Семенович Захаров-Сахаачча төрөөбүтэ 70 сылынан уонна Саха сирин норуоттарын VII спортивнай оонньууларын көрсө хомуурунньук кинигэни оҥорон таһаарда.

Бу кинигэ сүрэхтэниитэ, Аммаҕа – Саха сирин Олимпиадатын бастакы күнүгэр, улуустааҕы библиотекаҕа тэрилиннэ. Манна улуус салалтата, Сахаачча талааныгар сүгүрүйээччилэр, спорт бэтэрээннэрэ, спорду сэҥээрээччилэр тоҕуоруһа муһуннулар. Кинилэр Михаил Васильевич спорду сырдатар үлэтин үрдүктүк сыаналаатылар.

Кинигэ сүрэхтэниитигэр Амма улууһун баһылыга Николай Архипов кыттыыны ылла уонна “Сахаачча кэмиттэн сиэттэрэн…” диэн үлэни оҥорон таһаарбыт Михаил Алексеевка, Амма улууһун хаһыатын кылаабынай эрэдээктэрэ Наталья Бубякинаҕа, педагогическай үлэ бэтэрээнэ Михаил Жирковка – Махтал суруктары, өйдөбүнньүк бэлэхтэри туттарда.

Көрсүһүүгэ Саха сирин спордун салайбыт Афанасий Егорович Алексеев, биллиилээх бөҕөс Петр Егорович Попов, тустуу бэтэрээнэ Давид Николаевич Софронов, спорт бэтэрээннэрин сэбиэтин салайааччы Гаврил Гаврильевич Сивцев, спорт бэтэрээннэрэ Дмитрий Николаевич Сыромятников-Кэрэһиннээх, Захар Петрович Федоров, Сунтаартан кэлбит Сахаачча сүгүрүйээччитэ Владимир Николаевич Петров-Бордоҥ Болуодьата кинигэ тула бэйэлэрин санааларын үллэһиннилэр, Сахаачча туһунан ахтан ыллылар уонна ааптар Михаил Васильевич Алексеевка махталларын биллэрдилэр.

Саҥа бэчээттэнэн тахсыбыт кинигэни аны Дьокуускайга, олимпийскай чөмпүйүөн Роман Дмитриев аатынан Олимпийскай эрэллэри бэлэмниир училищеҕа уонна Чурапчыга, Аммаҕа салгыы билиһиннэрии-көрсүһүүлэр буолаллара былааннаммытын истэн киһи астынар. Маннык үлэлэр бастатан туран, биллиилээх дьоммут ааттарын үйэтитиигэ уонна кинилэри эдэр көлүөнэҕэ билиһиннэриигэ, уһуйууга туһуланаллар.

Николай Захаров-Сахаачча мусуой-дьиэтэ аһылынна, саҥа кинигэ бэчээттэнэн таҕыста. Аны, Сахаачча туһунан анал документальнай киинэ оҥоһуллан, силигин ситэн көрөөччү дьүүлүгэр тахсаары сылдьар.

Истиҥ тэрээһини Амма улууһунааҕы библиотека кыраайы үөрэтэр салаатын сүрүннүүр библиотекара Вероника Ивановна Стручкова кыайа тутан, иилээн-саҕалаан ыытта.

Саха саарына Сахаачча

Сардаҥалаах аата

Саха кэскилин

Сарсыҥҥытын саргылыыр.

Саха оҕотун

Кыайыыларга кынаттыыр!

Чулуу тустуу, улуу хапсыһыы

Сайдар саҕахтары алҕыыр! (Саргы Куо).

Петр ПАВЛОВ.

Ааптар хаартыскаҕа түһэриилэрэ.     

Добавить комментарий

Ваш e-mail не будет опубликован. Обязательные поля помечены *