Сахаачча мусуой-дьиэтэ ыҥырар

Амматааҕы оонньуу номох буолбут бөҕөс Николай Захаров-Сахаачча аатынан ыытылынна диэтэххэ омуннааһын буолбата буолуо. Ол курдук, эрдэ иһитиннэрбиппит быһыытынан, Амма сэлиэнньэтигэр, Николай Семенович Захаров – Сахаачча аатынан мусуой-дьиэ үөрүүлээхтик аһылынна.

Бу тэрээһиҥҥэ Амма улууһун баһылыга Николай Архипов, Саха Өрөспүүбүлүкэтин физическэй култуураҕа уонна спорка миниистирэ Иннокентий Григорьев, Амма нэһилиэгин баһылыга Михаил Артемьев, өр сыл Саха сирин спорка кэмитиэтин бэрэссэдээтэлинэн үлэлии сылдьыбыт Афанасий Алексеев, Саха АССР уонна РСФСР үтүөлээх тириэньэрэ Николай Волков, уо.д.а. бэйэлэрин эҕэрдэлэрин тиэртилэр. Мусуой-дьиэ салгыы сайдан, байытыллан, ситиһиилээхтик үлэлииригэр баҕардылар.  

Үөрүүлээх түгэҥҥэ сөп түбэһиннэрэн, наҕараадалар туттарылыннылар. Ол курдук, Сахаачча доҕотторо: спорт бэтэрээнэ Садот Иннокентьевич Стручковка – Амма улууһун бочуоттаах аата, Спиридон Иванович Борисовка – “Амма киэн туттуута” анал бэлиэлэр туттарылыннылар.

Үөрүүлээх бэлиэ түгэҥҥэ Өлүөхүмэттэн кэлэ сылдьар Октябрина Корнилова, кэргэнин, көҥүл тустууга Сахаачча аатынан бастакы өрөспүүбүлүкэтээҕи күрэхтэһиилэр кыайыылаахтара Егор Корнилов наҕараадаларын: чөмпүйүөн-лиэнтэлэрин, жетоннарын – саҥа мусуой-дьиэҕэ диэн анаан, Захаровтар дьиэ кэргэҥҥэ туттарда. Ити курдук, Чурапчытааҕы Д.П. Коркин аатынан мусуой дириэктэрэ Егор Пудов – Сахаачча туһунан элбэх сыаналаах матырыйааллары көрдөрүүгэ туруорда. Сунтаар улууһун баһылыга Анатолий Григорьев – мусуойга Сахаачча мэтириэтин бэлэх уунна.

Үөрүүлээх аһыллыы кэнниттэн, мусуой-дьиэҕэ киирии ааҥҥа туора тардыллыбыт аалай лиэнтэни Амма улууһун баһылыга Николай Архипов, нэһилиэк баһылыга Михаил Артемьев уонна Сахаачча бииргэ төрөөбүт быраата, спорт маастара Иван Захаров быһан, мустубут дьону дьиэҕэ ыҥырдылар.

Мусуой-дьиэҕэ Сахаачча төрөппүттэрин, оҕо сааһын, спорка олоҕун кэрэһилиир сэдэх хаартыскалар, оҕо сылдьан туттубут маллара, тустууга ситиспит мэтээллэрэ, кубоктара, докумуоннара, бириистэрэ саас-сааһынан сааһыланан көрдөрүүгэ туруоруллубуттар.

Дьэ, онон, Николай Захаров оҕо сааһа ааспыт, олорбут дьиэтин оннугар, бииргэ төрөөбүт бырааттарын күүһүнэн саҥа мусуой-дьиэ дьэндэйэн тахсан, тэлгэһэ иккис тыынын ылла. Онуоха Захаровтар дьиэ кэргэн, Сахаачча аатын үйэтитиигэ күүс-көмө, өйөбүл буолбут дьоҥҥо барҕа махталларын тиэртилэр.

Онон, Аммаҕа сырыттаххытына, хайаан да, Николай Захаров аатынан уулусса 22 нүөмэрдээх дьиэтигэр Николай Семенович Захаров – Сахаачча мусуой-дьиэтин быһа ааспаккытыгар, көрөргүтүгэр итиэннэ туох эмэ матырыйаалынан көмөлөһөргүтүгэр ыҥырабыт. 

Петр ПАВЛОВ.

Ааптар хаартыскаҕа түһэриилэрэ. 

Добавить комментарий

Ваш e-mail не будет опубликован. Обязательные поля помечены *