Сергей Ноговицын, Герасим Дьяконов – Россия чемпионнара

Москва уобалаһын Дзержинскэй куоратыгар көҥүл тустууга бэтэрээннэргэ Россия аһаҕас чемпионата ыытыллан түмүктэннэ. Биһиги, http://dzulurgan.ru сайтпытыгар эрдэ иһитиннэрбиппит курдук, бу түһүлгэҕэ Саха сирин бөҕөстөрө эмиэ кытыннылар. Уопсайа чемпионакка дойду 30-ча регионуттан барыта 174 аҕам саастаах бөҕөс күөн көрүстэ. Ол иһигэр Таджикистантан, Казахстантан, Арменияттан уонна Литваттан биирдиилээн бөҕөстөр бааллар.

Түмүккэ, биһиги бөҕөстөрбүтүттэн ССРС спордун маастара Сергей Ноговицын “Д” дивизиоҥҥа (51-55 саастаахтарга) 62 киилэҕэ тэҥнээҕин булбата. Кини утарсааччыларын барыларын лаппа кыайда. Финалга бурят Баяр Очировы 14:4 ахсаанынан ыраастык хотто. Оттон Герасим Дьяконов “Е” дивизиоҥҥа (56-60 саастаахтарга) 62 кг ыйааһыҥҥа чемпионнаата. Опыттаах бөҕөс Николай Григорьев “Ф” дивизиоҥҥа (66-70 саастаахтарга) 88 киилэҕэ иккис миэстэлэннэ. Оттон спорт маастара Василий Шепелев 62 киилэҕэ “Д” дивизиоҥҥа (51-55 саастаахтарга) уонна маастарга кандидат Василий Уйгуров 70 киилэҕэ “В” дивизиоҥҥа (41-45 саастаахтарга) – үһүс буоллулар.

Манна сыһыары тутан эттэххэ, Чурапчыттан төрүттээх күөгэйэр күнүгэр Саха сирин уонна Дальнай Восток зонатын чемпионнара, ССРС Кубогын призера буолбут Сергей Ноговицын бэйэтин 55 сааһын туолар сылыгар бэртээхэй бэлэх оҥоһунна. Кини бэтэрээн-маастардарга Россия чемпионатыгар бу иккис төгүлүн бастааһына. Бэтэрээннэргэ аан дойду чемпионатыгар иккис буола сылдьыбыта.

Аҕам саастаах бөҕөстөрбүт аны алтынньыга Грузияҕа ыытыллыахтаах бэтэрээннэргэ аан дойду чемпионатыгар кыттарга бэлэмнэниэхтэрэ.

Петр ПАВЛОВ.  

Добавить комментарий

Ваш e-mail не будет опубликован. Обязательные поля помечены *