“Сахамедиа “ Амматааҕы оонньууларга анаан анал таһаарыыта

Аммаҕа ыытыллан ааспыт Саха сирин норуоттарын VII спортивнай оонньууларыгар “Сахамедиа” тэрилтэ айар бөлөҕө күннэтэ “Дьулурҕан” диэн аатынан анал таһаарыыны бэчээттээн таһаарда. Барыта үс нүөмэр 300-500 ахсаанынан, A-4 кээмэйгэ түөртүү балаһанан бэчээттэнэн тахсан, спорду таптааччылар тарҕанна.

Анал таһаарыы Аммаҕа бэйэтигэр, “Амма олоҕо” хаһыат редакциятыгар түүннэри бэчээттэнэн, сарсыарда спорду сэҥээрээччилэргэ сылаас бэрэски кэриэтэ тиэрдиллэн истэ. Анал таһаарыыны “Амма олоҕо” хаһыат редакторын солбуйааччы Вера Иванова компьютерга кичэйэн таҥан оҥордо.

Манна сүрүннээн оонньуулар дьоруойдарын хаартыскалара, үөрүүлээх аһыллыыттан хаартысканан-репортаж, спорт көрүҥнэринэн иһитиннэриилэр, экспресс-интервьюлар, биллэриилэр күннэтэ бэчээттэнэн истилэр.

Суруналыыстар: “Якутия” хаһыат корреспондена Георгий Татаринов, Саха информационнай агентство корреспонденнара Ольга Старостина, Иван Евсеев, фотограф Андрей Сорокин, “Саха сирэ” хаһыат корреспондена Айтана Аммосова уонна бу суруйуу ааптара күннэтэ бэйэлэрин матырыйаалларын мунньан, анал таһаарыыга ыытан испиттэрин, интэриэһинэйдэрин талан, сүүмэрдээн, ааҕыллыамтыа буоллун дии санаан, “Дьулурҕаҥҥа” бэчээттээн таһааран истибит. Манна даҕатан эттэххэ, анал таһаарыы бэчээттэнэн тахсыытын сүрүн боппуруостарын Саха сирин норуоттарын VII спортивнай оонньууларын Пресс-киинин салайааччы Прокопий Бубякин сүрүннээтэ.

Биһиги, маннык улахан таһымнаах тэрээһиҥҥэ анал бэчээтинэй бородууксуйаны күннэтэ таһаарыыга бастакы холонуубут. Онон бастакы сүрэхтэнии этэҥҥэ ааста дии саныыбыт. Били, “кутуйах түүлэннэҕинэ “ычча” дииринии”, бастаан-утаа ыарахаттары көрсөн баран, кэлин үөрэнэн, өссө үлэбитин мыына санаатыбыт. Ол курдук, анал таһаарыыны үстэ буолбакка – биэстэ итиэннэ түөрт балаһанан буолбакка – аҕыс балаһанан таһаарбыппыт буоллар, толору арыйан көрдөрүө этибит дэстибит.

Түмүккэ, “Амма олоҕо” хаһыат кылаабынай редактора Наталья Бубякинаҕа, биһиэхэ үлэлиирбитигэр усулуобуйа тэрийбитигэр, күүс-көмө, өйөбүл буолбутугар махтанабыт.

Петр ПАВЛОВ.      

“Саха сирэ” хаһыат спорка аналлаах “Дьулурҕан” сыһыарыытын редактора.

 

Добавить комментарий

Ваш e-mail не будет опубликован. Обязательные поля помечены *