Михаил Иванов: “Миэхэ эрэммит, итэҕэйбит, ыалдьыбыт дьоҥҥо барҕа Махтал!”


Сочига ыытыллыбыт көҥүл тустууга Россия чемпионатын түмүгүнэн “Триумф” Спорка бэлэмнэнии киинигэр пресс-конференция тэрилиннэ. Билэргит курдук, чемпионакка Саха сириттэн 21 бөҕөс кытынна. Ол иһигэр, сүүмэрдээһин быһыытынан, Саха сириттэн – 18, Москва уобалаһыттан – 2 уонна Приволжскай федеральнай уокуруктан – 1 бөҕөс.

Биһиги бөҕөстөрбүтүттэн Михаил Иванов (57 кг) үһүс миэстэҕэ тахсан боруонса мэтээлинэн наҕараадаланна. Судьуйалар сыыһа сууттааһыннарынан Арыйаан Тютрин (57 кг) – сэттис миэстэни ылла. Атын бөҕөстөртөн Петр Константинов (57 кг) уонна Яков Павлов (61 кг) – ахсыс, Айсен Потапов (65 кг) – тохсус буоллулар.

Пресс-конференцияҕа – спорт, тустуу салайааччылара, суруналыыстар, тренердэр, спорт бэтэрээннэрэ, тустууну сэҥээрээччилэр кытыннылар. Бу тэрээһини СР Спорка уонна физическэй култуураҕа миниистирэ Иннокентий Григорьев салайан ыытта. Кини кылгас киирии тылыгар чемпионат туһунан иһитиннэрдэ.

Онтон тылы Саха сирин сүүмэрдэммит хамаандаларын Спорка бэлэмнэниир киинин дириэктэрэ, норуоттар икки ардыларынааҕы кылаастаах спорт маастара Леонид Спиридонов ылан, чемпионат туһунан бэйэтин санаатын билиһиннэрдэ:

Виктор Рассадин сэрэбиэйэ үчүгэй этэ. Ону сатаан туһаммата. Арыйаан Тютрины балыйбатахтара эбитэ буоллар, финалга тахсара хаалла. Оттон Эдуард Григорьев бэйэтин кыаҕын ситэ туһаммата. Кылаабынай тренер эбээһинэһин толорор Александр Оконешников бастакы сүрэхтэниитин ааста. Кинини, эҕэрдэлиибин! Ким дьаныһан туран үлэлиир, ким утарсааччыларыттан куттаммат – ол ситиһиилэнэр. Маныаха Михаил Иванов үчүгэй холобуру көрдөрдө. Биир кэм тохтоло суох үлэлээтэ. Кини төһө да сааһырдар, тахсыылаах тустууну көрдөрдө. Финалга тахсыаҕын, бэрт кыра тиийбэтэ.

Кылаабынай тренер эбээһинэһин толорор Александр Оконешников, хамаанда хайдах бэлэмнэммитин кылгастык кэпсээтэ уонна уолаттар күүс-уох, өй-санаа өттүнэн бэлэмнэниилэригэр өссө күүскэ үлэлэһиэхпит диэтэ. Итиэннэ тустуук киһи быһыытынан, сарсыардааҥҥы ыйааһыннаныы кэнниттэн чөлгө киириигэ икки эрэ чаас бэриллэринэн, инникитин итиннэ болҕомто уурулларыгар диэн бэйэтин тус көрүүтүн эттэ. Салгыы, чугастааҕы кэмҥэ тустууктарбыт “Манньыаттаах” спортивнай базатыгар үөрэтэр-эрчийэр түмсүүгэ кытталларын уонна 8 бөҕөс Японияҕа тиийэн, бу дойду хамаандатын кытта бииргэ бэлэмнэнэллэрин туһунан иһитиннэрдэ.

Михаил Иванов тус тренерэ Александр Анатольевич Софронов, республика спорка уонна тустууга салайааччыларыгар, кини иитиллээччитин Дьокуускайга ыытыллыбыт үөрэтэр-эрчийэр түмсүүгэ кытыннарбыттарын иһин махтанна. Маныаха дириэктэр Леонид Спиридонов күүс-көмө, өйөбүл буолан, Михаилы састаапка киллэрбитин үтүөтүк аҕынна. Итиэннэ Москваҕа биир дойдулаахпыт Дмитрий Захаров өрүү көмөлөһөрүн ыйда.

Онтон тылы бу тэрээһин буруйдааҕар, Россия чемпионатын боруонса призера Михаил Ивановка биэрдилэр.
-Миэхэ эрэммит, ситиһиини баҕарбыт дьоҥҥо барыларыгар истиҥ махтал! Бастатан туран, миигин ыарахан кэммэр күүс-көмө, өйөбүл буолбут тус тренербэр Александр Анатольевичка махтанабын. Спорт миниистирэ Иннокентий Григорьев, миэхэ итэҕэйэн салгыы дьарыктанарбын өйөөбүтүн иһин эмиэ махтанабын. Итиэннэ биир дойдулаахтарбар бүлүүлэргэ, спорт управлениетын начаалынньыга Гаврил Степанович Евсеевкэ, “Строительнай” рынок генеральнай дириэктэрэ, Ил Түмэн депутата Иван Иванович Даниловка – барҕа махталбын тиэрдэбин. Саха сирин көҥүл тустууга сүүмэрдэммит хамаандатын кылаабынай тренерин эбээһинэһин толорооччу Александр Оконешниковы, маннык эппиэттээх дуоһунаска талыллыбытынан эҕэрдэлиибин! Манна диэн эттэххэ, Саха сирин тренердэрин курдук үлэлэригэр бэриниилээх, сүрэхтээх тренердэр ханна да суохтарын бэлиэтиэм этэ.
Бу ситиһии кэнниттэн бары, салгыы хаһан, ханна күрэхтэһэҕин диэн ыйыталлар. Салгыы көстөн иһиэ. Аныгыскы Россия чемпионатыгар өссө үчүгэйдик тустарга былааннанабын. Москваҕа олорорум быһыытынан, онно дьарыктанарым миэхэ үчүгэй. Киин сир, күрэхтэһиилэргэ, сбордарга айанныырга табыгастаах, – диэн, бэйэтин санаатын эттэ.

Михаил Иванов Россия чемпионатын боруонса призера буолан, дойду сүүмэрдэммит хамаандатын састаабыгар киирдэ. Онон кини Россия хамаандатын былаанын быһыытынан күрэхтэһиилэргэ, сбордарга кыттыаҕа, – диэн Леонид Николаевич бу санааҕа эбэн биэрдэ.

Салгыы кини, инникитин судьуйалааһын өттүгэр үлэлэһиэххэ наадатын ыйда. Итиэннэ алтынньы саҥата ыытыллыахтаах улуу тренербит Дмитрий Петрович Коркин кэриэһигэр норуоттар икки ардыларынааҕы турнирга бэлэмнэнии тэрээһинэ саҕаламмытын биллэрдэ.

Көрсүһүүгэ Россия чемпиона, ССРС хамаанданан күрэхтэһиитин кыайыылааҕа, спорт маастара, 90-с сылларга Саха сирин Спорка, ыччакка миниистиринэн үлэлии сылдьыбыт ытыктабыллаах Петр Егорович Попов санаатын үллэһиннэ.

Россия чемпионата, биһиги бөҕөстөрбүт хайдахтарын арыйан көрдөрөр түһүлгэ буолар. Виктор Рассадин хотторуутуттан хомойдум. Оттон Арыйаан Тютрин тыыппалаах. Үрдүк көрдөрүүнү ситиһэр кыахтаах. Өссө Сунтаар ыччата Николай Охлопков тустуутун сөбүлүү көрөбүн. Билигин тренердэр иннилэригэр эдэр талааннары көрдүүр сорук туруохтаах. Спорпутугар, тустуубутугар быйылгыттан саҥа салалта ананан үлэлээн эрэр. Онон өһүргэспэккэ, сирэй-харах анньыспакка, биир санаанан үлэлииргэ ыҥырабын. Бу иннинээҕи кылаабынай тренер үлэтэ үчүгэй этэ. Ону тэйитэн кэбиспэккэ, кини дьоҕурун туһаныахха наада…, – диэн, аҕам саастаах киһи быһыытынан бэйэтин сүбэтин тиэртэ.

Маннык көрсүһүү күн аайы буолбат, онон пресс-конференцияҕа кэлбит тустууну таптааччылар санааларын эмиэ сайа этиннилэр. Ол курдук, урут тренеринэн үлэлии сылдьыбыт спорт маастара Сергей Тартыев тренердэр бэйэлэрин үлэлэригэр айымньылаахтык сыһыаннаһалларыгар баҕарда. Россия чемпионатын кэнниттэн хас биирдии хапсыһыыны видеоҕа көрө олорон ырытыһыыга, итэҕэһи-быһаҕаһы туоратыыга үлэ барыахтааҕын ыйда.

Оттон тустуу биир бэриниилээх ыалдьааччыта Василий Попов, буолан ааспыт чемпионакка тренердэрбит, секунданнарбыт үчүгэйдик үлэлээбиттэрин ыйда. Салайааччыларбыт Виктор Лебедев, Леонид Спиридонов даҕаны олорон хаалбакка, сиэрдээх түмүгү эрэйэн турууласпыттарын хайҕаата. Итини этэн туран, маннык эппиэттээх чемпионаттарга өрүү балыйа, баттыы сатыыр кавказтары утары – буряттар, тывалар, сахалар буолан бииргэ түмсэн, сүбэ мунньах тэрийэн, үлэни ыытарга этии киллэрдэ. Итиэннэ уруккуттан салгыҥҥа ыйанан турар, Москваҕа саха спортсменнарыгар анаан база тэриллэриэхтээҕин санатта.

Маныаха миниистир, ити хайысхаҕа үлэ бара турар диэн хоруйдаата уонна бары күүһү түмэн үлэлээтэхпитинэ, кыайыы кэлиэ диэтэ.

Түмүккэ Иннокентий Григорьев – Россия чемпионатын боруонса призера Михаил Ивановка Грамота, оттон кини тус тренерэ Александр Анатольевич Софроновка – Махтал сурук туттарда. Аны, балаһыанньа быһыытынан, маннык түгэҥҥэ СР спортивнай тустууга федерациятын бириэмийэтэ туттарылларын кэтэһэбит.

Дьэ, пресс-конференция хаамыытын билиһиннэрдэххэ итинник.

Петр ПАВЛОВ.


Ааптар хаартыскаҕа түһэриитэ.

Добавить комментарий

Ваш e-mail не будет опубликован. Обязательные поля помечены *