Дуобакка аан дойду чемпионата: Үс бастакы миэстэни кимнээх ылыахтарай?

Дьокуускайга, 100 харахтаах дуобакка дьахталларга аан дойду 44-c чемпионата ыытылла турар. Бүгүн, чемпионакка сынньалаҥ күнэ буолбутунан итиэннэ үс туур эрэ хаалбытынан, бириистээх миэстэлэри кимнээх ылыахтарай диэн ырытан, билгэлээн көрөргө сананным.

Ол иннинэ, билиҥҥи балаһыанньаны кытта билсиҥ, 12-с туур түмүгүнэн көрдөрүү маннык:

  1. Дарья Федорович (Беларусь) – 16 очукуо
  2. Наталья Садовска (Польша) – 16
  3. Тамара Тансыккужина (Россия) – 15
  4. Айгуль Идрисова (Россия) – 15
  5. Ю Жанг (Кытай) – 15
  6. Ханьцин Чжао (Кытай) – 15
  7. Матрена Ноговицына (Россия) – 14
  8. Ольга Федорович (Беларусь) – 14
  9. Ксения Нахова (Россия) – 14
  10. Полина Петрусева (Беларусь) – 12
  11. Наталья Шестакова (Россия) – 11
  12. Виктория Мотричко (Украина) – 11
  13. Хуслен Энхболд (Монголия) – 10
  14. Хейке Верхул (Нидерланды) – 10
  15. Эрса Негбре (Кот-д, Ивуар) – 4
  16. Аннелайн Якобс (Аруба) – 0.

Аны үс туур хаалла. Мин санаабар, бириистээх миэстэни ылыан сөптөөхтөр номнуо быһаарылыннылар. Чуолаан, таблицаттан көстөрүн курдук, алта бастыҥ көрдөрүүлээхтэртэн, хаалбыт туурга ордук үчүгэйдик оонньообуттар – пьедестал үктэлигэр тахсыахтара.

Оттон 14-түү очукуолаахтарга үһүс бириистээх миэстэҕэ чарапчыланарга бэрт кыра кыах баар. Ону даҕаны, хаалбыт үс туурга – үһүөннэригэр кыайдахтарына уонна алта бастыҥнартан аҥаардара наар хоттордохторуна… Ол гынан баран, биһиги баҕарарбыт курдук буолуо дуо? Саарбахтыыбын. Ол иһин, Дарья Федорович (Беларусь) уонна Наталья Садовска (Польша) пьедесталга оннуларын-олохторун номнуо буллулар дии саныыбын. Дьэ, үһүс миэстэни ким ылыай? Тансыккужина? Ю Жанг? Эбэтэр алларааттан ким эмэ уһулу ойон тахсар дуу?

Аны билигин инники оонньууларга ким-кими кытта киирсэрин ырытан көрүөххэ. Дарья Федорович – Ханьцины (Кытай), Якобсы (Аруба), Садовсканы (Польша) кытта көрсөр. Манна, мин санаабар, кини – Арубаны кыайыаҕа, Кытайы уонна Польшаны кытта тэҥнэһиэн сөп. Маннык көрдөрүүгэ бэйэтэ да астынар буолуохтаах. Чэ, көрүөхпүт.

Оттон Наталья Садовска – Нахованы (Россия), О.Федоровиһы (Беларусь), Д.Федоровиһы (Беларусь) кытта оонньууларын эйэ дэмнээхтик түмүктээтэҕинэ даҕаны, бириискэ син биир олорор.

Бээрэ, аны Тамара Тансыккужина балаһыанньатын көрүөххэ. Кини – Энхболду (Монголия), Мотричкону (Украина) кыайдаҕына уонна Ю Жангы (Кытай) кытта тэҥнэстэҕинэ, балаһыанньатын лаппа тупсарар кыахтаах. Сылыктааһыным оннук.

Баҕар, хаалбыт туурдарга Айгуль Идрисова тыыллан-хабыллан тахсыа. Ким да билбэт. Кини Негбретааҕар (Кот-д, Ивуар) уонна Энхболдтааҕар (Монголия) оонньуур таһымынан үрдүк кэрдиискэ турар. Оттон Ю Жангы (Кытай) кытта тэҥнэһиэн сөп.

Оттон кытайдар? Ю Жанг утарсааччылара күүстээхтэр – Шестакова, Тансыккужина, Идрисова. Бу оонньуулар хайдах түмүктэниэхтэрин киһи этиэн куттанар. Тоҕо диэтэргит, тэҥ кылаастаах спортсменнар. Ким дьолуота, кыайыыга дьулуура, тулуура билиэҕэ.

Саха сиригэр олорбут, үөрэммит Ханьцин Чжао – Негбрены (Кот-д, Ивуар) уонна Петрусеваны (Беларусь) кыайыан сөп. Оттон Дарья Федоровичтыын (Беларусь) арай тэҥнэстэҕинэ, үһүс миэстэҕэ тахсар балаһыанньата лаппа тупсуон сөп курдук көрөбүн.

Оттон бэйэбит кыргыттарбыт кимнээҕи кытта оонньуулларын билиһиннэрдэххэ, 13-c туурга Наталья Нахова – Садовсканы, Матрена Ноговицына – Петрусеваны, Наталья Шестакова – Ю Жангы кытта киирсиэхтэрэ.

Оттон 14-c туурга Нахова – Верхул, Шестакова – Мотричко, Ноговицына – Негбре оонньууллар.

Бүтэһик быһаарыылаах 15-c туурга Нахова – О.Федорович, Ноговицына – Энхболд уонна Шестакова – Верхул киирсэллэр.

Дьэ, сэмээр ырытан көрдөххө, Матрена Ноговицына балаһыанньата үчүгэй курдук. Чэ, тугу туттуна барыахпыный, кистээбэккэ малтаччы эттэххэ, Матрена ити үс утарсааччытын теоритически кыайар кыахтаах. Ону дуоска быһаарыаҕа.

Эдэр дуобатчыт Ксения Нахова уонна быһымах оонньуулаах Наталья Шестакова дьолуолара билиэҕэ. Оттон эһиги, ааҕааччылар, дуобаты таптааччылар туох дии саныыгытый? Күрэхтэһии буолан баран, туораттан ньимийэн баран, кэтээн көрө сылдьыбакка, кэм интэриэстээх, мөккүөрдээх, ырытыһыылаах, уксуулаах буолара ордук.

Петр ПАВЛОВ.     

Дуобакка аан дойду чемпионата: Үс бастакы миэстэни кимнээх ылыахтарай?: 2 комментария

    1. Петр Павлов Автор записи

      Көрүөхпүт. Итинник да буолуон сөп.

Добавить комментарий

Ваш e-mail не будет опубликован. Обязательные поля помечены *