Айсен Николаев тустууктарга ситиһиини баҕарда

Бүгүн киэһэ, Саха сирин баһылыга, республика спортивнай тустууга федерациятын президенэ Айсен Николаев – Саха сирин көҥүл тустууга сүүмэрдэммит хамаандатын кытта көрүстэ. Көрсүһүү “Триумф” Спорка бэлэмнэнии киинигэр буолла.

Көрсүһүүгэ СӨ Спорка, физическэй култуураҕа миниистирэ Иннокентий Григорьев, кини бастакы солбуйааччыта Семен Чердонов, СӨ спортивнай тустууга федерациятын бастакы вице-президенэ Семен Березин, олимпийскай чемпион, Ил Түмэн депутата Павел Пинигин, СӨ вице-президенэ, “Саханефтегазсбыт” тэрилтэ генеральнай дириэктэрэ Виктор Лебедев, СӨ сүүмэрдэммит хамаандаларын бэлэмниир спортивнай киин дириэктэрэ Леонид Спиридонов, кини бастакы солбуйааччыта Михаил Пахомов, олимпийскай призер, спорт үтүөлээх маастара Александр Иванов, Регионнааҕы спортивнай бэлэмнэнии киинин дириэктэрэ Александр Андреев, Олимпийскай эрэл училищетын дириэктэрэ Алексей Филиппов уонна СӨ спортивнай тустууга федерациятын толорооччу дириэктэрэ Николай Николаев кыттыыны ылыллар.

Республика көҥүл тустууга сүүмэрдэммит хамаандатын кылаабынай тренерин эбээһинэһин толорооччу Александр Оконешников, хамаанда Россия чемпионатыгар бэлэмнэниитин туһунан кылгас иһитиннэрии оҥордо.

Үөрэтэр-эрчийэр түмсүү бэс ыйын 12 күнүттэн саҕаламмыта. От ыйын саҥатыгар Сочига ыытыллар Россия чемпионатыгар биһиги республикабыттыттан барыта 24 бөҕөс кыттар, ол иһигэр, Саха сириттэн 19 бөҕөс кыттыаҕа. Эчэйии эҥин суох. Хамаанданы кытта быраастар, психологтар үлэлэһэллэр. Бэс ыйын 25 күнүгэр манна, “Триумфка” хонтуруоллуур хапсыһыылар ыытыллыахтара. Хамаанда бастыҥнара Арыйан Тютрин уонна Виктор Рассадин билигин тренер Иван Дмитриев баһылыктаах Россия сүүмэрдэммит хамаандатын кытта Сочига бэлэмнэнэ сылдьаллар. Хамаанда от ыйын 3 күнүгэр чемпионакка айанныыр. Уолаттар кыах баарынан тустарга бэлэмнэр.

Ол кэнниттэн тылы Айсен Сергеевич Николаев ылла:

Эһиги чемпион буолар кыахтааххыт, бэйэ күүһүгэр эрэниэхтээххит уонна көбүөргэ кыайа эрэ тахсыахтааххыт. Санаа күүһэ наада. Ол тренердэртэн, психологтартан тутулуктаах. Бастакы уочарат бэйэҕит тускутугар тустаҕыт. Эһиги оннугутугар ким да кыттыбат. Онон кимиэхэ да бэринимэҥ. Кимтэн да куттаммакка, иннигит диэки туруоруммут сыалгытын ситиһэргэ дьулуһуҥ, – диэн, бэйэтин баҕа санаатын тиэртэ.

Итиэннэ үөрүүлээх быһыыга-майгыга хамаанда тустууктарыгар, тренердэргэ уонна медицинскэй-психологическай персоналга спортивнай экипировкалаах суумкалары туттартаата.

Хамаанда тустууктарын аатыттан устудьуоннарга Россия уонна аан дойду чемпиона Эдуард Григорьев тыл эттэ. Кини: “Республика баһылыга, тустуу федерациятын салайааччы Айсен Сергеевич Николаев хамаандаҕа усулуобуйа тэрийиитин иһин улаханнык махтанабыт! Сүктэриллибит сүдү итэҕэли түһэн биэрбэт туһугар дьулуһуохпут”, – диэтэ.

Көрсүһүү, уопсай хаартыскаҕа түһүүнэн түмүктэннэ.

 Петр ПАВЛОВ.

Ааптар хаартыскаҕа түһэриитэ.   

Добавить комментарий

Ваш e-mail не будет опубликован. Обязательные поля помечены *