Дуобакка аан дойду чемпионата: Лидердэр иккиэлэстилэр

Дьокуускай (Россия). Сүүс харахтаах дуобакка дьахталларга аан дойду чемпионатыгар бүгүн, уон иккис туур ыытылынна. Чемпионат түмүктүүр түһүмэххэ таҕыста. Бастыҥнар биллиэх курдук буоллулар.

Бастатан туран, бэйэбит кыргыттарбыт оонньууларын билиһиннэрдэххэ, Ксения Нахова – Виктория Мотричкону (Украина) кытта тэҥнэстэ. Матрена Ноговицына – хаһыс да туурун инники сылдьар Дарья Федоровиһы (Беларусь) кытта оонньуута эмиэ тэҥнэһиинэн түмүктэннэ. Ол оннугар, Наталья Шестакова – Хуслен Энхболдга (Монголия) хотторуута, бу туур соһуччу көрдөрүүтэ буолла дии саныыбын.

Аан дойду икки төгүллээх чемпиона Наталья Садовска (Польша) – ыраах Аруба дойдуттуттан кэлбит Аннелайн Якобсу кыайара сэрэйиллэр этэ. Якобс, хомойуох иһин, бу туурга диэри биир да кыайыыта суох. Наар хотторон иһэр. Бу кыайыытынан, Садовска – Дарья Федоровиһы кытта очукуота тэҥнэстэ. Онон кинилэр билиҥҥитэ инники иһэллэр.

Уон иккис туур түмүгэ:

Ксения Нахова (Россия) – Виктория Мотричко (Украина) 1:1

Хейке Верхул (Нидерланды) – Ю Жанг (Кытай) 1:1

Наталья Шестакова (Россия) – Хуслен Энхболд (Монголия) 0:2

Тамара Тансыккужина (Россия) – Эрса Негбре (Кот-Д, Ивуар) 2:0

Айгуль Идрисова (Россия) – Полина Петрусева (Беларусь) 2:0

Матрена Ноговицына (Россия) – Дарья Федорович (Беларусь) 1:1

Ханьцин Чжао (Кытай) – Ольга Федорович (Беларусь) 1:1

Аннелайн Якобс (Аруба) – Наталья Садовска (Польша) 0:2.

Онон уон иккис туур кэнниттэн балаһыанньа маннык:

Дарья Федорович (Беларусь) уонна Наталья Садовска (Польша) 16-лыы очукуолаах бастаан иһэллэр. Сэрэйдэххэ, кинилэр бириистээх миэстэҕэ бигэтик олордулар диэн билгэлиэххэ сөп. Санатан эттэххэ, чемпионат кыттыылаахтара, ылбыт миэстэлэринэн – 20 тыһыынча евро харчыны бириис быһыытынан үллэстиэхтээхтэр.

Кинилэр кэннилэриттэн россияннар Тамара Тансыккужина, Айгуль Идрисова уонна китаянкалар Ю Жанг уонна Ханьцин Чжао 15-тии очукуолаах саппай уопсан иһэллэр. Бука, бу бөлөхтөн биир бастыҥнара үс иһигэр олороро буолуо.

Салгыы 14-түү очукуолаах Матрена Ноговицына, Ксения Нахова (иккиэн – Россияттан) уонна Ольга Федорович (Беларусь) иһэллэр, кинилэргэ, үһүс бириистээх миэстэҕэ тахсарга бэрт кыра кыахтар кыламныыллар.

Оттон Полина Петрусева (Беларусь) – 12, Наталья Шестакова (Россия), Виктория Мотричко (Украина) – 11-дии, Хуслен Энхболд (Монголия), Хейке Верхул (Нидерланды) – 10-нуу , Эрса Негбре (Кот-д, Ивуар) – 4 очукуолаахтар, Аннелайн Якобс (Аруба) – 0.

Сарсын, бэс ыйын күнүгэр, чемпионат бырагырааматын быһыытынан – сынньалаҥ.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *