“Бүлүү Боотур” кыайыылааҕар – “Хантер” УАЗ!


Эрдэ иһитиннэрбиппит курдук, бэс ыйын 28-29 күннэригэр Бүлүү куорат төрүттэммитэ 385 сыллаах үбүлүөйүгэр анаан АЛРОСА акционернай хампаанньа генеральнай дириэктэрин солбуйааччы Юрий Константинович Окоемов бирииһигэр саха многоборьетыгар “Бүлүү Боотур” күрэхтэһии тэриллэр.

Балаһыанньаҕа олоҕуран Ленскэйтэн, Мирнэйтэн, Ньурбаттан, Үөһээ Бүлүүттэн, Эдьигээнтэн, Кэбээйиттэн (алмаастаах улуустартан) биирдии боотур анал ыҥырыы быһыытынан кэлэн күрэс былдьаһыаҕа. Оттон Бүлүүттэн хас даҕаны боотур кыттарга бэлэмнэнэ сылдьар. Билиҥҥи туругунан барыллааһын сайаапканан эттэххэ, бу күрэхтэһиигэ Үөһээ Бүлүүттэн Любомир Николаев, Ленскэйтэн Иннокентий Федоров, Ньурбаттан Владимир Федоров, Эдьигээнтэн Николай Лесовой, Мирнэйтэн Владимир Михайлов, оттон Бүлүүттэн Николай Николаев, Юрий Протопопов, Валерий Нифонов уо.д.а. кытталларын биллэрдилэр. Күрэхтэһии хаамыытын дьоҥҥо-сэргэҕэ биһирэбили ылбыт комментатор Александр Васильев – Көрдүгэн кэпсиэҕэ-ипсиэҕэ.

Бырагыраама быһыытынан бастакы күн “Үс төгүл сэттэ”, хапсаҕай, мас тардыһыы, “Өһөс торбос” күрэхтэһиилэр ыытыллыахтара. Бу көрүҥнэр түмүктэринэн 12 бастыҥ көрдөрүүлээхтэр талыллан, күрэхтэһии иккис күнүгэр – сыарҕа соһуутугар, сүүрүк кыыһы сырсыыга уонна таас көтөҕүүтүгэр күүстэрин холоһуохтара.
“Бүлүү Боотур” күрэхтэһии муҥутуур кыайыылааҕа “Хантер” УАЗ массыына хаһаайынынан буолуоҕа. Оттон иккис-үһүс миэстэлэммит боотурдар туһааннааҕынан 100 уонна 75 тыһ. солк. харчынан бириэмийэлэниэхтэрэ. Ити курдук, төрдүс миэстэлээх 30, бэһис буолбут 20 тыһ. солк. наҕараадаланыахтара. Ону тэҥэ, көрөөччүлэр биһирэбиллэрин ылбыт боотур 10 тыһ. солк. бэлиэтэниэҕэ, – диэн быһааран биэрдэ.

Бүлүү улууһун физическэй култуураҕа уонна спорка кэмитиэтин бэрэссэдээтэлэ Гаврил Евсеев иһитиннэрбитинэн, бэс ыйын 28 күнүгэр – күрэхтэһии бастакы күнүгэр биллиилээх атах оонньооччу Василий Николаев кэриэһигэр “Үс төгүл сэттэ” күрэхтэһии интэриэһинэй буолар чинчилээх. Былырыыҥҥы бу түһүмэх кыайыылааҕа 54 миэтэрэни аһарбыт. Бу сырыыга дьэ, ону куоһараллар дуу, суох дуу? Гаврил Степанович эппитинэн, күрэхтэһии бу түһүмэҕин кыайыылааҕа – харчынан бириис тутуоҕа. Манна даҕатан эттэххэ, күрэхтэһии чэрчитинэн биллиилээх суруналыыс Владислав Коротов бэлэмнээн оҥорбут “Жизнь – как полет в прыжке” диэн Василий Николаев туһунан саҥа кинигэтин сүрэхтэниитэ ыытыллыа. Итиэннэ кини олорбут дьиэтигэр мемориальнай дуоска туруоруллара былааннанар. Санатан эттэххэ, РСФСР уонна Саха АССР атах оонньууларыгар уонна хотугу многоборьеҕа спордун маастара Василий Николаев сырдык аата былырыын Бүлүүтээҕи Оҕо спортивнай оскуолатыгар иҥэриллибитэ.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *