Ньургуйаана Азарова: “Ханьцин бэлэмэ, настройката үчүгэй”

Международнай гроссмейстер Ханьцин Чжао (хаҥас)

Бу иннинэ суруйбуппут курдук, китаянка Ханьцин Чжао – саха дуобакка оскуолатын иитиллээччитэ. Манна, Дьокуускайга, биһиги университеппытыгар үөрэнэ сылдьан дуобатынан үлүһүйэн, гроссмейстерга тиийэ үүммүтэ. Онон, этэргэ дылы, бэйэтин дьиэтигэр-уотугар сылдьар курдук сананар буолуохтаах. Специалистар этэллэринэн, Чжао бу чемпионакка “тыас таһаарыан сөптөөх”.

Кини туһунан – дуобакка эдэрдэргэ аан дойду күрэхтэһиитин икки төгүллээх кыайыылааҕа, Россия былырыыҥҥы чемпиона, быйылгы боруонса призера, ХИФУ физкультурнай магистратуратын бүтэрбит международнай маастар Ньургуйаана Азарова dzulurgan.ru сайтка маннык билиһиннэрэр.

-Ханьчин Чжао 2012 сыллаахха эдэрдэргэ аан дойду күрэхтэһиитигэр кыайыылааҕынан буолбута. Ол кэнниттэн Саха сиригэр үөрэнэ кэлбитэ. Биир сыл тылы үөрэппитэ уонна 2014 сыллаахха М.К. Аммосов аатынан Хотугулуу-Илиҥҥи федеральнай университет иһинэн физкультурнай институкка киирбитэ. Итиннэ биһиги кинилиин гроссмейстер Николай Николаевич Гермогенов салалтатынан бииргэ дьарыктаммыппыт. Онтон 2018 сыллаахха үөрэҕин бүтэрэн, дойдулаабыта.
2017 cыллаахха Азия чемпионката буолан, кытайдартан дуобакка бастакы международнай гроссмейстер буолбута.

Ньургуйаана Азарова. Ханьцинныын онлайн-матч, 2018 сыл.

Биһиги Ханьцинныын бастакы матчпытын 2016 сыллаахха оонньообуппут. Бастаан кини төрөөбүт дойдутугар Уханьҥа (Хубэй провинцията) тиийэн киирсибиппит. Уопсайа биэстэ оонньообуппут. Ити Уханьҥа үстэ киирсибиппит. Матч 4:2 ахсаанынан, мин туспар түмүктэммитэ.

Саха сиригэр кэлэн, аны физкультурнай институкка ХИФУ ректорын кубогар киирсибиппит. Онно кини кыайбыта, ахсааммыт 4:4 буолбута. Бүтэһик быһаарыылаах оонньуубутун, мин үөрэммит инженернэй-техническэй институппар оонньообуппут. Онно тыҥааһыннаах киирсиигэ мин хоппутум.
Ол кэннэ икки сыл ааспытын кэннэ, былырыын сэтинньи ыйга Ханьцин, онлайн-матчка киирсиэххэ диэн, миигин тастан оонньууга ыҥырбыта. Мин итинник, дистанционнай матчка бастакыбын оонньообутум. Икки партия оонньоон, иккиэннэригэр кыайбытым.
Мин санаабар, манна аан дойду чемпионатыгар Ханьцин үчүгэйдик оонньуу сылдьар. Бэлэмэ, настройката үчүгэй.

-Ньургуйаана, көрдөрүүбүн ылынан, ыйытыыларга хоруйдаабыккар махтал!

Петр ПАВЛОВ.

Ыспыраапка: Чжао Ханьцин – 1994 сыллаахха муус устар 6 күнүгэр Хубэй провинциятын Ухань куоратыгар төрөөбүтэ. Сэттэ сааһыттан саахыматынан дьарыктаммыта, онтон 2007 сыллаахха сүүс харахтаах дуобакка көспүтэ. 2017 сыллаахха классикаҕа уонна блицкэ Азия чемпиона буолбута. 2015 сыллаахха блицкэ уонна түргэн дуобакка Азия чемпиона. 2012 сыллаахха дьахталларга Азия чемпиона. 2013 сыллааҕы аан дойду чемпионатын кыттыылааҕа, 12-с миэстэ. 2015 сыллааҕы аан дойду чемпионатын кыттыылааҕа, 7-с миэстэ. 2012 сыллаахха кыргыттарга аан дойду күрэхтэһиитин кыайыылааҕа. Дуобакка Кытай сэттэ төгүллээх чемпиона. Международнай гроссмейстер. ФМЖД рейтинэ – 2145. Тренерэ – Алексей Чижов.

Добавить комментарий

Ваш e-mail не будет опубликован. Обязательные поля помечены *