Николай Кычкин-II: “Хаалбыт туурдартан кыайыыны кэтэһэбит “


Сүүс харахтаах дуобакка дьахталларга аан дойду чемпионатын кэмигэр, биһиги үс кыттааччыбыт тренердэрэ, улуу тренер Д.П. Коркин аатынан Чурапчытааҕы спортивнай интернат-оскуола дуобакка ыстаарсай тренерэ Николай Николаевич Кычкины көрсөн, аҕыйах ыйытыыга хоруйдууругар көрдөстүм.

-Николай Николаевич, чемпионаппыт дьэ, ортолоото. Кыргыттарбыт бу туурга диэри кыттыыларын эн тренер киһи быһыытынан сэмээр туох диэн сыаналыыргын билээри гынабын.
-Билигин да күрэхтэһии аҥаара баар, онон киһи улаханы саҥарбат. Сорох күрэхтэһиилэргэ 9 туур эрэ ыытыллар, швейцарскай систиэмэнэн. Онон билигин 9 туур хаалбытыгар, элбэх очукуону эмиэ ылыахха сөп. Дьахталлар эмоциялара арааһынай буолар. Билиҥҥи туругунан Ольга Федорович (Беларусь) үчүгэйдик оонньоон иһэр. Уон очукуолаах. Тамара Тансыккужина (Россия) уонна Дарья Федорович (Беларусь) эмиэ 10-нуу очукуолаахтар. Онтон холобура, биэтэги ылан көрдөххө, бу үс киһиттэн Тансыккужина бүтэһик үс партията чэпчэки соҕус. Ол гынан баран, этэрим курдук, арааһынай буолуон сөп. Сороҕор, бүтэһик иһэр киһи – бастаан иһэр киһини кыайан кэбиһээччи.
Онтон бэйэбит кыргыттарбыт туһунан эттэххэ, Ксюша Нахова +1 оонньоон иһэр. Ол аата, биир хотторуулаах, икки кыайыылаах. Онтон Наташалаах Рена 50-нуу бырыһыан оонньоон иһэллэр. Ол эрээри, Ксюшаҕа бүтэһик биэс киһитигэр – күүстээх утарсааччылар түбэһэллэр. Оттон Матренаны ылан көрдөххө, кэлиҥҥи туурдарга арыый чэпчэки дьону кытта оонньуур. Онон арааһынай буолуон сөп. Холобур, олору барыларын кыайан кэбиһиэн эмиэ сөп. Ол курдук, Наташаҕа буккуурдаах, наһаа чэпчэкитэ суох. Ол иһин, Матрена хаалбыт туурдарга арыый элбэх очукуону ыларга улахан шанстаах. Биһиги сылыктааһыммыт итинник.

-Бэҕэһээ чемпионакка икки туур оонньонно. Ити оонньооччуларга уонна тэрийээччилэргэ ыгым соҕус. Онон сибээстээн маннык ыйытыылаахпын, чемпионат кэмигэр спортсменнар күннээҕи режимнэрэ хайдаҕый?
-Уопсайа 12 күн иһигэр 15 тууру оонньууллар. Ол аата, үс күн хайаан да иккилии партияны оонньуохтаахтар. Биир күн сынньаныахтаахтар, онон түөрт күн иккилии партияны оонньуур буолан хааллылар. Быраабыла быһыытынан, бүтэһик икки туурга хайаан да биирдии партия буолуохтаах. Ылан көрдөххө, аан дойду чемпионатыгар эрэ 15 туур оонньууллар. Атын күрэхтэһиилэр бары 9-туу туурдаах буолаллар.
Кырдьык ыарахаттардаах, аан дойду чемпионата буоллаҕа дии, ол иһин, эрдэттэн өй-санаа, күүс-уох өттүнэн үчүгэйдик бэлэмнэнэн кэлэллэр. Күҥҥэ уон чааһы быһа биир сиргэ олорор ыарахан. Ол иһин, иллэҥ кэмнэригэр анаан элбэхтэ сүүрдэбит. Ол курдук, аралдьыйа таарыйа ити Сайсары күөлүн кытыытынан сүүрэ сылдьыбыттара, Доҕордоһуу болуоссатыгар тиийэн эмиэ сүүрбүттэрэ. Итиэннэ күн аайы “Триумф” чугаһыгар сатыы дьаарбайаллар.

-Көрдөххө, сэттис туур наһаа ыараханнык барбыт, аҕыс оонньууттан – үс эрэ кыайыы, уоннааҕылара тэҥнэһиилэр. Онтон салгыы туурга тэҥнэһии өссө элбиэн сөп дии саныыбын, тоҕо диэтэххэ, наһаа тыҥаан сырыттахтара дии. Эн ону туох дии саныыгыный?
-Дьахталлар элбэх тэҥнэһиитэ суох оонньууллар. Үксүн кыайсыыга бараллар. Онон элбэх результаттаах партия баар буолар. Холобур, эр дьон тэҥнэһии баар буоллаҕына, рискуйдаабакка тэҥнэһиэхтэрин сөп. Оттон дьахталлар, төһө эмэ сорудах биэрбитин да үрдүнэн, кыайыыга оонньоон киирэн барыахтарын сөп. Онон эмиэ арааһынай. Ким хайдах самочувстволааҕыттан, холобур сорохтор партия ортото сылайан хаалаллар, ол иһин, хотторон хаалаллар. Оттон атыттар, партия ортотугар дьэ тиллэн, сэргэхсийэн кэлэллэр.

-Биһиги билигин “Триумф” бастакы этээһигэр партиялары ырытыыга сылдьабыт. Манна дьон төһө көхтөөхтүк кытталларый?
-Мониторынан быһа бэриллэр партиялары аан дойду 9 төгүллээх чемпиона Александр Георгиев ырытар. Онно биһиги, тренердэр бары үөрэтэр оҕолорбутун ыҥыраммыт, күннэтэ отучча оҕо кэлэн көрөр, ырытыһар. “Азия оҕолоро “ норуоттар икки ардыларынааҕы спортивнай оонньууга сүүмэрдиир күрэхтэһии буола турар. Ол иһин, оҕолор күрэхтэһэ-күрэхтэһэ манна кэлэн партия көрөллөр. Ону тэҥэ, Дуобат уонна Оҕо кииннэригэр дьарыктанар оҕолор, ДЮСШ-6 уонна Чурапчыттан кэлэн көрөллөр. Бары 100 харахтаах дуобатынан дьарыктанар буолан, кинилэргэ интэриэһинэй. Быдан элбэҕи туһаналлар.

-Николай Николаевич, хоруйдарын иһин махтал! Кыргыттарбытыгар ситиһиини баҕарабыт.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *