Дуобакка аан дойду чемпионата: Фойеҕа – туспа күрэхтэһии

“Триумф” Спорка бэлэмнэнии киинигэр – иккис этээскэ, 100 харахтаах дуобакка дьахталларга аан дойду чемпионата бу күннэргэ үгэннээн ыытылла турар. Дьэ, кырдьык, аан дойду бастыҥ дуобатчыттара мустан, чемпион аатын ким ыларын инниттэн туох баар билиилэрин-көрүүлэрин, өйдөрүн-санааларын түмэн, ууран туран оонньуу сылдьаллар.

Ол кэмҥэ, бастакы этээскэ туруоруллубут монитордарга, оонньуу быһа бэриллэн, дуобаты таптааччылар – хаамыылары быһа көрөр, ырытыһар усулуобуйалара олохтоммут. Дьэ, манна күннэтэ, чемпионаттан туох да уратыта суох тыҥааһыннаах, сытыы дьүүллэһиилэр, мөккүөрдэр, ырытыһыылар ыытыллаллар. Ону биллиилээх гроссмейстердар быһааран, ырытан биэрэллэр. Мөккүөрдээх соҕустара өссө остуолларга анаан ууруллубут дуоскаларга партиялары ырыталлар. Ол барыта эйэ дэмнээхтик барар.

Холобур, чемпионат бүгүҥҥү хаамыытын аан дойду хастыы эмэ төгүллээх чемпионнара Александр Георгиев уонна Дарья Ткаченко дуобат анал сайтыгар интернетинэн быһа ырытан, кэпсээн биэрдилэр.

Манна оҕонньоруттан оҕотугар тиийэ элбэх киһи мустан, чемпионаты кыраҕытык кэтээн көрөр. Этэргэ дылы, саха киһитэ оһоҕун иннигэр, эбэтэр оҕуһун үрдүгэр олордо да, син олоҥхолоон барарыныы, сахалар бары – дуобатчыттар. Бэл, мин кыра сылдьан, ким хотторбут иһит сууйарыгар диэн дьиэ иһинээҕи дуобаттааһыҥҥа кытаанахтык чыраахтаспыт бэйэм :)))

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш e-mail не будет опубликован. Обязательные поля помечены *