Белград-2023: Николай Охлопков салгыы тустар

Балаҕан ыйын 16 күнүттэн Сербия киин куоратыгар спортивнай тустууга аан дойду чемпионата көҥүл тустуу көрүҥүнэн саҕаланна. Чемпионат бастакы күнүгэр – 61, 70, 86, 125 кг ыйааһыннаахтар кытыннылар.

Онуоха биһиэннэриттэн көбүөргэ маҥнайгынан Андрей Бекренев (Беларусь, 61 кг) таҕыста. Кини армянин Нарек Арутюняны 5:0 ахсаанынан баһыйан, күрэхтэһиини кыайыынан саҕалаата. Бу ыйааһыҥҥа иккис киһибит Николай Охлопков (Румыния) – аан дойду чемпиона россиянин Абасгаджи Магомедовка очукуонан ыраастык хоттордо (0:10). Салгыы хапсыһыыга Бекренев грузин Шота Партенадзеҕа 0:5 ахсаанынан сабырыйтаран кэбистэ.

Соторутааҕыта Кыргызстан спордун үтүөлээх маастара буолбут опыттаах бөҕөспүт Айаал Лазарев (Кыргызстан, 125 кг) бастакы эргииргэ албанец П.Карепины 11:1 ахсаанынан баһыйа тутта. Салгыы күрэхтэһиигэ кини австриец Людешеры 6:1 кыайда. Онтон финал 8/1-гэр украинец Александр Хоцяновскайы кытта көрүстэ. Итиэннэ бастаан утаа баһыйан иһэн түмүккэ 3:8 ахсаанынан хоттордо.

Бүгүҥҥү финалистар:

61 кг Абасгаджи Магомедов (Россия) – Вито Оруджев (АХШ)

70 кг Амир Яздани (Иран) – Зайн Резерфорд (АХШ)

86 кг Хассан Яздани (Иран) – Дэвид Тейлор (АХШ)

125 кг Амир Заре (Иран) – Гено Петриашвили (Грузия).

Онон, бастакы күн финалистара биллибиттэрин кэннэ саха тустууктарыттан Абасгаджи Магомедовка (61 кг) хотторбут Николай Охлопков эрэ салгыы тустар быраабы ылла. Кини уоскутар бөлөххө китаец Лины кытта киирсиэҕэ. Онно кыайдаҕына – украинец Блясецкай… Үчүгэйдик хомунан туһуннаҕына кыайталыыр дьоно. Барыта бэйэтиттэн тутулуктаах.

PS: чемпионат биирдиилээн хапсыһыыларын Дьулурҕан ютуб каналыгар көрүөххүтүн сөп. 

Программа быһыытынан бүгүн – 79, 92, 57, 74 кг ыйааһыннаахтар чемпионаты саҕалыахтара.

Биһигиттэн көбүөргэ Хотугу Македония аатыттан кыттар Европа чемпиона, Амма ыччата Владимир Егоров тахсар. Кини 57 киилэҕэ грузин Р.Дингашвилины кытта тустар.

Онтон сарсын 65 уонна 97 кг.

65 кг Ньургун Скрябин (Беларусь) – армянин В.Теваняны

65 кг Георгий Окороков (Австралия) – китаец Ян уонна азербайджанец Х.Алиев пааратын кыайыылааҕын кытта киирсиэҕэ.

Хапсыһыылар бүгүн Дьокуускай бириэмэтинэн 17:30 саҕаланаллар.

«Дьулурҕан».