Амма оонньууларга бэлэмнэнэр-2

///Хаартысканан репортаж

Биллэрин курдук, от ыйын 3-7 күннэригэр Аммаҕа, Саха сирин норуоттарын VII спортивнай оонньуулара ыытыллар. Республика быйылгы сыллааҕы олоҕор биир бэлиэ түгэни ылар бу тэрээһин иннинэ, олохтоммут үгэс быһыытынан, оонньуу республикатааҕы Пресс-киинин (салайааччы Прокопий Бубякин) көҕүлээһининэн – оонньуулар бэлэмнэниилэрин билсэр суруналыыстар Аммаҕа сырыылара тэрилиннэ.

Бөтүҥҥэ

Амматааҕы оонньуу аҥаардас улуус киинигэр эрэ ыытыллыбат. Улуус социальнай-экономическай кыаҕын сайыннаран, манан сибээстээн чугас сытар Бөтүҥ уонна Чапчылҕан нэһилиэктэригэр улахан тутуулар ыытылла тураллар. Онно эмиэ, оонньуулар күрэхтэһиилэрэ ыытыллыахтара.

Ол курдук, Бөтүҥҥэ инбэлиит спортсменнарга аналлаах икки этээстээх элбэх функциялаах улахан адаптивнай спортивнай комплекс тутулла турар. Кэлээппитин, иһирдьэнэн-таһырдьанан үлэ күөстүү оргуйан олорор. Арыаллааччыларбыт эппиттэринэн, бөтүҥнэр субуотунньугунан олорбуттара ырааппыт. Спортивнай комплекс тутуутун Дь.И. Сивцев салайааччылаах “Электромонтаж” тэрилтэ ыыта сылдьар.

-Тутуу былаан быһыытынан баран иһэр, бэс ыйын 27 күнүгэр хамыыһыйаҕа туттарыахтаахпыт , — диир Дьулустан Иванович.

Иккис этээскэ тахсыбыппыт дьахталлар сууйа-сото, кырааскалыы сылдьаллар эбит. Улуус баһылыга Николай Архипович, биһиэхэ, бу Бөтүҥтэн төрүттээх, көҥүл тустууга Европа быйылгы чемпионатын боруонса призера Владимир Егоров ийэтин ыйан биэрэр. Биһиги чугаһаан, Македония былаахтаах кыһыл футболкалаах Александра Владимировнаны кытта билистибит. Кини олохтоох уһуйааҥҥа иитээччинэн үлэлиир эбит. Болуодьабыт сотору кэминэн Минскэйгэ Европа оонньууларыгар тустаары сылдьарыгар ситиһиини баҕардыбыт.

Санатан эттэххэ, Бөтүҥнээҕи саҥа спортивнай комплекска, оонньуулар бырагыраамаларын быһыытынан, олорон эрэн волейбол күрэхтэһиитэ ыытыллыа.

Бөтүҥҥэ ити спортивнай комплекс эрэ буолбакка, улахан таас оскуола тутулла турар. Аны ону тиийэн көрдүбүт. Балаҕан ыйыгар үөрэх дьылын көрсө үлэҕэ киириэхтээх.

Дьэ, кырдьык, Бөтүҥ сайдар кэскилэ киэҥ! Тутуу баар – олох баар!

Чапчылҕан

Аны манна саҥа спортивнай саала дьэндэйэн тахсыбыт. Биһигини нэһилиэк баһылыга Гаврил Юрьевич Бродников эҕэрдэлии көрүстэ. Манна эмиэ үлэ күөстүү оргуйар. Кырааска үлэтэ ыытылла турар. Спортивнай саала волейбол оонньуур быласааккалаах, туспа, тустуу саалалаах.

Гаврил Юрьевич суруналыыстарга нэһилиэк олоҕун-дьаһаҕын, үлэтин-хамнаһын сиһилии кэпсээтэ, ыйытыыларга хоруйдаата.

Чапчылҕаннар эмиэ спортивнай оонньуулар тэрийээччилэрэ. Оонньуулар кэмнэригэр манна баскетбол күрэхтэһиитэ ыытыллыа.

Амма

Онтон улуус киинигэр төннөн кэлэн, Албан аат болуоссатыгар Амма нэһилиэгин уонна улууһун баһылыктара экспресс-интервью биэрдилэр.

Амма нэһилиэгин баһылыга Михаил Алексеевич Артемьев:

Иккис сылбытын оонньууларынан олоробут. Албан аат болуоссатыгар оонньуу кэмигэр күн аайы кыайыылаахтары наҕараадалааһын сиэрэ-туома ыытыллыаҕа. Сахаачча туһунан документальнай киинэ сүрэхтэниитэ буолуоҕа. Манна сыһыары тутан эттэххэ, оонньуу кэмигэр Н.С. Захаров-Сахааччаҕа аналлаах мусуой үөрүүлээхтик аһыллыаҕа. Итиэннэ түөрт күн устата 57 (!) култуурунай тэрээһиннэр былааннаналлар.

Билигин былаан быһыытынан биһиги эргэ, хаарбах дьиэлэри көтүрүү үлэтин ыыта сылдьабыт. “Ректайм” тэрилтэҕэ Амма кэрэ айылҕатын кэрэһилиир баннердары сакаастаабыппыт. Ону уон үс сиргэ туруоруохпут.

Биир сүрүн үлэбит – суолбут. Суолга сэрэхтээх буоларга анал бэлиэлэри туруоруохпут.

Билигин ханан да, оонньууларынан сибээстээн субуотунньуктар ыытылла тураллар. Сүрүннээн, ыраастааһын, көҕөрдүү, кырааскалааһын. Нэһилиэнньэ көхтөөх. Аҥаардас нэһилиэк тэрилтэлэрин күүһүнэн Амма сэлиэнньэтэ 40 тыһыынча сибэккинэн киэргэтиллиэхтээх. 

Амма улууһун баһылыга Николай Архипович Архипов:

Дьон-сэргэ ыытыллар тэрээһин үлэлэргэ активнайдык кыттар. Уопсайынан, оонньууларга бэлэмнэниинэн кэнники кэмҥэ чөл, чэгиэн-чэбдик олоххо тардыһыы улаатта. Ити киһини үөрдэр. Спорт көрүҥнэринэн Амма хамаандата бэлэмнэниини бара сылдьар. Спортсменнарбыт Кыргызстанынан, Дагестанынан, Кытайынан… анал үөрэтэр-эрчийэр түмсүүнү бардылар. Онуоха спорду өйүүр анал фонда тэрийбиппит көдьүүстээх буолла. Аны түмүгү эрэ кэтэһэбит. Сыалбыт-сорукпут диэн, хамаанданан бастыахтаахпыт. Ордук волейболга, чэпчэки атлетикаҕа, тустууга, спортиҥҥа ситиһиилээхтик кыттарга суоттанабыт.

Бөтүҥ оскуолатын тутуута

Бу кэнниттэн Амматааҕы оҕо искусствотын оскуолатыгар сырыттыбыт. Манна, оонньуу кэмигэр суруналыыстар олоруохтаахтар. Оскуола дириэктэрэ сүүс эрэ киһини олордор кыахтаахпыт диир уонна оскуоланы барытын кэрийэ сылдьан көрдөрдө. Аҥаардас “Саха” иһитиннэрэр-көрдөрөр хампаанньа үлэһиттэрэ итиччэлэр. Онон Пресс-киин салайааччыта Прокопий Бубякин санааҕа түстэ: “Оччоҕо, куораттан уонна улуустартан кэлэр 40-чэ суруналыыһы ханна олордобут?”

Бу боппуруос билиҥҥитэ аһаҕас хаалла. Ол гынан баран, этэргэ дылы, үүт-хайаҕас көстөн, боппуруос этэҥҥэ быһаарыллыа диэн эрэнэбит.

Амма улууһун баһылыгын тутууга солбуйааччы Дмитрий Иванов үлэ хаамыытын билиһиннэрэр

Түмүктээн эттэххэ, Саха сирин Олимпиадатынан биллибит оонньуулар саҕаланаллара икки аҥаар нэдиэлэ иннинэ, Амма – оонньууларга бэлэмнэниитэ былаан быһыытынан ыытыллан, ситиһиилээхтик түмүктэнэн эрэр эбит диэххэ сөп. Олохтоохтор улууспут туһа диэн, ыытыллар үлэлэргэ көхтөөхтүк кытталлар. Саамай сүрүнэ, спортивнай оонньуулар ыытыллан түмүктэниэхтэрэ, оттон онно анаан тутуллубут тутуулар – кинилэргэ, аммаларга үүнэллэригэр, чэчирии сайдалларыгар туһалыа…

Петр ПАВЛОВ.

Ааптар хаартыскаҕа түһэриилэрэ.  

Добавить комментарий

Ваш e-mail не будет опубликован. Обязательные поля помечены *