Тоҕус томтор оонньуулара: Фавориттар билиннилэр

Саха Өрөспүүбүлүкэтин мас тардыһыы федерациятын вице-президенэ, Чурапчы улууһун бочуоттаах попечителэ, СӨ успуорт түөрт көрүҥнэригэр маастара, “Мистер Норд” анал аат хаһаайына, өрөспүүбүлүкэ мас тардыһыыга элбэх төгүллээх чемпиона, Саха сиригэр ХХ үйэ бастыҥ ыспарсымыана Степан АЛЕКСЕЕВ аатыгар “Тоҕус томтор” оонньуулара бүгүн, ол эбэтэр, бэс ыйын 13 күнүгэр бастакы түөрт көрүҥҥэ күрэхтэһиитэ түмүктэннэ.

Быйылгы сылга 8 ыспарсымыан кыттыыны ыла кэллэ, ол курдук: атах оонньуутугар успуорт маастара, дэгиттэр сайдыылаах ыспарсымыан Ньурба улууһуттан Владимир Федоров, Үөһээ Бүлүү улууһуттан, успуорт маастарыгар хандьыдаат Айхал Бюлтясов, Чурапчы эрэлэ, Уйбаан Белолюбскай иитиллээччитэ Павел Друзьянов, Дыгын оонньууларын, Тоҕус томтор оонньууларын муҥутуур кыайыылааҕа, Хаҥалас хотойо Егор Филиппов, Тоҕус томтор оонньууларын муҥутуур кыайыылааҕа, Дыгын оонньууларын чөмпүйүөнэ, призера, Үөһээ Бүлүү ааттааҕа Любомир Николаев, мас тардыһыытыгар успуорт маастара Амма улууһуттан Владимир Никитин, Нам улууһун чулуута, успуорт маастара Антон Тойтонов уонна Уус Алдан улууһуттан өрөспүүбүлүкэҕэ, Араассыыйаҕа, Европаҕа, аан дойдуга мас тардыһыытыгар иннин биэрбэтэх, норуот таптаан ааттыыр Үрүҥ Уолана – Дмитрий Попов түһүлгэни киэргэттилэр.

Бастакы күҥҥэ буоларын курдук уолаттар оҕунан ытыыга, бэрэмэдэйдээх сүүрүүгэ (сүгэһэрдэрин ыйааҕына 80 киилэ), 400 миэтэрэҕэ сүүрүүгэ уонна мас тардыһыытыгар күүстэрин холоннулар.

Оҕунан ытыыга:

1 миэстэ – Дмитрий Попов (Уус Алдан);

2 миэстэ – Владимир Никитин (Амма);

3 миэстэ – Антон Тойтонов (Нам).

Бэрэмэдэйдээх сүүрүүгэ:

1 миэстэ – Егор Филиппов (Хаҥалас);

2 миэстэ – Дмитрий Попов (Уус Алдан);

3 миэстэ – Любомир Николаев (Үөһээ Бүлүү).

400 миэтэрэҕэ сүүрүү:

1 миэстэ – Егор Филиппов (Хаҥалас);

2 миэстэ – Любомир Николаев (Үөһээ Бүлүү);

3 миэстэ – Владимир Федоров (Ньурба).

Мас тардыһыыта:

1 миэстэ – Дмитрий Попов (Уус Алдан);

2 миэстэ – Егор Филиппов (Хаҥалас);

3 миэстэ – Владимир Федоров (Ньурба).

Көстөрүн курдук, күрэхтэһиигэ бастыҥнара, фавориттар билиннилэр. Сарсын уолаттар өссө биэс көрүҥҥэ (тутум эргиирэ, кулун тардыы, 9 туос ыстаҥа, хапсаҕай, бэрэбинэни көтөҕүүгэ) илин-кэлин түсүһүөхтэрэ. Онон сарсын ким күрэхтэһии сүрүн бирииһин – “Нива” массыына хаһаайына буоларын, Квадроциклы уонна Мотоциклы кимнээх сүүрдэн баралларын кэтээн көрүөхпүт.

Семен ЖЕНДРИНСКЭЙ, Чурапчы.

Ааптар хаартыскаҕа түһэриилэрэ.

 

Добавить комментарий

Ваш e-mail не будет опубликован. Обязательные поля помечены *