Петр Ушницкай: “Бу чемпионат дуобат салгыы сайдыытыгар сүҥкэн төһүү буолуоҕа”

Сүүс харахтаах дуобакка дьахталларга аан дойду чемпионатыгар судьуйалаһа сылдьар Саха Республикатын физическэй култуураҕа уонна спорка үтүөлээх үлэһитэ, үрдүк категориялаах тренер-педагог, Россия инбэлииттэргэ бастакы гроссмейстера, Россия алта төгүллээх чемпиона, республикатааҕы категориялаах судьуйа Петр Петрович Ушницкай биһиги сайтпытыгар оонньуулар тустарынан санаатын маннык үллэстэр:

-Республика үрдүкү салалтата бу чемпионаты Саха сиригэр тэрийэн ыыппытыгар муҥура суох махтанабын. Бу чемпионат дуобат сайдыытыгар сүҥкэн төһүү буолуоҕа дии саныыбын.

Оонньооччулар тустарынан эттэххэ, Тамара Тансыккужина улахан опыттаах. Бэрт кыра преимуществоны ыллар ылан, онтукатын эптэн эбэн, кыайыыга тиэрдэр стиллээхтик оонньуур. Тэҥнэһиитин тутан олорон оонньуур, мээнэ рискуйдаабат. Оттон Наталья Садовска үһүс туурга дуобат хонуутун ортотун албыннаан биэрэ сылдьан, дьиэтээҕи бэлэмигэр киллэрэн, анаан бэлэмнээбит варианыгар олордон, комбинациялаан, 12 саастаах монголканы бурҕатта.

Тустууга, холобур, Бувайсар Сайтиев бастаан наар баһыйара көстүбэт ээ. Утарылаһааччытын сылатар, эрийэр-мускуйар. Дьэ, онтон саҕалыыр. Ол курдук, дуобат улахан кылаастаах оонньооччулара эмиэ этэргэ дылы, микроскопка көстөр кыра преимуществоны мунньан, сайыннаран, улаатыннаран баран дьэ, биирдэ кыайаллар.

Мин сыаналыырбынан, урут да сахаларга сүдү талааннаах дуобатчыттар баар этилэр. Ол кэмҥэ кинилэр сылга биирдэ-иккитэ эрэ соҕуруу баран күрэхтэһэллэрэ. Анал тренердэрэ суох, үлэни эрэ өрө тута сылдьыбыт дьон буоллахтара. Ити – Семен Николаевы, Николай Саввиновы, Альбина Аргунованы, Игорь Никифоровы, Зоя Саввинаны этэбин. Оччолорго дуобат да литературата аҕыйах этэ. Соҕуруу бардахха, библиотекалары кэрийэн, онтон устан, бириэмэ барыыр буоларбыт. Билигин олохпут лаппа сайдан, араас ситиминэн эдэркээн оҕолор үрдүк таһымнаахтык оонньуур буоллулар. Онон бу ыытылла турар чемпионакка киһи көһүппэтэх көрдөрүүлэрэ баар буолуохтарын сөп. Этэргэ дылы, эдэрдэр кимэллэр.

Үһүс туурга тэҥ сыһа тыҥааһыннаах оонньуулар буоллулар. Садовска эрэ чэпчэки кыайыыны сурунна.

Оттон төрдүс туурга наһаа тыҥааһыннаах киирсиилэр буоллулар. Пружина кытаатан, күүрэн турарын курдук, эмискэ тоҕута тэбиэлээтилэр. Ол курдук, Мотричко эмискэ прорывтаан, утарсааччытын Якобсы (Аруба) түргэнник бэриннэрдэ.

Бэһис туурга Ноговицына уонна Тансыккужина икки ардыларыгар сытыы киирсии буолуо дии санаабыппыт, почти оонньообокко, биэс мүнүүтэ иһигэр тэҥнэстилэр. Атыттар бу туурга хайдах эрэ, күүһү-уоҕу харыстыахха диэбит курдук стиллээх оонньоотулар. Уустук оонньууга талаһа сатаабатылар. Кытай кыыһа Ю Чжан олох хотторуу позициятыгар олорон, Ольга Федоровиһы (Беларусь) хотон кэбистэ. Наташа Шестакова бүгүн олус бэркэ саҕалаабыт курдук этэ да, Кытай кыыһа олус кылаастаахтык тэҥнэстэ. Уопсайынан, кытайдар концовкаҕа абытайдык оонньоотулар.

Сарсын, алтыс туурга мин тус санаабар, Наталья Шестакова, Ксения Нахова уонна Полина Петрусева кыайыахтара, онтон атыттарга олус тыҥааһыннаах киирсиилэр буолуохтара.

Петр ПАВЛОВ.    

Добавить комментарий

Ваш e-mail не будет опубликован. Обязательные поля помечены *