Андрей Филиппов: “Ээр сэмээр, Ксенияҕа ыалдьабын”

Дьокуускай куорат 5 №-дээх спортивнай оскуолатын дириэктэрин солбуйааччы, көҥүл тустууга ССРС спордун маастара, Саха Республикатын үөрэҕириитин туйгуна Андрей Афанасьевич Филиппов, “Триумфка” буола турар сүүс харахтаах дуобакка дьахталларга аан дойду чемпионатыгар бэйэтэ үлэлиир кыһатын иитиллээччилэрэ, биир дойдулааҕа Ксения Нахова уонна чемпионат күүстээх кыттааччыларын туһунан dzulurgan.ru сайтка бэйэтин санаатын маннык үллэһиннэ:

-Биһиги, Дьокуускай куорат биэс нүөмэрдээх оҕо спортивнай оскуолабытыгар дуобат секциялаахпыт. Онно тренеринэн – Россия уонна Саха Республикатын үтүөлээх тренерэ, биһиги киэн туттар киһибит Мария Никитична Бырдыннырова уонна кини төрөппүт уола спорт маастара Василий Николаевич Кычкин үлэлииллэр. Биһиги, бу сүүс харахтаах дуобакка бүтэһик уон сыл республикаҕа, Россияҕа оҕолорго бастыҥ оскуоланан биллэбит. Оҕолорбут сыл аайы кэриэтэ Россия, Европа, аан дойду күрэхтэһиилэригэр чемпионнууллар, призердууллар. Ааттыам этэ, бу билигин ыытылла турар аан дойду чемпионатыгар судьуйалыы сылдьар, сүүс харахтаах дуобакка оҕолорго аан дойду үс төгүллээх чемпиона Ньургуйаана Азарованы, аан дойду алта төгүллээх чемпиона Анатолий Протодьяконовы…

Дуобакка Мария Никитична суотугар аҥаардас биһиги оскуолабытыгар уон икки аан дойду чемпиона баар. Ити үксэ сүүс харахтаах дуобакка. Онтон нуучча дуобатыгар билиҥҥи аан дойду чемпиона Андрей Федотов эмиэ биһиги спортивнай оскуолабыт киһитэ. Дуобаты биһиги олох кэтээн көрөбүт. Аҕам Өлүөхүмэҕэ дуобаты сөргүппүт, тэниппит киһи. Кини алта уон биэс сааһыгар дуобакка спорт маастарыгар кандидат буолбута. Билигин Өлүөхүмэҕэ сүүрбэччэ спорт маастарыгар кандидаттар бааллар. Киһи үөрэрэ диэн, бу чемпионакка Өлүөхүмэ кыыһа, Кыыллаахтан сылдьар, аҕам дуобакка бастакы хардыыларын оҥотторбут кыыһа – Ксения Нахова, аан дойду уон алта бастыҥ дуобатчыттарын кэккэтигэр киирсэн кытта сылдьарыттан киэн туттабын уонна киниэхэ ыалдьабын. Кинини аҕам, кыра сырыттаҕына Ярославль, Воронеж уо.д.а. куораттарга күрэхтэһиилэргэ илдьэ сылдьан, дуобакка такайбыта. Ксенияны көрсөн ийэм аатыттан эҕэрдэтин тиэртим. Кини кыра сылдьан биһиги дьиэбитигэр элбэхтэ сылдьар этэ.

Бу чемпионакка, аан дойду икки саамай эдэр гроссмейстердара: китаянка Ю Чжан уонна Ксения Нахова кытта сылдьаллар. Ксения уон алта сааһыгар Европа чемпионатыгар дьахталларга, манна оонньуу сылдьар Айгуль Идрисова кэнниттэн иккис миэстэҕэ тахсан, международнай гроссмейстер аатын ылбыта. Кини аан дойду чемпионатыгар иккис кыттыыта. Бастакы холонуутугар бэйэтин таһымыгар үчүгэйдик кыттыбыта. Ортоку соҕус сылдьыбыта.

Ксения ситиһиитин Өлүөхүмэ улууһун хаһыатыгар өрүү сырдатабын. Бу чемпионакка кэлбит Мотричкону (Украина), Федоровичтары (Беларусь) сирэй көрсөн кыайталыы сылдьыбыта. Бу сырыыга дьэ хайдах буолар, сахалыы сиэринэн сэмээр ситиһиини баҕарабын.

Кыра эрдэҕиттэн кэтээн көрөр дуобатчыппыт Рена Ноговицына Дьокуускайга аан дойду Кубогын ыларыгар, чемпионат кылаабынай сэкиритээрэ Дмитрий Сыромятниковка мин солбуйаачынан үлэлээбитим.

Бу чемпионакка Россия кыттааччыларыттан ким эрэ кыайыа дии саныыбын. Тамара Тансыккужина аан дойду биэс төгүллээх чемпиона, улахан турнирдарга эр дьону да кыайталыыр күүстээх. Садовска Наталья – аан дойду чемпионатын иккитэ субуруччу кыайбыта. Китаянкалар куруук кутталлаахтар. Оттон голландканы истибэтэх аатым эрээри, сүүс харахтаах дуобакка голландецтар үгэс быһыытынан күүстээхтэр. Онон кинилэртэн мээнэ киһи кэлбэтэх буолуохтаах…

Петр ПАВЛОВ.             

 

Добавить комментарий

Ваш e-mail не будет опубликован. Обязательные поля помечены *