Дуобакка аан дойду чемпионата: Иккис туур түмүгэ

“Триумф” Спорка бэлэмнэнии киинигэр сүүс харахтаах дуобакка дьахталларга аан дойду чемпионата ыытылла турар. Бүгүн, иккис туур оонньонно.

Матрена Ноговицына – аан дойду чемпионатын боруонса призера, Украина элбэх төгүллээх чемпиона, бразильскай дуобакка аан дойду уонна Интеллектуальнай оонньуулар кыайыылаахтара, международнай гроссмейстер Виктория Мотричконы дуобат хонуутун ортотугар аҕыстыы киһилээх олорон, утарылаһааччытын хаамыытын хаайталаан, этэргэ дылы, илиитин-атаҕын баайан, наар уган биэрэргэ күһэйдэ. Онон Матрена бастакы кыайыытын сурунна.

Ксения Нахова международнай маастар Дарья Федоровиһы (Беларусь) кытта тэҥнэстэ.

Ол оннугар, Наталья Шестакова бу сырыыга чемпионат биир күүстээх оонньооччута, аан дойду хас да төгүллээх чемпиона Тамара Тансыккужинаҕа хотторон, балаһыанньатын уустугурта. Манна даҕатан эттэххэ, Тансыккужина, чемпионат саамай аҕа саастаах, уопуттаах кыттааччыта. Кини – 40 саастаах.

Бүгүн оонньооччулар бэҕэһээҥҥи курдук наһаа уһаабакка, түргэн соҕустук быһаарыстылар. Ол курдук, Кытай кыргыттарын оонньуулара саамай бүтэһигинэн түмүктэннэ. Кинилэр 4 чаастан ордук оонньоотулар. Оттон иккис туурга бастакынан кыайыыны, чемпионат саамай эдэр кыттааччыта, монголка Хуслен Энхболд (12 саастаах) ситистэ.

Иккис туур түмүгэ маннык буолла:

Хуслен Энхболд (Монголия) – Аннелайн Якобс (Аруба) 2:0

Виктория Мотричко (Украина) – Матрена Ноговицына (Россия) 0:2

Хейке Верхул (Нидерланды) – Айгуль Идрисова (Россия) 1:1

Эрса Негбре (Кот-д, Ивуар) – Наталья Садовска (Польша) 0:2

Ксения Нахова (Россия) – Дарья Федорович (Беларусь) 1:1

Полина Петрусева (Беларусь) – Ольга Федорович (Беларусь) 1:1

Наталья Шестакова (Россия) – Тамара Тансыккужина (Россия) 0:2

Ю Чжанг (Кытай) – Ханцинь Чжао (Кытай) 1:1.

Онон, икки туур кэнниттэн, икки кыайыылаах Тамара Тансыккужина 4 очукуолаах инники таҕыста. Биирдии кыайыылаах, биирдии тэҥнэһиилээх Нахова, Садовска, Ноговицына, Ханцинь 3-түү очукуолаахтар. Негбре, Федоровичтар, Петрусева, Энхболд, Чжан, Идрисова 2-лии очукуолаахтар. Оттон Якобс уонна Шестакова билиҥҥитэ очукуолара суох.

Аны сарсын үһүс туурга көрсөллөр:

Тамара Тансыккужина (Россия) – Ксения Нахова (Россия)

Айгуль Идрисова (Россия) – Наталья Шестакова (Россия)

Матрена Ноговицына (Россия) – Хайке Верхул (Нидерланды)

Ханцинь Чжао (Кытай) – Виктория Мотричко (Украина)

Аннелайн Якобс (Аруба) – Ю Чжан (Кытай)

Наталья Садовска (Польша) – Хуслен Энхболд (Монголия)

Ольга Федорович (Беларусь) – Эрса Негбре (Кот-д, Ивуар)

Дарья Федорович (Беларусь) – Полина Петрусева (Беларусь).

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *