Гаврил Колесов: “Бэйэбит кыргыттарбытыгар ыалдьабыт”

“Триумф” Спорка бэлэмнэнии киинигэр сүүс харахтаах дуобакка дьахталларга аан дойду чемпионата үгэннээн ыытылла турар. Чемпионат кыттыылаахтарын туһунан бэйэтин санаатын, сылыктааһынын, биирдиилээн оонньооччулары ырытыытын, 100 харахтаах дуобат 64-тээхтэн туох уратылааҕын – аан дойду уонна Россия элбэх төгүллээх чемпиона, международнай гроссмейстер Гаврил Колесов dzulurgan.ru сайтка бу курдук кэпсээтэ.  

-Бу иннинэ Саха сиригэр маннык чемпионаттар эмиэ ыытылла сылдьыбыттара. Биһиги өрөспүүбүлүкэбит маннык тэрээһиннэри үчүгэйдик ыытар үөрүйэхтээх. Бу да сырыыга үрдүк таһымҥа ыытыллыа диэн эрэнэбин. Кэлбит кыттааччылары үксүлэрин уруккуттан билэр дуобатчыттарым. Арай, ити Аруба уонна Кот-д, Ивуар спортсменнарын билбэппин.  Уоннааҕылары үксүлэрин билэбин. Кинилэр оонньууларын кэтээн-манаан көрөбүн. Ону тэҥэ, аан дойду хастыы эмэ төгүллээх чемпионнара, гроссмейстердар Алексей Чижов Удмуртияттан, Александр Георгиев Санкт-Петербургтан кэлбиттэр. Кинилэри кытта сүүс харахтаахха син элбэхтэ киирсэ сылдьыбытым. Итиэннэ ити Белоруссия хамаандатын бэрэстэбиитэлэ, эмиэ уруккуттан билэр киһим, маастар Кирилл Хайнюк кэлбит.

Биллэн турар, биһиги бэйэбит кыргыттарбытыгар ыалдьабыт. Ол курдук, Матрена Ноговицына мин санаабар, үчүгэйдик кыттар кыахтаах. Киниттэн ураты икки кыыспыт: Наталья Шестакова уонна Ксения Нахова эмиэ үс бириистээх миэстэҕэ киирэргэ оонньоон көрүөхтэрэ дии саныыбын. Ыарахан буолуо гынан баран, төһө кыалларынан оонньуу сатыахтара.

Кэлбит дуобатчыттартан Матренаттан ураты күүстээҕинэн аан дойду икки төгүллээх чемпиона полячка Наталья Садовска буолар. Итиэннэ элбэх төгүллээх аан дойду чемпиона Башкирияттан Тамара Тансыккужина баар. Беларуссияттан кэлбит эдьиийдии-балыстыы Федоровичтартан – Ольга эмиэ үчүгэйдик оонньуур. Уонна украинка Виктория Мотричко – күүстээх. Бу ааттаммыт дуобатчыттартан хайалара эрэ бастыыра буолуо диэн сылыктыыбын.

Киирсии син биир кытаанах, тыҥааһыннаах буолара күүтүллэр. Ким даҕаны улаханнык баһыйа тутуо суоҕа. Холобур, түмүккэ үс бастакы миэстэни ылбыттар очукуолара тэҥ сыһа буолуоҕа. Очукуолара тэҥ да буолуон сөп, оччоҕо коэффициенынан быһаарсыахтара.

Матрена Ноговицына кэнники сылларга аан дойдуга биир саамай күүстээх оонньооччу буолар. Холобур, ити Садовсканы, Тансыккужинаны кытта биир таһымҥа сылдьар. Кини уһун оонньууга, ол аата, классикаҕа кыайа илик, аан дойдуга. Оттон блицка уонна түргэн оонньууга хаста да кыайа сылдьыбыта.

Биир күүстээх, аан дойду хас да төгүллээх чемпиона Зоя Голубева (Латвия) кэлбэтэ. Кини кэлбитэ эбитэ буоллар, киирсии өссө күүстээх, өссө хатыһыылаах буолуо этэ.

Биһиги кыргыттарбыт бэйэлэрин дойдуларыгар оонньууллара, хаһан баҕарар ыарахан буолааччы. Ол иһин, өй-санаа өттүнэн хомуна түһүөхтэрин наада. Чемпионат психологическай түһүмэҕи аастахтарына, оонньуулара табыллыа дии саныыбын. Ноговицына уонна Шестакова – опыттаах дуобатчыттар. Ити кыһалҕаны ааһыахтара, үчүгэй оонньууну көрдөрүөхтэрэ диэммин эрэнэбин. Ксения Нахова эдэр, биһиги биир талааннаах оонньооччубут. Кини да эмиэ үчүгэй оонньууну көрдөрүө дии саныыбын.

Кытай кыргыттара сюрприз оҥоруохтарын сөп. Биир эдэрэ кэккэ сылларга оҕолорго эҥин сырыы ахсын бастыы сылдьыбыта. Биллиилээх гроссмейстер, аан дойду хас эмэ төгүллээх чемпиона  Алексей Чижов үөрэнээччитэ Ханьцин манна биһиэхэ, ХИФУ-га үөрэнэ сылдьыбыта. Кини эмиэ табыллан оонньуон сөп. Монголия кыыһа эдэр, улахан көрдөрүүтэ суох. Кинини наһаа оннук конкуренция оҥоруо дии санаабаппын. Ити Башкирия иккис кыыһа – Айгуль Идрисова эмиэ аһыллан, оонньоон кэбиһиэн сөп.

Көрүөхпүт, бэйэбит кыргыттарбытыгар ыалдьыахпыт. Бу үчүгэй экраннар туруоруллубуттар, быһа онлайн биэрии көстөр, сайтка эмиэ көстөр. Көрөөччүлэр, дуобаты таптааччылар кэлбиттэр. Бары ыалдьыахпыт. Бастакы күн, чемпионаты үөрүүлээхтик аһы сүрдээх үчүгэйдик ыытылынна.

Сүүс харахтаахха оонньуу стратегията туспа. Бэйэтэ ураты комбинационнай хаамыылардаах оонньуу. Аан дойду билиммит көрүҥэ. Ол да иһин, “норуоттар икки ардыларынааҕы дуобат” диэн ааттыыллар. Нуучча дуобатынааҕар ыарахан. Элбэҕи ааҕыаххын наада. Холобура, 64-тээххэ, биирдэ кыракый алҕас сыыһа хаамыыны түһэн, оонньууну быһа эрэйдэниэххин сөп. Оттон манна, сүүстээххэ, эмиэ саахымакка курдук, оннук сыыһа түһүүнү син көннөрүөххэ сөп.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *