Николай Саввинов: “Чемпионакка үс кыыспыт кыттара – улахан ситиһии”

Саха сирин дуобакка 13 төгүллээх чемпиона, эр дьоҥҥо ССРС финалыгар бастакынан суолу тэлбит, Европа бэтэрээннэригэр боруонса мэтээллээх, аан дойдутааҕы маастар, Саха Өрөспүүбүлүкэтин норуотун хаһаайыстыбатын үтүөлээх үлэһитэ Николай Николаевич Саввиновтан, биһиги Дьокуускайбытыгар саҕаламмыт 100 харахтаах дуобакка дьахталларга аан дойду чемпионатын туһунан санаатын үллэстэригэр көрдөстүм.

-Биһиги ыччаттарбыт дуобакка бу кэнники сылларга маассабай ситиһиилэнэн эрэллэр диэххэ наада. Холобур, соҕуруу бардахтарына, Россия да, Европа, аан дойду да күрэхтэһиилэригэр хастыы эмэ киһи чемпион, призер буолан кэлэллэрэ биһигини наһаа үөрдэр. Аҥардастыы улахан дьоммут эрэ буолбакка, оҕолорбут, оннооҕор аҕыс саастаахтарбыт эмиэ ситиһиилэнэллэрэ наһаа үчүгэй. Ити билигин оҕолору наһаа көҕүлүүр. Төрөппүттэр даҕаны дуобаты сүрдээҕин өйүүр буоллулар.

Оттон бу чемпионат туһунан этэр буоллахха, биллэн турар, биһиги республикабытыгар бу улахан чиэс-бочуот. Билигин уон алта дьахтар, наһаа күүстээх састаап тиийэн кэллэ. Африкаттан, Америкаттан тиийэ кэллилэр. Оттон голландецтар дуобакка былыр-былыргыттан сөбүлээн оонньуур буоланнар, күүстээхтэринэн биллэллэр.
Маннык күүстээх састаапка биһиги үс кыыспыт кыттара наһаа үчүгэй түгэн үөскээтэ. Хайаан даҕаны үс кыттааччыттан – биирдэрэ призер буоларыгар биһиги наһаа баҕарабыт уонна эрэллээхпит да диэххэ сөп. Кыргыттары, үһүөннэрин сыллыы-сыллыы үтүө баҕарыыларбын тиэртим. Кимиэхэ дьол тосхойбут, түгэн түбэспит – ол кыайарыгар мин эрэллээхпин. Хайаан даҕаны биир призерданыахпыт диэн. Оттон чемпион буолар ыарахан буолара буолуо. Бастаан бэйэ-бэйэлэрин кытта киирсэллэр, инньэ гынан, кэнники ким да очукуо бырахсыыта эҥин суох буолар, маннык улахан күрэхтэһиигэ. Тус бэйэлэрэ төһө кыахтаахтарынан, хайдах бэлэмнээхтэринэн оонньоон, биһигини үөрдэллэрэ буоллар диэн, улахан баҕа санаалаахпыт.

Бу чемпионат биһиэхэ, Саха сиригэр туһата буолунай буоллаҕа. Бэйэбит дьиэбитигэр тиийэн кэлбит аан дойу күүстээхтэрин оонньууларын тутан олорон көрөрбүт астык. Улахан үөрэх дии саныыбын, оҕолорго. Саамай улахана, оҕолорбутугар стимул. Биһиги бэйэбит үс кыыспыт кыттар буолбуттара, улахан кыах.
Тэрээһин туһунан эттэххэ, дуобакка маннык улахан таһымнаах күрэхтэһии Дьокуускайга хаста да буолбута. Ити барыта биһиги спорка салалтабыт, республикабыт салалтата дуобат оонньуутун тэрээһинин дакаастаан, Дуобат аан дойдутааҕы федерацията (ФМЖД) өйөөн, бу сахалартан ураты атын сиргэ үчүгэйдик тэрийэллэрэ саарбах диэн, сөбүлэспиттэрэ буолуо дии саныыбын. Биһиги туох баарбытынан-суохпутунан чемпионаты биллэн турар, үрдүк таһымнаахтык тэрийэн ыытыахпыт диэн эрэллээхпин. Итиэннэ көрөөччүлэр кэлэн, чемпионаты илэ харахтарынан көрөллөрүгэр ыҥырабын. Оҕолорун, сиэннэрин илдьэ кэлэн, бу аан дойду дуобакка саамай бастыҥнарын көрөллөрө, кинилэр тылларын-өстөрүн истэллэрэ наһаа үчүгэй буолуо этэ.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *