Дуобакка аан дойду чемпионата: Бастакы туур түмүгэ

Дьэ, доҕор, биһиги, ким кыайарын түргэнник быһаарсар тустуу, хапсаҕай көрүҥнэрин көрө үөрэммит дьоҥҥо, дуобатчыттар биир сиргэ олорон түөртүү-биэстии чаас оонньуулларын сөхтүбүт. Чахчы да, өй-мэһии мөккүөрэ, олоҥхоҕо сурулларыныы, “аҕыс уон аҕыс ааһар албастардаах, тоҕус уон тоҕус тоһуйар тоһуурдардаах” хатыһыы, кытаанах ньиэрбэ диэн манна эбит, кыайыыга дьулуур диэн манна эбит.

Бастакынан оонньууну, бииргэ төрөөбүт Ольга уонна Дарья Федоровичтар (Беларусь) түмүктээтилэр. Кинилэр оонньуулара эйэ-дэмнээхтик түмүктэннэ. Арааһа, күүстэрин атыттарга харыстаатахтара. Санатан эттэххэ, уон алта оонньооччу сэрэбиэй быһыытынан бары сирэй көрсүөхтээхтэр. Ол аата, биир оонньооччу – уон биэстэ киирсиэхтээх. Манна даҕатан эттэххэ, Ольга уонна Дарья Федоровичтар бииргэ төрөөбүт игирэлэр эбит. Бу эмиэ, биһиги чемпионаппыт биир ураты көстүүтэ. Арааһа, маннык улахан таһымнаах күрэхтэһиигэ игирэлэр бииргэ кыттыбыттара урут суоҕа буолуо. Онон, Федоровичтар биирдии очукуону суруннулар.

Иккиһинэн оонньууну, бүгүн сарсыарда Дьокуускайга көтөн кэлбит Эрса Негрбе (Кот-д, Ивуар)  уонна Аннелайн Якобс (Аруба) түмүктээтилэр. Манна кыайыыны Негрбе ситиһэн, икки очукуону сурунна.

Бастакы туурга аҕыс партия оонньоммутугар, үсүһүнэн оонньууну Ханьцин Чжао (Кытай) – Хуслен Энхболд (Монголия) түмүктээтилэр. Кыайыыны Кытай кыыһа ситистэ. Бу иннинэ суруйбуппут курдук, Чжао – саха дуобакка оскуолатын иитиллээччитэ. Манна, Дьокуускайга, биһиги университеппытыгар үөрэнэ сылдьан дуобатынан үлүһүйэн, гроссмейстерга тиийэ үүммүтэ. Онон, этэргэ дылы, бэйэтин дьиэтигэр-уотугар сылдьар курдук сананар буолуохтаах. Специалистар этэллэринэн, Чжао бу чемпионакка “тыас таһаарыан сөптөөх” кыттааччы.

Манна, Энхболд – чемпионат саамай эдэр саастаах кыттааччыта буоларын санатар тоҕоостоох. Кини уон үс сааһын от ыйыгар туолар эбит.

Салгыы, арааһа үс чаастаах оонньуу кэнниттэн аан дойду хас да төгүллээх чемпиона Тамара Тансыккужина (Россия) – Хейке Ферхеулу (Нидерланды) хотон, күрэхтэһиини үчүгэйдик саҕалаата.

Эмиэ ити кэмҥэ, сэрэбиэй быһыытынан бастакы туурга бэйэ-бэйэлэрин кытта көрсүбүт Ксения Нахова уонна Наталья Шестакова оонньууларыгар, кыайыыны Нахова ситистэ.

Унньуктаах уһун оонньууну көрдөрбүт, дуобат дуоскатыгар “иэмэх мастыы эрийсии” кэнниттэн Айгуль Идрисова (Россия) – Виктория Мотричко (Украина) уонна Матрена Ноговицына (Россия) – Ю Жанг (Кытай) хайалара да хотуспакка, тэҥнэһиини суруннулар.

Ол гынан баран, бу туурга кимнээҕэр да ордук уһуннук, аан дойду икки төгүллээх чемпиона Наталья Садовска (Польша) уонна Полина Петрусева (Беларусь) оонньоотулар. Кинилэр биэс чаас (!) киирсэн, хайалара да хоппото, оонньууну эйэ-дэмнээхтик түмүктээтилэр. Онон, киһи эрэ барыта кыайыа диэн эрэммит киһилэрэ – Садовска күрэхтэһиини тэҥнэһиинэн саҕалаата.

Бастакы туур түмүгүнэн Негрбе, Чжао, Тансыккужина, Нахова – иккилии, Идрисова, Мотричко, Ноговицына, Жанг, Федоровичтар, Садовска уонна Петрусева – биирдии очукуоланнылар. Оттон Якобс, Энхболд, Ферхеул уонна Шестакова билиҥҥитэ очукуолара суох. Төһө да өссө уон түөртүүтэ оонньуулларын үрдүнэн, бу көрдөрүү бэйэтэ туһугар сыаналаах, ол эбэтэр, норуокка “отонноотоххо оҥоойук туолар” дииллэринии, ким күрэхтэһии былаһын тухары эриэ-дэхси көрдөрүүлэммит – ол кыайыы көтөллөнөрө буолуо диэн сэрэйэбин.

Дуобаты таптааччылар чемпионат хаамыытын http://fmjd.org сайтка быһа, эбэтэр, “Триумфка” бэйэтигэр кэлэн, күрэхтэһиини илэ көрөргүтүгэр ыҥырабыт. Сарсын бырагыраама быһыытынан, иккис туур 14:00 чаастан саҕаланар.

Петр ПАВЛОВ.

Ааптар хаартыскаҕа түһэриилэрэ.   

Добавить комментарий

Ваш e-mail не будет опубликован. Обязательные поля помечены *