Дуобакка аан дойду чемпионата: Быыстапка, сеанс, партиялары ырытыы…

Аан дойду чемпионата ба аҥаардас күрэхтэһии эрэ буолбатах. Маннык улахан таһымнаах бэлиэ түгэҥҥэ сөп  түбэһиннэрэн, араас хабааннаах тэрээһиннэр ыытыллаллар. Холобур, бүгүн, 100 харахтаах дуобакка дьахталларга аан дойду чемпионатын бастакы күнүгэр М.К. Аммосов аатынан ХИФУ “Сэргэлээх уоттара” култуурунай киинигэр, чемпионаты үөрүүлээхтик аһыы кэнниттэн тута сөрөөн фойеҕа Саха сирин дуобатын историятыгар аналлаах “Биһиги дуобаты таптыыбыт” диэн хаартысканан быыстапка тэрилиннэ уонна иккис этээстэ сүүһүнэн киһи кыттыылаах биир кэмнээх сеанстар бэрилиннилэр.

Маны, М.К. Аммосов аатынан Хотугулуу-Илиҥҥи федеральнай университет спорт интеллектуальнай көрүҥнэригэр киинин дириэктэрэ, Саха Республикатын дуобакка федерациятын вице-президенэ Юрий Егорович Никифоров үүннээн-тэһииннээн, тэрийэн ыытта. Кини быыстапканы кэрийэ сылдьан хас биирдии хаартысканы кэпсээн, быһааран биэртэлээтэ, ыйытыыларга хоруйдаата.

Оттон сеансы Саха сирин аатырбыт дуобатчыттара, гроссмейстердар:  Гаврил Колесов, Иван Токусаров, Николай Гуляев, Николай Гермогенов уонна Андрей Федотов биэрдилэр. Онуоха, дуобакка аан дойду хас эмэ төгүллээх чемпиона, международнай гроссмейстер, Россия гроссмейстера Гаврил Колесовтан, сеанс хайдах түмүктэммитин сурастым.

Сеансы Саха сирин биэс гроссмейстера буолан биэрдибит, – диир Гаврил. – Биирдии киһиэхэ быһа холуйан сүүрбэччэлии дуоска тигистэ. Мин биир да хотторботум, биэстэ тэҥнэстим. Оттон атын гроссмейстердарбыт сорохторо биирдиитэ хотторбут этилэр. Уопсайа, гроссмейстердарга үс хотторуу баар, уонна сүүрбэччэ тэҥнэһии буолла. Барыта сүүстэн тахса киһи оонньообутуттан, көрдөрүү итинник. Сеанска биирдиилээн күүстээх дуобатчыттар эмиэ оонньоотулар. Маастардар эҥин бааллар. Онон сеансердарга син ыарахан буолла.

Ону тэҥэ, чемпионат кэмигэр “Триумфка”, дуобаты таптааччыларга анаан электроннай дуоскаларга, оонньоно турар партиялары ырытыы, дьүүллэһии тэрилиннэ.

Петр ПАВЛОВ.   

Ааптар хаартыскаҕа түһэриилэрэ.

Добавить комментарий

Ваш e-mail не будет опубликован. Обязательные поля помечены *