“Саха Арена-6”: Хапсаҕай муудараһа

/Спорду таптааччы санаата

“Саха Арена-6 хапсаҕай” күрэхтэһиитин телевизорга быһа биэрэн абыраатылар. Бөҕөстөр хамсаныыларын сыыска-буорга түһэрбэккэ көрбүт элбэх буолуо.Саха бөҕөһө атын омуктар быыстарыгар киирэн, өбүгэтин албаһын туһанан, кыайдаҕына дьонугар-сэргэтигэр үөрүүнү эрэ аҕалар.

Хапсаҕайдаһан тустуу ньымалара, былыргы кыргыс үйэтиттэн сиэттэрэн кэлбиттэрэ көстөр. Аһарыгас буолуу, чыпчылыйыах түгэнигэр быһаарыылаах хамсаныыны таба  оҥоруу, өстөөҕү кытта куустуспакка, тутуспакка сылдьан чэпчэкитик кыайыы.

Билигин хапсаҕай быраабылата тустуу, сумо быраабылатын курдуга, хапсаҕайы таҥнары тардар курдук.

Сумо диэн оҕустар кэйсиилэригэр олоҕуран айыллыбыт оонньуу буолуон сөп. Муостарынан, сүүс сүүстэринэн тирэнсэн баран, ким туора анньан кыайар эбитий диэн. Онтон көҥүл тустуу, дзюдо – диэн киһини тиэрэ уурааһын, хамсаппакка тутааһын.   Биллэн туран, бу былыр, эр киһи дьахтары күүһүлээһинин кытта  сибээстээх буолуон эмиэ сөп. Олус ньаҕайданааһын, сиэрэ суох быһыыны төрүттээһин, киһи кыаҕын ылан тэйии көстөр.

Хапсаҕайга тутуһары көҥүллээбэт ордук. Онтон бэриллибит бириэмэ устата бэйэ-бэйэлэрин утары дьайыыны оҥорботохторуна, иккиэннэригэр кыайтарыыны биэриэххэ наада. Ол аата, киирсэр санаалара суох эбит диэн.

Күрэхтэһиини көрө олорон үгүс түгэннэргэ хапсаҕайы буолбакка тустууну, сумону көрө олорор курдук сананаҕын. Хоннох былдьаһыыта, систэһии, ытыһынан сирэйгэ бэрсии, күрдьэн сэлэ таһыгар таһаарыы уо.д.а. элбэх.

Аһаран биэрэн салгыныы харбатыыны тувинец Субудай бэркэ көрдөрдө. Супту түһэн иһэр бөҕөстөн туора ыстанан баран, аһары түһүүтүгэр, икки атаҕын кыаһылаан суулларыыны (монгол Эрдэнэҕэ) Сунтаартан сылдьар эдэр бөҕөс Игорь Петров көрдөрөн, көрөөччүнү сэргэхситтэ. Хайдах эрэ кыргыс үйэтигэр, батаһынан киирсиигэ, урааҥхай буойуна, өстөөҕө монгол батаһынан хара быарга анньан супту түспүтүгэр, аһара охсон баран, ойоҕоһуттан тайыылыырга майгыннаата. Эчи, туттара да түргэнэ сүрдээх. Мохсоҕол!

Хапсаҕай дьиҥнээх хамсаныытын Борукуоппай Петров финалга көрдөрдө. Тувинец Ондарга хотторон иһэн, бэйэ бодотун тардынна. Ондар хам тутаары утары истэҕинэ уҥа атаҕынан, такымҥа тэбэн бүдүрүттэ уонна окумалыттан умса тардан ат буолбут Ондарга үрдүгэр биирдэ баар буолла. Киһитэ туох буолбутун өйдөөбөтө даҕаны быһыылаах.

Кыргыс үйэтигэр итинник сылбырҕа туттунууга, өстөөх таҥаралаабытын билбэккэ да хаалара буолуо. Көхсүн хараҕар батас сааллар буоллаҕа.

Онон хапсаҕай диэн, былыр кыргыс үйэтигэр, тыыны көмүскэниигэ эрчийэр үөрэх дии саныыбын. Былыр, омук быһыытынан эстиэхпитин, кыргыллыахпытын өрүһүйбүт ньымалары күн бүгүнүгэр диэри илдьэ сылдьар эбиппит. Муудараһа – ол. Онон атын утарыта киирсиигэ буккуйбакка, бойобуой ускуустуба курдук илдьэ сылдьыахтаахпыт. Өссө эрэһиинэ батаһынан тайыылаһыннарар гына оонньууну тэрийдэххэ хайдаҕый?

Федот ХАРИТОНОВ.

Мэҥэ Хаҥалас.

Эрэл ОХЛОПКОВ хаартыскаҕа түһэриитэ.

Добавить комментарий

Ваш e-mail не будет опубликован. Обязательные поля помечены *