Наталья Садовска: “Сүрүн соругум – чемпион аатын көмүскээһин”


Сарсыҥҥыттан, 100 харахтаах дуобакка дьахталларга аан дойду чемпионата саҕаланар. Кыттааччылар кэлитэлээн эрэллэр. Бүгүн республикатааҕы Медиа-кииҥҥэ тэриллибит пресс-конференцияҕа аан дойду 2016, 2018 сыллардааҕы чемпиона, международнай гроссмейстер Наталья Садовска (Польша) кыттыыны ылла.
Саха сиригэр, Дьокуускай куоракка иккис кэлиим, – диир, аан дойду чемпиона (санатан эттэххэ, бу саас Дьокуускайга, “Саха” иһитиннэрэр-көрдөрөр хампаанньа студиятыгар Наталья Садовска уонна Матрена Ноговицына 100 харахтаах дуобат түргэн оонньуутугар сирэй көрсүүлэригэр, биһиги кыыспыт 4:2 ахсаанынан кыайыыны ситиспитэ). – Оччолорго быһа холуйан 30-ка чугаһыыр тымныы эбит буоллаҕына, билигин 30 кыраадыс итиигэ кэллим. Саха сирин уонна сахалар тустарынан үчүгэй эрэ өйөбүллээхпин. Реналыын доҕордоспутум ыраатта. Ааспыкка манна кинилиин оонньооһунум үрдүк таһымнаахтык тэриллибитэ. Онон буолаары турар чемпионаты даҕаны тэрээһиннээхтик ыытаргытыгар эрэнэбин. Саха сиригэр дуобаты сүрдээҕин таптыыллар, дуобат сайдыбыт республиката эбит. Бу чемпионакка мин сүрүн соругум – аан дойду чемпионун аатын ситиһиилээхтик көмүскээһин. Ол гынан баран, спорт аата – спорт, туох баҕарар буолуон сөп.

Пресс-конференцияҕа Дуобат аан дойдутааҕы федерациятын (ФМЖД) генеральнай секретара Юрий Черток, чемпионат кылаабынай судьуйата Айрат Нургазиев (Казахстан), Россия дуобакка федерациятын президенэ Анатолий Никитин, Саха Республикатын дуобакка федерациятын президенэ Владимир Птицын уонна Саха Республикатын Физическэй култуураҕа, спорка миниистирэ Иннокентий Григорьев кыттыыны ыллылар.

Сарсын, бэс ыйын 11 күнүгэр, күнүс 11:00 чаастан М.К. Аммосов аатынан Хотугулуу-Илиҥҥи федеральнай университет “Сэргэлээх уоттара” култуурунай киинигэр 100 харахтаах дуобакка дьахталларга аан дойду чемпионатын үөрүүлээх аһыллыыта ыытыллар. Спорду сэҥээрээччилэр маннык бэлиэ түгэни мүччү туппаккытыгар баҕарабыт.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *