Дыгын оонньуулара: Сүүмэрдээһиҥҥэ уларыйыылар


Бэҕэһээ, ыам ыйын 22 күнүгэр – Ньукуолун күн, дьоҥҥо-сэргэҕэ киэҥ биһирэбили, кэрэхсэбили ылбыт “Дыгын оонньууларын” сүрүн тэрийээччилэр – Дьокуускай куорат физическэй култуураҕа уонна спорка управлениетын бөлөҕө Намҥа тиийэн, бу өрөбүллэргэ буолуохтаах күрэхтэһии бэлэмин кытта билистэ. Биллэрин курдук, быйыл сайын Туймаада ыһыаҕын кэмигэр ыытыллар “Дыгын оонньууларыгар” сүүмэрдээһин иккис түһүмэҕэ ыам ыйын 25-26 күннэригэр Намҥа, Саха Өрөспүүбүлүкэтин норуоттарын VI спортивнай оонньууларыгар ананан оҥоһуллубут спортивнай базаҕа тэриллэр.

Манан сибээстээн, “Дыгын оонньууларын” тэрийэр хамыыһыйа салайааччыта – Дьокуускай куорат физическэй култуураҕа уонна спорка управлениетын начаалынньыга Константин Семенович Бурцев салайааччылаах бөлөх миэстэҕэ тиийэн салайааччылары кытта көрүстэ, күрэхтэһии ыытыллар сирин көрдө-иһиттэ. Итиэннэ улуус баһылыгын социальнай боппуруостарга солбуйааччы Петр Васильевич Абрамовы, улуус спорка кэмитиэтин салайааччы Павел Гаврильевич Иванову кытта сүбэ мунньах ыытылынна.

Ол быһыытынан, күрэхтэһии сүрүннээн, бигэргэммит бырагырааманан, икки күн стадиоҥҥа ыытыллыаҕа. Төһө-хачча кыттааччы кэлэн күөн көрсөрө, күрэхтэһии иннинээҕи күн биллиэҕэ. Арай, эрдэ путевка ылбыттарга биир уларыйыы киирдэ. Ол курдук, оонньууларга сүүмэрдээһин бастакы түһүмэҕэр үһүс бириистээх миэстэни ылбыт Ньурба боотура Владимир Федоров, бэс ыйын 28-29 күннэригэр Бүлүүгэ буолар күрэхтэһиигэ кыттарга соруммутунан, хамыыһыйаҕа “Дыгын оонньууларыгар” кыттартан аккаастыыр сайабылыанньатын киллэрдэ. Онон, былааннаммытын быһыытынан, Намнааҕы сүүмэрдээһиҥҥэ биэс путевка буолбакка – алта путевка оонньонор буолла.
Ол да буоллар, састаап күүстээх буолара күүтүллэр. Билиҥҥи туругунан Артем Варданян, Петр Старостин, Николай Матаннанов, Алексей Иванов, Леонид Филиппов, Антон Тойтонов, Айсен Семенов, Давыд Колесов курдук дэгиттэр кыахтаах боотурдар “Дыгын оонньууларыгар” путевкалара суох. Хаалбыт алта путевка иһин сүрүннээн кинилэр киирсэллэрэ буолуо диэн сылыктааһын баар.

Санатан эттэххэ, “Дыгын оонньууларын” финала бэс ыйын 29-30 күннэригэр Туймаада ыһыаҕын кэмигэр, Үс Хатыҥҥа ыытыллыаҕа.

Иккис сүүмэрдиир түһүмэх бырагыраамата:

Ыам ыйын 25 күнэ, субуота
09:00-10:00 – мандатнай хамыыһыйа үлэтэ, кыттааччылар сэрэбиэйдэһиилэрэ;
10:00-10:30 – хамаанда бэрэстэбиитэллэрэ кыттыылаах судьуйалар мунньахтара;
10:30-11:00 – күрэхтэһиини үөрүүлээхтик аһыы;
11:00-13:00 – “Үс төгүл үс” күрэхтэһии;
13:00-14:00 – эбиэккэ тохтобул;
14:00-16:30 – “Тутум эргиир”, мас тардыhыыта;
16:30-17:00 — бастакы күн түмүгүн таһаарыы.

Ыам ыйын 26 күнэ, баскыһыанньа
09:30-10:00 – судьуйалар сүбэ мунньахтара;
10:00-16:00 – оҕунан ытыы, 400 м сүүрүү, хапсаҕай, тааһы көтөҕүү;
16:00-16:30 – кыайыылаахтары наҕараадалааһын.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *