Пауэрлифтиҥҥэ Дьокуускай чемпионнарынан кимнээх буоллулар?


Ааспыт өрөбүл күннэргэ куорат 6 нүөмэрдээх спортивнай оскуолатыгар (“Стерх” спорткомплекс) пауэрлифтинг классическай троеборьетыгар Дьокуускай чемпионата буолан ааста.
Түмүк үс түһүмэх түмүгүнэн таһаарылынна. Бастакыга – штанганы санныгар ууран баран олорон туруу, иккискэ – сытан эрэ өрө анньыы, үһүскэ – туран эрэн көтөҕүү. Кыттааччылар ити түһүмэхтэргэ үстүү холонууну оҥордулар.
Онуоха дьахталлар бөлөхтөрүгэр 52 киилэҕэ үс түһүмэх түмүгүнэн 292,5 очукуону суруммут Александра Антонова (СОШ-2) бастаата итиэннэ спорт маастарын нуорматын толордо. Иккис-үһүс миэстэлэргэ Диана Сизова уонна Людмила Слепцова (иккиэн ДЮСШ-6) таҕыстылар.
63 киилэлээхтэргэ Снежана Алексеева (“Модун”) уопсай түмүккэ 280 очукуону ылан, кыайыылааҕынан ааттанна. Бу ыйааһыҥҥа иккис-үһүс миэстэлэри эмиэ ДЮСШ-6 хамаандаттан Дарина Федорова уонна Туйаара Николаева ыллылар.
63-тэн үөһэ ыйааһыннаахтарга спорт маастарыгар кандидат Дарья Смирнова (ДЮСШ-6) түмүккэ 362,5 очукуону ылан, бэйэтин нормативын бигэргэттэ. Иккис миэстэни маастар Александра Мегежекская (ДЮСШ-6) ылла.
Манна даҕатан эттэххэ, кыайыылаахтар А.Антонова, С.Алексеева, Д.Смирнова – тренер С.С. Румянцев салалтатынан дьарыктаналлар. Оттон ДЮСШ-6 хамаандатын тренер А.Д.Крылов бэлэмнээтэ.


Эр дьоҥҥо 66 киилэҕэ Сергей Парчевскай (ДЮСШ-6) 420 кг көрдөрүүлээх бастаата. Иккис миэстэни Василий Егоров (“Спарта”) ылла. Үһүс бириистээх миэстэҕэ Вадим Яковлев (ДЮСШ-6) таҕыста.
83 киилэлээхтэргэ аҕыс күүстээх спортсмен күрэс былдьаста. Түмүккэ спорт маастара Михаил Пельменев (ДЮСШ-6) уопсай түмүккэ 612,5 очукуону хомуйан, бастакы миэстэни хааччынна. Эмиэ спорт маастара Дьулустан Аркадьев (Фитстудио) иккис буолла. Үһүс миэстэҕэ Евгений Мацкевич (Росгвардия) таҕыста.
83-тэн үөһэ киилэлээхтэргэ Владимир Плакин (Росгвардия) ордук үчүгэй көрдөрүүлэннэ. Кини үс түһүмэх түмүгүнэн 637,5 очукуолаах. Бу ыйааһыҥҥа Алексей Крылов (ДЮСШ-6) иккис миэстэлэннэ. Андрей Судьяров (“Спарта”) үһүс буолла.
Кыайыылаахтар кубоктарынан, мэтээлинэн уонна грамотанан наҕараадаланнылар.
“Дьулурҕан”.

Добавить комментарий

Ваш e-mail не будет опубликован. Обязательные поля помечены *