Рамонов, Курбаналиев, Цаболов уонна Лазинская – Саха сиригэр


Бу күннэргэ Россия спортивнай тустууга федерацията Саха сирин түөрт куоратыгар “Настроение АЛРОСА” диэн бэстибээл чэрчитинэн маастар-кылаастары тэрийэр сылдьар. Ол курдук, бэстибээл Удачнайга саҕаланyf. Аны маастар-кылаастар Айхал, Мирнэй уонна Дьокуускай куораттарга ыытыллыа. Саха сирэ Россия бастыҥ бөҕөстөрүн Удачнайга хаарынан уонна 9 кыраадыс тымныынан көрүстэ. Ол эрээри, олохтоохтор көҥүл тустууга олимпийскай чемпион Сослан Рамоновы, аан дойду чемпионнара Магомед Курбаналиевы, Хетаг Цаболовы уонна Европа дойдуларын оонньууларын кыайыылааҕа Валерия Лазинскаяны сылаастык көрүстүлэр.
Бэстибээл чэрчитинэн “Чемпионтан 101 ыйытык” диэн түһүмэххэ оҕолор бэйэлэрин интэриэһиргиир ыйытыыларыгар сөптөөх хоруйдары ыллылар. Кинилэр билбиттэринэн, ыалдьыттартан Сослан Рамонов эрэ тустууна кыра эрдэҕиттэн дьарыктанар эбит. Оттон тустууга кэлиэхтэрин иннинэ Магомед Курбаналиев маҥнай дзюдонан, Хетаг Цаболов каратэнан, оттон Валерия Лазинская харбааһынынан дьарыктана сылдьыбыттар. Бөлөҕү кытта wrestrus.ru сайт корреспондена Тигран Аванян сылдьыһар уонна кини көрсүһүүлэр ыытааччыларынан буолар.


Биллиилээх тустууктар Удачнайга икки күн сырыттылар уонна куорат икки оскуолатыгар үөрэнээччилэри, нэһилиэнньэни кытта көрүстүлэр. Культурнай бырагыраама быһыытынан 10 километр дириҥнээх “Удачнай” кимберлитовай трубканы көрөн сөхтүлэр-махтайдылар.
Удачнайга, бэйэ-бэйэлэригэ маарыннаспат алта маастар-кылаастар ыытылыннылар. Көҥүл тустуу албастарын көрдөрдүлэр, футбол оонньоотулар. Түмүккэ Магомед Курбаналиев эрчиллии түмүгүнэн бастыҥ спортсмены кытта “көрдөрүүлээх киирсиитэ” тэрилиннэ. Тустуу улахан аҥаарыгар Магомед 2:6, 4:6 ахсаанынан хотторон испит, оттон түмүүкэ хас да албаһы оҥорон 11:6 хоппут. Ол кэнниттэн кыайыылаах киһи быһыытынан, лезгинка үҥкүүлээн көрдөрдө. Маастар-кылаастар түмүктэринэн бастыҥ спортсмеҥҥа 10 кубок уонна 10 трико туттарылынна. Биллиилээх бөҕөстөрү тэҥэ КВН үрдүкү лигатыгар кыттар “Борцы” диэн көрдөөхтөр-булугас өйдөөхтөр кулууптара кэлсибит. Кинилэр көрөөччүлэри сэргэхситтилэр.
Бырагыраама быһыытынан, кинилэр ыам ыйын 25-26 күннэригэр республика киин куоратыгар – Дьокуускайга кэлэллэр уонна Манчаары аатынан Спорт национальнай көрүҥнэрин киинигэр маастар-кылаастары ыытыахтара, оттон “Борцы” көрдөөхтөр-булугас өйдөөхтөр кулууптара “Сэргэлээх уоттара” култуура киинигэр кыттыахтара. Киириитэ – босхо.
“Дьулурҕан”.

Григорий АВАНЯН хаартыскаҕа түһэриитэ.

Добавить комментарий

Ваш e-mail не будет опубликован. Обязательные поля помечены *